އޭސީސީއަކީ އުފަންވީއްސުރެ ބޭކާރު ތަނެއް، މިހާތަނަށް އެކޮމިޝަނުން ބަލަމުން ދަނީ ކުރީ ސަރުކާރުތަކުގެ މައްސަލަތައް: އަލީ ހުސެއިން
ގާނޫނީ ވަކީލު އަލީ ހުސައިން ވިދާޅުވީ، އޭސީސީއަކީ މިނިވަންކަމާއެކު މަސައްކަތްނުކުރާ ބޭކާރު މުއައްސަސާއެއްގެ ގޮތުގައި ސިފަކުރައްވައި، އެ ކޮމިޝަނުން އަބަދުވެސް ބަލަނީ ކުރީގެ ސަރުކާރުތަކުގެ މައްސަލަތައް ކަމަށް. އޭސީސީގެ މެންބަރުންނަކީ ސީދާ ރައްޔިތުންގެ ވޯޓުން ހޮވާ ބަޔަކަށް ހަދައިގެން ނޫނީ އެ މުއައްސަސާ މިނިވަން ނުކުރެވޭނެ ކަމަށާއި، މިހާރު އޮތް ނިޒާމުގެ ތެރެއިން އެ ކޮމިޝަނުން މަސައްކަތް ކުރަނީ ސަރުކާރުން އަންގާ ގޮތަށް ކަމަށް އޭނާ ފާހަގަކުރެއްވި.
އެންޓި ކޮރަޕްޝަން ކޮމިޝަން ހިންގާ އޮފީސް އިމާރާތް. މިސަރުކާރާ ގުޅުންހުރި ގިނަ މައްސަލަތައް އެކޮމިޝަނަށް ހުށަހެޅި ނަމަވެސް ތަހުގީގު ކުރިއަށް ނުގެންދާ ކަމަށް މައްސަލަ ހުށަހަޅާ މީހުން ތުހުމަތު ކުރޭ. | ރާއްޖެއެމްވީ
އެންޓި ކޮރަޕްޝަން ކޮމިޝަން (އޭސީސީ)އަކީ އުފަންވީއްސުރެ ބޭކާރު ތަނެއް ކަމަށާއި، މިހާތަނަށް އެކޮމިޝަނުން ބަލަމުން ދަނީ ކުރީ ސަރުކާރުތަކުގެ މައްސަލަތައް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އަލީ ހުސެއިން ވަނީ އޭސީސީ އަށް ވަރަށް ބޮޑަށް ފާޑު ވިދާޅުވެފަ އެވެ. 16 އޮކްޓޫބަރު 2008 ގައި އޭސީސީ އުފައްދާފައިވާއިރު، މިހާތަނަށް މިނިވަންކަމާއެކު އެ ކޮމިޝަނުން މަސައްކަތް ނުކުރާ ކަމަށް އޭނާ ވިދާޅުވި އެވެ. އަދި ވިދާޅުވީ އަބަދުވެސް ބަލަމުން ދަނީ ކުރީ ސަރުކާރުތަކުގެ މައްސަލައާއި، ކުރީގެ ވަޒީރުންގެ މައްސަލަތައް ކަމަށެވެ.
އަލީ ހުސެއިން ވިދާޅުވީ ބޮޑެތި ކޮރަޕްޝަންގެ މައްސަލަތައް ވެސް ފުލުހުންގެ މުއައްސަސާއިން ތަހުގީގު ކުރާ އުސޫލުން އޭސީސީއަށް ތަހުގީގު ކުރެވެން ޖެހޭ ކަމަށެވެ. ނަމަވެސް މިއަދާ ހަމައަށް ގެއްލުނު އެއްވެސް ފައިސާއެއް އެކޮމިޝަނަށް ހޯދިފައިނުވާ ކަމަށް އޭނާ ވިދާޅުވި އެވެ.
ރައީސް ޑރ.މުހައްމަދު މުއިއްޒުގެ ސަރުކާރަށް އިޝާރާތް ކުރައްވައި އަލީ ހުސެއިން ވިދާޅުވީ ސަރުކާރު ހިންގާ ޕާޓީއަށް ރައްޔިތުންގެ މަޖިލީހުގެ މެޖޯރިޓީ ދިނުމުން އެ ލިބުނީ ރަސްކަން ކުރުމުގެ ފުރުސަތު ކަމަށެވެ. މިހާރު ހިންގަމުންދަނީ ރަސްކަމެއް ކަމަށާއި، އޭސީސީގެ މެންބަރުން ވެސް މަސައްކަތް ކުރަން ޖެހޭނީ ސަރުކާރުން އެންގި ގޮތަކަށް ކަމަށް އޭނާ ވިދާޅުވި އެވެ. އަދި ވިދާޅުވީ އެކަން އޭސީސީގެ މެންބަރުންނަށް ވެސް ގަބޫލުކުރާ ކަމަށެވެ.
އޭސީސީއަކީ މިނިވަން މުއައްސަސާއެކޭ ކިޔަސް އަޅުގަނޑު ގަބޫލެއް ނުކުރަން ދިވެހިރާއްޖޭގެ އޭސީސީއަކީ މިނިވަންތަނެއް ކަމަކަށް. އަދި މިގޮތަށް ގާނޫނު އަސާސީގައި މިހާރު މިއޮތް ގޮތަށް އޮވެގެން އޭސީސީ މިނިވަން ކުރެވޭނެ ކަމަށް އަޅުގަނޑު ގަބޫލެއް ނުކުރަން. އަޅުގަނޑު ގަބޫލުކުރާ ގޮތުގައި އެންޓި ކޮރަޕްޝަން ކޮމިޝަންގެ މެންބަރުން ހޮވަން ވެސް ޖެހޭނީ ސީދާ ރައްޔިތުންގެ ވޯޓުން ހޮވަން ޖެހޭނީ. އެމީހުންނަކީ ވެސް ރައްޔިތުންގެ ވޯޓުން ހޮވާ އަދި ރައްޔިތުންގެ ވޯޓަކުން ވަކި ކުރާ ބަޔަކަށް ހަދައިގެން ނޫނިއްޔާ އޭސީސީގެ މެންބަރުން މިނިވަން ނުވާނެ.
މީގެ އިތުރުން އަލީ ހުސެއިން ވިދާޅުވީ ޕްރޮސެކިއުޓަރ ޖެނަރަލް އޮފީސް (ޕީޖީ) އަށް އޭސީސީ އަށް ވަކި މައްސަލައެއް ވަކި ގޮތަށް ބެލުމަށް ނުވަތަ އަވަސް ކުރުމަށް ނޭންގޭނެ ކަމަށެވެ. ނަމަވެސް މިކަން ވެސް ކުރަމުންދަނީ ވަރަށް ފާޅުކަން ބޮޑު ގޮތެއްގައި ކަމަށް އޭނާ ވިދާޅުވި އެވެ.
އަލީ ހުސެއިން ވިދާޅުވީ މިހާރުގެ ހާލަތަށް ބަލާއިރު، އެކޮމިޝަން މިނިވަން ކުރެވެން ވެސް ނެތް ކަމަށެވެ.
އެހެންކަމުން އޭސީސީއަކީ ކޮންމެ އަހަރަކު ވެސް ރައްޔިތުންގެ ފައިސާއިން އެތައް މިލިއަނުން ހަރަދު ކުރާ ބޭކާރު މުއައްސަސާއެއް ކަމަށް އޭނާ ވިދާޅުވި އެވެ.
