ތައިލެންޑުގައި ދުއްވަމުންދިޔަ ރޭލެއްގެ މައްޗަށް، ކެރޭނެއް ވެއްޓި މަދުވެގެން 32 މީހުން މަރުވެ، 66 މީހަކަށް އަނިޔާވެއްޖެ
ބެންކޮކުން އިރުއުތުރަށް ދަތުރުކުރަމުންދިޔަ މި ރޭލުގައި 171 ފަސިންޖަރުން ތިބި. ސްޓޭޓް ރޭލްވޭ އިން މި ހާދިސާ ތަހުގީގު ކުރަމުންދާއިރު ކެރޭންގެ މަސައްކަތް ކުރި ކުންފުންޏާ ދެކޮޅަށް ގާނޫނީ ފިޔަވަޅު އަޅާނެ ކަމަށް އިއުލާނު ކޮށްފައި.
ރޭލުގެ މައްޗަށް ކެރޭން ވެއްޓުމުގެ ސަބަބުން ބޮޑެތި ގެއްލުންތަކެއް ލިބިފައި | ރޮއިޓަސް
ތައިލެންޑުގެ އިރުއުތުރު ސަރަހައްދުގައި ދުއްވަމުންދިޔަ ރޭލެއްގެ މައްޗަށް، އިމާރާތްކުރުމުގެ މަސައްކަތުގައި ބޭނުންކުރާ ކެރޭނެއް ވެއްޓި ހިނގި ނުރައްކާތެރި ހާދިސާގައި މަދުވެގެން 32 މީހުން މަރުވެ، 66 މީހަކަށް އެކިވަރުގެ އަނިޔާތައް ލިބިއްޖެ އެވެ.
މި ހާދިސާގައި ކްރޭން ވެއްޓުމުގެ ސަބަބުން ރޭލު ދަގަނޑުން ކަސިޔާރުވެ، އޭގެ ބައެއް ބައިތައް ފިސްފިސްވެފައި ވާއިރު، އެއް ކެރިޖުގައި ވަނީ އަލިފާން ހިފާފައެވެ. ކަމާބެހޭ ފަރާތްތަކުން ހާމަކޮށްފައިވާ ގޮތުގައި، އަނިޔާވި މީހުންގެ ތެރޭގައި އެއް އަހަރުގެ ކުޑަކުއްޖަކާއި 85 އަހަރުގެ މީހަކު ހިމެނެއެވެ. އަދި އަނިޔާވި މީހުންގެ ތެރެއިން ހަތް މީހެއްގެ ހާލު ވަރަށް ސީރިއަސް ކަމަށްވެސް ރިޕޯޓްތައް ބުނެ އެވެ.
އޮފިޝަލުން ވިދާޅުވި ގޮތުގައި، އެ ގައުމުގެ ގަޑިން ހެނދުނު 09:00 ހާއިރު މި ހާދިސާ ހިނގިއިރު، ރޭލުގައި 171 ފަސިންޖަރުން ދަތުރުކުރަމުންދިޔަ އެވެ.
ތައިލެންޑުގެ ސްޓޭޓް ރޭލްވޭއިން މިހާރު ވަނީ މި ހާދިސާ ތަހުގީގު ކުރަން ފަށާފަ އެވެ. އަދި ކެރޭންގެ މަސައްކަތް ކުރަމުންދިޔަ ކުންފުންޏާ ދެކޮޅަށް ގާނޫނީ ފިޔަވަޅު އަޅާނެ ކަމަށްވެސް އެ އިދާރާއިން ވަނީ އިއުލާނުކޮށްފަ އެވެ.
މި މަސައްކަތުގެ ޒިންމާ އުފުލާ "އިޓަލިއަން-ތައި ޑިވެލޮޕްމަންޓް ޕަބްލިކް ކޮމްޕެނީ ލިމިޓެޑް" އިން ވަނީ މި ހާދިސާއާ މެދު ހިތާމަ ފާޅުކޮށްފަ އެވެ. އަދި މަރުވި މީހުންނާއި އަނިޔާވި މީހުންގެ އާއިލާތަކަށް ބަދަލު ދިނުމާއި އެހީތެރިކަން ފޯރުކޮށްދޭނެ ކަމަށް އެ ކުންފުނިން ބުނެފައިވެ އެވެ.
ބެންކޮކުން ފުރައިގެން އިރުއުތުރު އުބޮން ރަޓްޗަތާނީ ޕްރޮވިންސަށް ދަތުރުކުރި މި ރޭލުގައި ގިނައިން ތިބީ ކިޔެވުމަށާއި މަސައްކަތަށް އެކި ސަރަހައްދުތަކަށް ދަތުރުކުރި ދަރިވަރުންނާއި މުވައްޒަފުންނެވެ.
އެ ގައުމުގެ ނޫސް އެޖެންސީ އެއް ކަމަށްވާ "ދަ ނޭޝަން" އިން ރިޕޯޓްކޮށްފައިވާ ގޮތުގައި، މި ހާދިސާ ހިނގާފައި ވަނީ ކެރޭނުން އުފުލަމުންދިޔަ ބޮޑު ކޮންކްރީޓް ގަނޑެއް ރޭލުގެ މައްޗަށް ވެއްޓުމުގެ ސަބަބުންނެވެ. މީގެ ސަބަބުން ރޭލުގެ ބައިތައް ރޭލު ދަގަނޑުން ކަސިޔާރުވެ، ބޮޑެތި ގެއްލުންތަކެއް ވަނީ ލިބިފަ އެވެ.
