ތައިލެންޑުގައި ކެރޭނެއް ވެއްޓި ބަޔަކު މަރުވިތާ އެއް ދުވަސް ފަހުން އަނެއްކާ ވެސް ކެރޭނެއް ވެއްޓި ބަޔަކު މަރުވެއްޖެ
މި ދެ ހާދިސާގައި ވެސް ޝާމިލު ވަނީ 'އިޓަލިއަން-ތައި ޑިވެލޮޕްމަންޓް' ނަމަކަށް ކިޔާ ކުންފުންޏެއް.
ތައިލެންޑްގެ ސަމުތު ސަކޯން ޕްރޮވިންސްގައި އުސް ހައިވޭއެއް ހެދުމުގެ ތެރޭގައި ކެރޭނެއް ވެއްޓި ދެ އުޅަނދެއް ވަނީ ފުނޑުފުނޑުވެފައި - ޖެނުއަރީ 15، 2026. | ރޮއިޓަސް
ތައިލެންޑުގެ ވެރިރަށް ބެންކޮކް ގެ ސަރަހައްދެއްގައި ކެރޭނެއް ވެއްޓި ދެ މީހަކު މަރުވެއްޖެ އެވެ. މިއީ އެ ގައުމުގެ އިރުއުތުރު ސަރަހައްދުގައި ކެރޭނެއް ވެއްޓި 32 މީހަކު މަރުވި ހާދިސާ އަށް ފަހު، ޖެހިގެން އައި ދުވަހު ހިނގި މިފަދަ ދެވަނަ ހާދިސާ އެވެ.
ސަމުތު ސަކޯން ޕްރޮވިންސް ގައި ބުރާސްފަތި ދުވަހު ހިނގި މި ހާދިސާއަކީ މަތިންދާ މަގެއް ހެދުމުގެ މަސައްކަތުގައި ބޭނުންކުރި ކެރޭނެއް މަގުމައްޗަށް ވެއްޓިގެން ހިނގި ހާދިސާއެކެވެ. ރޮއިޓާސް ނިއުސް އެޖެންސީ އަށް މައުލޫމާތު ދެއްވަމުން އެ ސަރަހައްދުގެ ފުލުހުންގެ އިސް އޮފިޝަލެއް ކަމަށްވާ ސިއްތިޕޯން ކަސީ ވިދާޅުވި ގޮތުގައި، މި ހާދިސާގައި އިތުރު ފަސް މީހަކަށް ވަނީ އެކިވަރުގެ އަނިޔާތައް ލިބިފަ އެވެ.
ތައިލެންޑުގެ ޓްރާންސްޕޯޓް މިނިސްޓަރު ފިޕާޓް ރަޗަކިތުޕްރަކާން ވިދާޅުވި ގޮތުގައި، މި ދެ ހާދިސާގައި ވެސް ޝާމިލު ވަނީ 'އިޓަލިއަން-ތައި ޑިވެލޮޕްމަންޓް' ނަމަކަށް ކިޔާ ކުންފުންޏެކެވެ. މި ކުންފުންޏަކީ ޗައިނާގެ އެހީގައި ބެންކޮކްގެ އިރުއުތުރުން އޮންނަ ނަކޮން ރަޗަސީމާ ޕްރޮވިންސް ގައި ކުރިއަށްދާ ހައި-ސްޕީޑް ރޭލު މަޝްރޫއުގެ މަސައްކަތް ކުރާ ކުންފުންޏެވެ. ބުދަ ދުވަހު ހިނގި ނުރައްކާތެރި ހާދިސާގައި ބޮޑު ކެރޭނެއް ވެއްޓުނީ އެ ސަރަހައްދުގައެވެ.
ލޯކަލް މީޑިއާތަކުން ރިޕޯޓްކޮށްފައިވާ ގޮތުގައި ބުރާސްފަތި ދުވަހުގެ ހާދިސާ ހިނގާފައި ވަނީ 'ޕެރިސް އިން ގާޑަން ހޮޓަލް' ކުރިމަތީގަ އެވެ. ހާދިސާ ހިނގި ވަގުތުގެ މަންޒަރުތަކުން ފެންނަ ގޮތުގައި، ކްރޭން ވެއްޓުމާއެކު މުޅި ސަރަހައްދުގައި ހިރަފުހާއި ކުނިބުނިތައް ވަނީ ބުރައިގެން ގޮސްފަ އެވެ.
މި ހާދިސާ ހިނގި ރާމާ -ޓޫ އެކްސްޕްރެސްވޭ އަކީ ބޮޑެތި މަޝްރޫއުތަކެއް ކުރިއަށްދާ މަގެކެވެ. ފާއިތުވި އަހަރުތަކުގައި މި މަގުގައި ނުރައްކާތެރި ގިނަ ހާދިސާތަކެއް ހިނގާފައިވާތީ، މި މަގަށް ވަނީ "މަރުގެ މަގު" ގެ ނަމުން ނަންދެވިފަ އެވެ.
ބުދަ ދުވަހުގެ ހާދިސާ ގައި، ތައި-ޗައިނާ ހައި-ސްޕީޑް ރޭލު މަޝްރޫއުގެ މަސައްކަތުގައި ބޭނުންކުރި ކެރޭން ވެއްޓުނީ ދަތުރުކުރަމުން ދިޔަ ރޭލެއްގެ މައްޗަށެވެ. މީގެ ސަބަބުން ރޭލު ފުރޮޅާލައި، ކުޑަ ވަގުތުކޮޅަކަށް އަލިފާން ވެސް ރޯވިއެވެ. ޓްރާންސްޕޯޓް މިނިސްޓަރު ވިދާޅުވި ގޮތުގައި އެ ވަގުތު ރޭލުގައި 195 ފަސިންޖަރުން ތިއްބެވެ. މި ހާދިސާ ފުރިހަމަ އަށް ތަހުގީގު ކުރުމަށް މިނިސްޓަރު ވަނީ އަމުރުކުރައްވާފަ އެވެ.
އަލްޖަޒީރާގެ ރިޕޯޓަރު ޓޯނީ ޗެންގް ވިދާޅުވި ގޮތުގައި، މި ރޭލު ދަތުރުކުރާ މަގަކީ އާންމުކޮށް ގިނަ ބަޔަކު ބޭނުންކުރާ، އާބާދީ ބޮޑު ސަރަހައްދުތަކެއް ގުޅުވައިދޭ މަގެކެވެ. އަދި މި ސަރަހައްދުގައި ހައި-ސްޕީޑް ރޭލު އެޅުމުގެ މަސައްކަތް ކުރާތާ މިހާރު ދިހަވަރަކަށް އަހަރު ވެދާނެ ކަމަށް އޭނާ ފާހަގަކުރެއްވި އެވެ. މި މަޝްރޫއަކީ މިހާރު އޮތް ރޭލު ދަތުރުކުރާ މަގުގެ މަތިން ކޮންކްރީޓް ޕްލެޓްފޯމެއްގައި ހައި-ސްޕީޑް ރޭލު ދަތުރުކުރާ ގޮތަށް ފަރުމާކޮށްފައިވާ މަޝްރޫއެކެވެ.
ތައިލެންޑުގެ މަސައްކަތުގެ މާހައުލުތަކާއި އިމާރާތްކުރުމުގެ ދާއިރާގައި މިފަދަ ނުރައްކާތެރި ހާދިސާތައް ހިނގުމަކީ ވަރަށް އާންމު ކަމެކެވެ.
މަސްދަރު: ރޮއިޓާސް
