ސައުދީ ޓީމު ވޯލްޑް ކަޕުން ކެޓުމުގެ ޒިންމާ އުފުލާ، ފުޓްބޯޅަ ފެޑެރޭޝަންގެ ރައީސް އިސްތިއުފާ ދެއްވައިފި

ސައުދީ އަރަބިއްޔާގެ ފުޓްބޯޅަ ފެޑެރޭޝަން (އެސް.އޭ.އެފް.އެފް) ގެ ރައީސް ޔާސިރު އަލް މިސްހަލް، އެ މަގާމުގައި އިތުރަށް ދެމިނުހުންނަވާނެކަން ހޯމަ ދުވަހު އިއުލާނު ކުރައްވައިފި އެވެ. ސައުދީ ފުޓްބޯޅައިގެ އެންމެ އިސްވެރިޔާގެ ގޮތުގައި ހަތް އަހަރު ހޭދަކުރެއްވުމަށްފަހު އޭނާ މި ނިންމެވުން ނިންމެވީ، 2026 ވަނަ އަހަރުގެ ފީފާ ވޯލްޑް ކަޕްގެ ގްރޫޕް ސްޓޭޖުން ކަޓައި، މުބާރާތުގެ ގަދަ 16 އަށް ސައުދީ ގައުމީ ޓީމަށް ދަތުރުނުކުރެވުމުގެ ޒިންމާ އުފުއްލެވުމުގެ ގޮތުންނެވެ.

އަލް މިސްހަލް ނެރުއްވި ބަޔާނެއްގައި ވިދާޅުވީ، ސައުދީ ގައުމީ ޓީމުގެ ވޯލްޑް ކަޕް ކެމްޕޭނަށް ކުރިމަތިވި ނާކާމިޔާބީގެ "ފުރިހަމަ ޒިންމާ" އޭނާ އުފުއްލަވާ ކަމަށެވެ. އަދި މުބާރާތުގެ ނަތީޖާ ހުރީ އުންމީދުކުރި މިންވަރަށްވުރެ ދަށުގައިކަން ގަބޫލުކުރައްވައި، ސައުދީގެ ފުޓްބޯޅަ ސަޕޯޓަރުންގެ ކިބައިން އޭނާ ވަނީ މައާފަށް އެދިވަޑައިގެންފަ އެވެ.

ޒިންމާދާރުވުމުގެ ގޮތުން އާ ފަރާތްތަކަކަށް ފުރުސަތު ދޭންޖެހޭނެ ކަމަށް ގަބޫލުކުރައްވާތީ، މިހާރު އޮތް ބޯޑުގެ ދައުރު ހަމަވުމުގެ ކުރިން މަގާމުން ދުރުވާން ނިންމެވީ ކަމަށް އޭނާ ވިދާޅުވި އެވެ.

އަލް މިސްހަލް ވިދާޅުވި ގޮތުގައި، ކަނޑައެޅިފައިވާ ގަވާއިދުތަކާއި އުސޫލުތަކާ އެއްގޮތްވާ ގޮތުގެ މަތިން، ފެޑެރޭޝަނަށް އާ ޑިރެކްޓަރުންގެ ބޯޑެއް އިންތިޚާބު ކުރުމަށްޓަކައި ކުރިމަތިލުމުގެ ފުރުސަތު ހުޅުވާލުމުގެ މަސައްކަތް ވަގުތުން ފެށޭނެ އެވެ.

ސައުދީ ފުޓްބޯޅައަށް ޚިދުމަތް ކުރުމަށާއި، ގައުމާއި ސަޕޯޓަރުންގެ އުންމީދުތައް ހާސިލުކޮށްދިނުމަށް މިހާރުގެ ބޯޑުން ކުރެވެން ހުރި ހުރިހާ މަސައްކަތެއް ކުރި ކަމަށް އޭނާ ވިދާޅުވި އެވެ. ނަމަވެސް ވޯލްޑް ކަޕްގެ ދެވަނަ ބުރަށް ޓީމަށް ދަތުރުނުކުރެވުމަކީ އޭގެ ޒިންމާ އުފުލަންޖެހޭނެ ކަމެއްކަން އޭނާ ފާހަގަކުރެއްވި އެވެ.

ބަޔާން ނިންމަވާލައްވަމުން އޭނާ ވިދާޅުވީ، އޭނާއަކީ އަބަދުވެސް ސައުދީ އަރަބިއްޔާއަށް ވަފާތެރި ޚިދުމަތްތެރިއެއްގެ ގޮތުގައި ދެމިހުންނަވާނެ މީހެއް ކަމަށާއި، ކޮންމެ ދާއިރާއަކުން ނަމަވެސް ސައުދީގެ ކުޅިވަރު ކުރިއެރުވުމަށް އެހީތެރިކަން ދެއްވާނެ ކަމަށެވެ. އަދި ފެޑެރޭޝަނާ ދެން ހަވާލުވާ އާ ބޯޑަށް އޭނާ ވަނީ ކާމިޔާބީއަށް އެދިވަޑައިގެންފަ އެވެ.

2026 ވަނަ އަހަރުގެ ފީފާ ވޯލްޑް ކަޕްގައި ސައުދީ އަރަބިއްޔާ ކުޅުނު ތިން މެޗުން ލިބުނު ދެ ޕޮއިންޓާއެކު، އެ ޓީމުގެ ދަތުރު ވަނީ ގްރޫޕް ސްޓޭޖުން ނިމުމަކަށް އައިސްފަ އެވެ. ގްރޫޕް އެޗްގައި ހިމެނުނު ސައުދީން ކުޅުނު ފުރަތަމަ މެޗުގައި އުރުގުއާއީއާ ވާދަކޮށް 1-1 އިން އެއްވަރުވިއިރު، ދެވަނަ މެޗުގައި ސްޕެއިން އަތުން ވަނީ 4-0 އިން ބަލިވެފަ އެވެ. އަދި ގްރޫޕްގެ ފަހު މެޗުގައި މުބާރާތުގައި އަލަށް ވާދަކުރި ކޭޕް ވާޑް އާ ބައްދަލުކޮށް ލަނޑެއް ނުޖެހި އެއްވަރުވުމުން، ސައުދީއަށް ލިބުނީ ގްރޫޕްގެ ހަތަރުވަނަ އެވެ.

މި ނަތީޖާއާއެކު، އެންމެ ފަހުން ބޭއްވި ވޯލްޑް ކަޕްގެ ހަ މުބާރާތުގައިވެސް ސައުދީ އަރަބިއްޔާއަށް ވަނީ ގްރޫޕް ސްޓޭޖުން ކުރިއަށް ނުދެވި ކަޓަންޖެހިފަ އެވެ. ސައުދީން ވޯލްޑް ކަޕްގެ ގަދަ 16 އަށް ދަތުރުކުރި ހަމައެކަނި ފަހަރަކީ، 1994 ވަނަ އަހަރު އެމެރިކާގައި ބޭއްވި މުބާރާތުގައި އެ ގައުމުން އަލަށް ވާދަކުރި އަހަރެވެ.