އަލްޖީރިއާ އާއި އޮސްޓްރިއާ މެޗް އެއްވަރުވުން - ރޭވުމެއްތަ؟

އަލްޖީރިއާ އާއި އޮސްޓްރިއާ އިން މިއަހަރުގެ ވޯލްޑް ކަޕް ގައި އެންމެ ފަހުން ކުޅުނު 'އާދަޔާ ޚިލާފް' އެއްވަރުވި މެޗުގެ ދިފާއުގައި އެ ދެ ގައުމުން ވާހަކަދައްކައިފި އެވެ.

1982 ވަނަ އަހަރު ސްޕެއިންގައި ބޭއްވި ވޯލްޑް ކަޕްގައި ކުޅުނު 'ޑިސްގްރޭސް އޮފް ގިޖޯން'  ނަމުން އާންމުވި ލަދުވެތި މެޗުގެ ބަދުނާމު، ވޭތުވެދިޔަ 44 އަހަރު ވަންދެން އޮސްޓްރިއާ އާއި އަލްޖީރިއާގެ ބޮލުގައި ވަނީ އެޅިފަ އެވެ.

އެ މެޗުގައި ފާޑުކިޔުން އަމާޒުވީ، ނަތީޖާ އޮތްގޮތުން ދެ ގައުމަށް ވެސް ފައިދާވާތީ، މާ ބޮޑު ވާދަވެރިކަމެއް ނެތި ދެ ޓީމުން ވެސް ވަގުތު ބޭކާރުކޮށްލި ކަމަށް ބެލެވުމުންނެވެ.

މިހާރު ކުރިއަށްދާ 2026 ވަނަ އަހަރުގެ ވޯލްޑް ކަޕްގެ ގްރޫޕް ޖޭގެ ފަހު މެޗުގައި އަލްޖީރިއާ އާއި އޮސްޓްރިއާ ބައްދަލުކުރިއިރު، މެޗު އެއްވަރުވެއްޖެ ނަމަ އީރާން ކަޓައި، މި ދެ ގައުމަށް މުބާރާތުގެ ދެވަނަ ބުރަށް ދެވޭނެކަން އޮތީ އެނގިފަ އެވެ.

އާދީއްތަ ދުވަހުގެ ހެނދުނު ކުޅުނު މި މެޗު 3-3 އިން އެއްވަރުވުމާއެކު، އޮސްޓްރިއާ ގްރޫޕްގެ ދެވަނަ ހޯދިއިރު، އަލްޖީރިއާ ވަނީ ތިންވަނަ ހޯދި އެންމެ ރަނގަޅު ޓީމުތަކުގެ ތެރޭގައި ހިމެނިގެން އަނެއް ބުރަށް ދަތުރުކޮށްފަ އެވެ.

ނަމަވެސް، މިއީ 'ގިޖޯންގެ ލަދުވެތި މެޗު' ތަކުރާރުވުން ކަމަށް ބުނާ ވާހަކަތައް ދެ ގައުމުން ވެސް ވަނީ ހަރުކަށި އިބާރާތުން ދޮގުކޮށްފަ އެވެ. އެހެންނަމަވެސް، މެޗުގެ އިތުރު ވަގުތުގައި ޖެހި ދެ ގޯލާއެކު މެޗު ނިމުނު ގޮތުން، މިއީ ކުރިން ރޭވިފައިވާ ކަމެއް ކަމަށް ބައެއް ފަރާތްތަކުން ދަނީ ތުހުމަތު ކުރަމުންނެވެ.

ރޭވުމަކަށް ވުމަށްވުރެ މާ ފުރިހަމައީ ހެއްޔެވެ؟ މެޗުގައި ހިނގީ ކޮން ކަމެއް؟

މެޗުގެ 28 ވަނަ މިނެޓުގައި މާކޯ އާނައުޓޮވިޗް ޖެހި ލަނޑުން އޮސްޓްރިއާ އިން ލީޑު ނެގި އެވެ.

މެޗުގެ 45 ވަނަ މިނެޓުގައި ރަފީގް ބެލްގާލީ ޖެހި ލަނޑުން އަލްޖީރިއާ އިން ނަތީޖާ 1-1 އަށް އެއްވަރުކުރި އެވެ.

މެޗުގެ 55 ވަނަ މިނެޓުގައި މާސެލް ސަބިޓްޒާ ޖެހި ލަނޑުން އޮސްޓްރިއާ އިން ދެވަނަ ފަހަރަށް ލީޑު ނެގި އެވެ.

އޭގެ ފަސް މިނެޓު ފަހުން ރިޔާޒް މަހްރޭޒް ޖެހި ލަނޑުން އަލްޖީރިއާ އިން އަލުން ނަތީޖާ ހަމަހަމަކުރި އެވެ.

މެޗުގެ 93 ވަނަ މިނެޓުގައި އަލްޖީރިއާގެ ކެޕްޓަން މަހްރޭޒް ޖެހި ލަނޑާއެކު އެ ޓީމު މޮޅުވާނެ ކަމަށް ބެލެވުނެވެ. މި ނަތީޖާއާއެކު އޮސްޓްރިއާ މުބާރާތުން ކަޓައި، މިސްރާ 1-1 އިން އެއްވަރުކުރި އީރާނަށް އަނެއް ބުރަށް ދިއުމުގެ ފުރުސަތު ލިބުނީހެވެ.

ނަމަވެސް މެޗު ނިމެން ސިކުންތުކޮޅަކަށް ވެފައި ވަނިކޮށް، 96 ވަނަ މިނެޓުގައި ސާސާ ކަލައިޖިޗް ބޮލުން ޖެހި ލަނޑާއެކު 3-3 އިން މެޗު އެއްވަރުވެ، ދެ ޓީމު ވެސް ނޮކައުޓް ސްޓޭޖަށް ދަތުރުކުރި އެވެ.

ކުރެވޭ ތުހުމަތުތަކަކީ ކޮބައި؟

މި ނަތީޖާއާ ގުޅިގެން އީރާނުގެ ގިނަ ސަޕޯޓަރުން ވަނީ މިއީ ރޭވިގެން ހިނގި ކަމެއްކަމަށް ބުނެ، މި މެޗު ތަހުގީގު ކުރުމަށް ފީފާއަށް ގޮވާލާފަ އެވެ. އަދި މެޗުގެ ބައެއް މަންޒަރުތައް ސޯޝަލް މީޑިއާގައި ހިއްސާކޮށް، މިއީ ރޭވުމެއްގެ ދަށުން ހިނގި ކަމެއް ކަމަށް ބުނެ ފުޓްބޯޅަ ސަޕޯޓަރުން ދަނީ ބަހުސް ކުރަމުންނެވެ.

އަލްޖީރިއާ އިން ނަތީޖާ އެއްވަރު ކުރަންދެން އޮސްޓްރިއާގެ ކުޅުންތެރިން ދަނޑުމަތީގައި "ހިނގާލާފައި" އުޅުނު ކަމަށް ތުހުމަތު ކުރެވުނެވެ. ބައެއް ސަޕޯޓަރުން މިއީ "ލަދުވެތި" ކަމެއް ކަމަށާއި، މިއީ "މިހާތަނަށް ފެނުނު އެންމެ ބޮޑަށް ރޭވިފައިވާ މެޗު" ކަމަށް ބުނެފައިވާއިރު، އަނެއް ބަޔަކު މިއީ "ބޮޑު ސްކޭމެއް" ކަމަށް ސިފަކޮށްފައިވެ އެވެ.

މެޗު ފެށިގެން ދިޔައީ ވަރަށް ފިނިކޮށެވެ. މެޗުގެ ފުރަތަމަ 30 މިނެޓު ތެރޭގައި ގޯލާ އަމާޒުކޮށް ފޮނުވާލެވުނު ހަމައެކަނި ހަމަލާއަކީ އާނައުޓޮވިޗް ޖެހި ގޯލެވެ.

ނަތީޖާ 2-2 ގައި އޮތްއިރު، މޮޅުވާން މަސައްކަތް ކުރުމުގެ ބަދަލުގައި ދެ ޓީމުން ވެސް ވަގުތު ބޭކާރުކުރި ކަމަށް ބެލެވޭ ވީޑިއޯ ކްލިޕްތަކެއް ސޯޝަލް މީޑިއާގައި ދަނީ ދައުރުވަމުންނެވެ.

މަހްރޭޒްގެ ދެވަނަ ލަނޑަށްފަހު، ދެ ޓީމުގެ ބެންޗުގައި ތިބި އޮފިޝަލުންގެ މެދުގައި ހިނގި ހަމަނުޖެހުމަކީ، އެއްވަރުވާން އޮތް ނަތީޖާއަށް ބަދަލު އައުމުން ހިނގި ކަމެއް ކަމަށް ބައެއް ފަރާތްތަކުން ބުނެ އެވެ.

އަދި އަލްޖީރިއާގެ އައިސާ މަންޑީ، މަހްރޭޒްގެ ކައިރީގައި އަނގަމަތީގައި އަތްއަޅައިގެން ހުރެ ވާހަކަދައްކާ މަންޒަރު ފެންނަ ވީޑިއޯއަކާ ގުޅިގެން ސަޕޯޓަރަކު ބުނީ، އެ މެޗުން މޮޅުވެއްޖެ ނަމަ ދެވަނަ ބުރުގައި ސްވިޒަލޭންޑުގެ ބަދަލުގައި ކުޅެން ޖެހޭނީ ސްޕެއިންއާ ކަމަށް މަހްރޭޒް ގާތު ބުނި ކަމަށެވެ. އޭގެ ކުޑަވަގުތުކޮޅެއް ފަހުން އޮސްޓްރިއާ އިން ވަނީ ނަތީޖާ އެއްވަރުކޮށްފަ އެވެ.

'އަލްފްރެޑް ހިޗްކޮކް ފަދަ ލިޔުންތެރިއަކު މިފަދަ ޑްރާމާއެއް ލިޔުނު ނަމަވެސް، އޭނާއަކީ މޮޔައެއް ކަމަށް އަހަރެން ބުނާނަން'

އޮސްޓްރިއާގެ ކޯޗު ރަލްފް ރަންގްނިކް ބުނީ، މިއީ ކުރިން ރޭވިގެން އެއްވަރުކުރި މެޗެއް ކަމަށް ބުނުމަކީ "މޮޔަ" ވާހަކައެއް ކަމަށެވެ.

ކެންސަސް ސިޓީގައި ކުޅުނު މި މެޗުގެ ފަހު 15 މިނެޓުގައި ކަންތައް ހިނގާދިޔަ ގޮތުން، އެއްވެސް ޓީމަކުން 'ގިޖޯންގެ ލަދުވެތި މެޗު' ތަކުރާރުކުރަން ބޭނުންނުވާކަން ސާފުވާ ކަމަށް އޭނާ ބުންޏެވެ.

"މި މެޗުގައި 3-3 އިން ނަތީޖާ އެއްވަރުވުމުން، މިއީ ދެބަސްވުމެއް ނެތި ރޭވިގެން ހިނގި ކަމެއް ކަމަށް އެކަކަށް ވެސް ނުބުނެވޭނެ. ހާއްސަކޮށް މެޗުގެ ފަހު 90 ސިކުންތު ތެރޭގައި ފެނުނު ކަންތައްތަކަށް ބަލާއިރު،" ރަންގްނިކް ބުންޏެވެ.

"މެޗު ނިމެން ތިން މިނެޓަށް ވެފައި ވަނިކޮށް، މިފަދަ ކަމެއް ހިނގާނެ ކަމަށް މީހަކު ބުނި ނަމަ، އެއީ މޮޔައެއް ކަމަށް ބުނެވޭނީ."

"އަހަރެން ކޯޗެއްގެ ގޮތުގައި މަސައްކަތް ކުރާތާ 40 އަހަރު ވެއްޖެ. މިހާ ފޯރިގަދަ އަދި މިހާ ހީނުކުރާ ފަދަ ގޮތަކަށް ބަދަލުވެގެންދިޔަ މެޗެއް އަހަރެން ހަނދާނެއް ނެތް."

"ގިނަ ބަޔަކު ހީކުރީ މެޗު 0-0 ނުވަތަ 1-1 އިން އެއްވަރުވާނެ ކަމަށް. އެކަމަކު މިހާރު މިއޮތީ 3-3 ވެފައި. މިއީ ގަބޫލުކުރަން ވެސް ދަތި ކަމެއް. ޗޭންޖިން ރޫމް ތެރޭގައި ވެސް އޮތީ ހައިރާންކަން. އަލްފްރެޑް ހިޗްކޮކް ފަދަ ލިޔުންތެރިއަކު މިފަދަ ޑްރާމާއެއް ލިޔުނު ނަމަވެސް، އޭނާއަކީ މުޅިން މޮޔައެއް ކަމަށް އަހަރެން ބުނާނަން."

އަލްޖީރިއާގެ މެނޭޖަރު ވްލަޑިމިއާ ޕެޓްކޮވިޗް ވެސް ވަނީ މިއީ ރޭވުމެއް ކަމަށް ދެކެވޭ ވާހަކަތައް ދޮގުކޮށްފަ އެވެ.

"އަހަރެން ވަރަށް އުފާވޭ މެޗުގެ ނަތީޖާއާ މެދު. އެންމެ ފަހުން ފުޓްބޯޅަ ކުރި ހޯދައިފި. 3-3 ގެ ނަތީޖާއިން ހުރިހާ ކަމެއް ސާފުކޮށްދީފި،" އޭނާ އިތުރަށް ބުންޏެވެ.

މުބާރާތުގެ ގަދަ 32 ޓީމުގެ ބުރުގައި، ޖުލައި 2 ވާ ބުރާސްފަތި ދުވަހު ލޮސް އެންޖެލިސްގައި އޮސްޓްރިއާ ނުކުންނާނީ ސްޕެއިންއާ ދެކޮޅަށެވެ. އަދި ޖުލައި 3 ވާ ހުކުރު ދުވަހު ވެންކޫވަރުގައި އަލްޖީރިއާ ބައްދަލުކުރާނީ ސްވިޒަލޭންޑާ އެވެ.