ތައިލެންޑުގެ ސްކޫލަކަށް ދިން ބަޑީގެ ހަމަލާގައި ޒަޚަމްވި ޕްރިންސިޕަލް މަރުވެއްޖެ

ތައިލެންޑުގެ ދެކުނުގެ ސަރަހައްދެއްގައި ހުރި ސްކޫލަކަށް ވަދެ ބަޑިން ހަމަލާދީ ރަހީނުކުރި ހާދިސާގައި، ޒަޚަމްވި އެ ސްކޫލުގެ ޕްރިންސިޕަލް ހޮސްޕިޓަލުގައި ފަރުވާދެމުން ދަނިކޮށް މަރުވެއްޖެ ކަމަށް އެ ގައުމުގެ ކަމާބެހޭ އިދާރާތަކުން ބުނެފިއެވެ.

ތައިލެންޑުގެ ހަޓް ޔާއީ ސިޓީ ކައިރީގައި ހުންނަ އެ ސްކޫލަށް، އުމުރުން 18 އަހަރުގެ ފިރިހެނަކު ވަދެ ބަޑިން ހަމަލާދީފައިވަނީ ބުދަ ދުވަހުގެ އިރުއޮއްސި 17:00 ހާއިރުއެވެ. މި ހަމަލާގައި ޕްރިންސިޕަލް ސަސިޕަޓް ސިންސަމޮސޯންގެ އިތުރުން އަންހެން ދަރިވަރަކަށް ވެސް ވަނީ ބަޑީގެ ހަމަލާ އަމާޒުވެފަ އެވެ.

ލޯކަލް ފުލުހުން މައުލޫމާތު ދޭ ގޮތުގައި، ލިބުނު ޒަޚަމްތަކަށް ފަރުވާދެމުން ދަނިކޮށް ޕްރިންސިޕަލް ސަސިޕަޓް މަރުވީ ބުރާސްފަތި ދުވަހުގެ ފަތިހުގެ ވަގުތެއްގަ އެވެ. ބަޑީގެ ހަމަލާ އަމާޒުވި ދަރިވަރުގެ ހާލު މިހާރު ރަނގަޅުވަމުން އަންނައިރު، ހަމަލާގެ ތެރޭގައި ސަލާމަތްވުމަށް ކުޑަދޮރަކުން ފުންމާލި އެހެން ދަރިވަރަކަށް ވެސް ހޮސްޕިޓަލުގައި ފަރުވާދެމުންދާ ކަމަށް ފުލުހުން ބުނެފައިވެއެވެ.

ޕަތޮންގް ޕްރަތަން ކީރިވަތު ސްކޫލުގެ އިމާރާތުގެ ތެރޭގައި ގިނަ އަދަދެއްގެ ދަރިވަރުންނާއި މުދައްރިސުން ތާށިވެފައި ތިއްބާ، ދެ ގަޑިއިރަށް ދެމިގެންދިޔަ ކުރިމަތިލުމަކަށްފަހު ފުލުހުން ވަނީ ހަމަލާދިން މީހާ ހައްޔަރުކޮށްފަ އެވެ.

މި ހަމަލާ ދޭން މެދުވެރިވި ސަބަބު އަދި ސާފުވެފައި ނުވި ނަމަވެސް، އެ ސްކޫލުގެ މުދައްރިސަކާ މެދު އޮތް ހިތްހަމަނުޖެހުމެއްގެ ސަބަބުން ދިން ހަމަލާއެއް ކަމަށް އެ ގައުމުގެ ބައެއް މީޑިއާތަކުން ރިޕޯޓުކޮށްފައިވެ އެވެ.

ގާނޫނީ ގޮތުންނާއި ގާނޫނާ ޚިލާފަށް ހޯދާފައިވާ ހަތިޔާރު ތައިލެންޑުގައި އާންމުވެފައިވާއިރު، އެ ގައުމަކީ ބަޑީގެ ހަމަލާތައް ނިސްބަތުން ގިނަ ގައުމެކެވެ.

ފާއިތުވި އަހަރުތަކުގައި ތައިލެންޑުގައި ފުރާނައަށް ނުރައްކާވާ ފަދަ ބަޑީގެ ބޮޑެތި ހަމަލާތަކެއް ވަނީ ހިނގާފަ އެވެ.

އެގޮތުން މިދިޔަ އަހަރު ބެންކޮކްގެ ކާބޯތަކެތި ވިއްކާ މާރުކޭޓެއްގައި ދިން ބަޑީގެ ހަމަލާއެއްގައި ފަސް މީހަކު މަރުވެފައިވެ އެވެ.

އަދި 2023 ވަނަ އަހަރު ބެންކޮކްގެ މެދުތެރޭގައި ހުންނަ ލަގްޒަރީ މޯލެއްގެ ތެރޭގައި އުމުރުން 14 އަހަރުގެ ފިރިހެން ކުއްޖަކު ދިން ބަޑީގެ ހަމަލާއެއްގައި ދެ މީހަކު މަރުވެ ފަސް މީހަކު ޒަޚަމްވި އެވެ.

މީގެ އިތުރުން، އޭގެ އެއް އަހަރު ކުރިން ތައިލެންޑުގެ އިރުއުތުރު ސަރަހައްދެއްގެ ކުޑަކުދިންގެ މަރުކަޒަކަށް ކުރީގެ ފުލުހަކު ވަދެ ދިން ބަޑީގެ ހަމަލާގައި 36 މީހުން މަރުވި އެވެ. މީގެ ތެރޭގައި ގިނައީ ކުޑަކުދިންނެވެ. މިއީ އެ ގައުމުގެ ތާރީޚުގައި ހިނގި އެންމެ ނުރައްކާތެރި އެއް ހަމަލާ އެވެ.