ތައިލެންޑުގެ ޕަޓާޔާގައި 17 އަހަރުގެ އަންހެން ކުއްޖަކު މަރާލުމަށްފަހު ފޮށްޓަކަށްލައި އެއްލާލި މައްސަލައިގައި، އޮސްޓްރޭލިއާގެ ފިރިހެނަކު ބެންކޮކް އެއާޕޯޓުން ހައްޔަރު ކޮށްފި
ސީސީޓީވީ ފޫޓޭޖުތަކުން އެ ކުއްޖާއާއެކު އެމީހާ އެޕާޓްމަންޓަށް ވަދެ، ފަހުން ބޮޑު ފޮށްޓެއް ހިފައިގެން ނުކުތް މަންޒަރު ފެނުނު ނަމަވެސް، އުމުރުން 46 އަހަރުގެ އެ މީހާ ވަނީ މަރުގެ ތުހުމަތަށް އިންކާރުކޮށްފައި. ފުލުހުން ބުނާ ގޮތުގައި އެ މީހާގެ ހަށިގަނޑުން ފެންނަން ހުރި ޒަޚަމްތަކަކީ ކުރިމަތިލުމެއް ހިނގާފައިވާ ކަމުގެ ހެކިތަކެއް ކަމުން، އޭނާގެ މައްޗަށް ގަސްދުގައި މީހަކު މެރުމުގެ ދައުވާ އުފުލުމަށް މިހާރު ދަނީ ތައްޔާރުވަމުން.
ސޫޓްކޭހެއްގެ ތެރެއިން މަރުވެފައި އޮއްވާ ފެނުނު ތައިލެންޑުގެ އަންހެން ކުއްޖެއްގެ މަރުގެ މައްސަލައިގައި، ހައްޔަރު ކުރި އޮސްޓްރޭލިއާގެ މީހާ. | އެކްސް
ތައިލެންޑުގެ މަޝްހޫރު ރިސޯޓް ސިޓީއެއް ކަމަށްވާ ޕަޓާޔާ ކައިރިން ފޮށްޓެއްގެ ތެރެއިން 17 އަހަރުގެ އަންހެން ކުއްޖެއްގެ ހަށިގަނޑު ފެނުނު މައްސަލައިގައި، އެ ކުއްޖާ މަރާލި ކަމުގެ ތުހުމަތުގައި އޮސްޓްރޭލިއާގެ ފިރިހެނަކު ތައިލެންޑުގެ ފުލުހުން ހައްޔަރުކޮށްފި އެވެ.
ފުލުހުންނާއި އެ ގައުމުގެ މީޑިއާތަކުން ރިޕޯޓްކޮށްފައިވާ ގޮތުގައި، އުމުރުން 46 އަހަރުގެ ސައިމަން ކާމަން ނަމަކަށް ކިޔާ މި މީހާ ހައްޔަރުކޮށްފައިވަނީ ހުކުރު ދުވަހުގެ ހަވީރުގެ ވަގުތެއްގަ އެވެ. އޭނާ ހައްޔަރުކުރީ ބެންކޮކްގެ ސުވަރުނަބޫމީ އެއާޕޯޓުން އޮސްޓްރޭލިއާގެ ޕާތަށް ދިއުމަށް ފުރަން ތައްޔާރުވެފައި ވަނިކޮށެވެ. ތަހުގީގު ކުރާ ފަރާތްތަކުން ބުނާ ގޮތުގައި، ބުރާސްފަތި ދުވަހުގެ ފަތިހުގެ ވަގުތެއްގައި އެ އަންހެން ކުއްޖާ އެ މީހާއާއެކު އެޕާޓްމަންޓް އިމާރާތަކަށް ވަންނަ މަންޒަރު ސެކިއުރިޓީ ކެމެރާތަކަށް ވަނީ އަރާފަ އެވެ.
އޭގެ އެތައް ގަޑިއިރެއް ފަހުން، އެ މީހާ ކަޅު ކުލައިގެ ބޮޑު ފޮށްޓެއް ހިފައިގެން އެ އިމާރާތުން ނުކުމެ، ސައިކަލެއްގެ ފަހަތަށް އެ ފޮށި އަރުވައިގެން ދާ މަންޒަރު އެހެން ސީސީޓީވީ ފޫޓޭޖަކުން ފެންނަން ހުރި ކަމަށް ފުލުހުން ބުނެ އެވެ.
އެ އަންހެން ކުއްޖާ އެންމެ ފަހުން ފެނުނު ސަރަހައްދާ މާ ދުރަކަށް ނޫން ހިސާބެއްގައި އޮންނަ ރޭލު ދަގަޑެއްގެ ކައިރިއަށް އެއްލާލާފައި އޮތް ފޮށީގެ ތެރެއިން، އެ ކުއްޖާގެ އޮރިޔާން ހާލުގައި އޮތް ހަށިގަނޑު ފަހުން ވަނީ ފެނިފަ އެވެ.
ފުލުހުން ބުނި ގޮތުގައި އެ ކުއްޖާއަށް ވަނީ ވަރަށް ބޮޑަށް އަނިޔާކޮށްފަ އެވެ. އަދި އެ ކުއްޖާގެ މޫނުމަތީގައި ވަރަށް ބޮޑަށް ނޫފައިގަނެފައި ހުރި ކަމަށްވެސް ފުލުހުން ފާހަގަކުރި އެވެ.
މި ހާދިސާ ފެންމަތިވީ، އެ އަންހެން ކުއްޖާގެ ޚަބަރެއް ނުވެގެން އޭނާގެ ރަހުމަތްތެރިން ހުކުރު ދުވަހުގެ މެންދުރުފަހު ފުލުހުންނަށް ރިޕޯޓް ކުރުމާ ގުޅިގެންނެވެ.
ފުލުހުން އެ ކުއްޖާ އެންމެ ފަހުން އުޅުނު ގޮތް ބެލިއިރު، ތުހުމަތު ކުރެވޭ މީހާއާއެކު އޭނާ ކޮޓަރިއަކަށް ވަންކަން އެނގުމުން، ވަގުތުން އިމިގްރޭޝަން އޮފިޝަލުންނަށް އެކަން އަންގައި އެއާޕޯޓުން އެ މީހާ ވަނީ އަތުލައިގަނެފަ އެވެ.
ނަމަވެސް، ކާމަން ވަނީ އެ އަންހެން ކުއްޖާ މަރާލި ކަމަށް އިންކާރުކޮށްފަ އެވެ.
ޕަޓާޔާ ސިޓީ ޕޮލިސް ސްޓޭޝަންގެ އިސްވެރިޔާ، ޕޮލިސް ކާނަލް އަނެކް ސަރަތޮންގްޔޫ ވިދާޅުވީ، އެ މީހާއަކީ މި މަރަށް ޒިންމާވާންޖެހޭ މީހާ ކަމަށް ފުލުހުން ގަބޫލުކުރާ ކަމަށާއި، މަރުގެ ތުހުމަތުގައި އޭނާއާ ސުވާލު ކުރަމުންދާ ކަމަށެވެ. އަދި އެ މީހާގެ ހަށިގަނޑުން ފެންނަން ހުރި ވަކި އަޅާފައިވާ ނިޝާންތަކަކީ، މީހަކާ ކުރިމަތިލުމެއް ހިނގާފައިވާ ކަމުގެ ހެކިތަކެއް ކަމަށްވެސް އޭނާ ވިދާޅުވި އެވެ.
ހައްޔަރު ކުރުމަށްފަހު ނަގާފައިވާ ވީޑިއޯއެއްގައި، އޭނާގެ ކަރުގައި ހުރި ނިޝާންތަކާ ބެހޭގޮތުން ސުވާލު ކުރުމުން، އެއީ ފައިދިގު މަކުނެއް ދަތް އެޅުމުން ވީގޮތެއް ކަމަށް ބުނެ އޭނާ ވަނީ ދިފާއުވެފަ އެވެ.
އޭނާގެ މައްޗަށް މަރުގެ ދައުވާގެ އިތުރުން، ހަށިގަނޑު ފޮރުވުމާއި، ބަދުއަޚުލާގީ އަމަލެއް ހިންގުމުގެ ބޭނުމުގައި ކުޑަކުއްޖަކު ގެންދިއުމުގެ ދައުވާ ހިމެނޭހެން ބޮޑެތި ދައުވާތަކެއް އުފުލާނެއެވެ.
އޮސްޓްރޭލިއާގެ ޑިޕާޓްމަންޓް އޮފް ފޮރިން އެފެއާޒް އެންޑް ޓްރޭޑުން ބުނީ، އެ ގައުމުގެ ރައްޔިތަކަށް ވާތީ ކޮންސިއުލާ އެހީތެރިކަން ފޯރުކޮށްދެމުންދާ ކަމަށެވެ. ނަމަވެސް މައްސަލައާ ގުޅޭ އިތުރު ތަފްސީލެއް އެ އިދާރާއަކުން ނުދެ އެވެ.
މި މީހާ ހައްޔަރުކޮށްފައި މިވަނީ، ބޭރު ގައުމުތަކުގެ މީހުން މަސްތުވާތަކެއްޗާއި، އިންސާނީ ވަގުފާރި އަދި ގަވާއިދާ ޚިލާފު ވިޔަފާރިތަކުގައި ބައިވެރިވާ މައްސަލަތައް އިތުރުވުމާ ގުޅިގެން، ފަތުރުވެރިންނަށް ވިސާއާ ނުލައި ތައިލެންޑުގައި ތިބެވޭ މުއްދަތު އެ ގައުމުން ވަރަށް ބޮޑަށް ކުރުކޮށްފައިވާ ދަނޑިވަޅެއްގަ އެވެ.
