އިޤްތިޞާދު ހަރުދަނާ ކުރުމާއި މަސައްކަތުގެ އަޚުލާގު ކުރިއެރުވުމަށް ކުންފުނިތައް އެންމެ ރަނގަޅު މިންގަޑަކަށް ބަދަލު ކުރުމާއި ޕޭ ހާމަނައިޒްކުރުން މުހިންމު - ރައީސް މުއިއްޒު
ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރަ އެއްހަމަކުރުމާއި، ކުންފުނިތަކަށް އެންމެ އެކަށީގެންވާ މިންވަރަށް މުވައްޒަފުން ބޭތިއްބުމަކީ އިޤްތިޞާދު ހަރުދަނާކޮށް ޚަރަދު ކުޑަކުރުމަށް އަޅާ މުހިންމު ފިޔަވަޅުތަކެއް ކަމަށް ރައީސުލްޖުމްހޫރިއްޔާ ވިދާޅުވެއްޖެ. މި ބަދަލުތަކުގެ ސަބަބުން މަސައްކަތުގެ އަޚުލާޤު ރަނގަޅުވެ، މުވައްޒަފުންނަށް ލިބޭ އާމްދަނީ އިތުރުވާނެކަން ފާހަގަކުރައްވަމުން، މިއީ ސިޔާސީ ނުފޫޒުން މީހުން ވަކިކުރުން ނޫންކަމުގެ ޔަޤީންކަން އެމަނިކުފާނު ދެއްވި. މީގެ އިތުރުން، ރާއްޖޭގެ ދަރަނިތައް ދައްކާ ޚަލާސްކުރުމާއެކު އިޤްތިޞާދު ނެގެހެއްޓުމުގެ މަސައްކަތް ސާބިތުކަމާއެކު ކުރިއަށްދާނެ ކަމަށްވެސް ރައީސް ވިދާޅުވި.
ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް މުއިއްޒު ވާހަކަފުޅު ދައްކަވަނީ | ރައީސް އޮފީސް
އިޤްތިޞާދު ހަރުދަނާކުރުމާއި މަސައްކަތުގެ އަޚުލާގު ކުރިއެރުވުމަށް، ކުންފުނިތައް އެންމެ ރަނގަޅު މިންގަނޑަކަށް ބަދަލު ކުރުމާއި ޕޭ ހާމަނައިޒްކުރުން މުހިންމުކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެ އެވެ.
އެމަނިކުފާނު މި މޭރުމުން ވާހަކަފުޅުދައްކަވާފައި ވަނީ، ސިލްސިލާ ގޮތެއްގައި ކުރިއަށް ގެންދަވާ ނޫސްވެރިންގެ ބައްދަލުވުންތަކުގެ ތެރެއިން، ރައީސުލްޖުމްހޫރިއްޔާގެ އޮފީހުގައި ހޯމަ ދުވަހު ހެނދުނު އޮތް ނޫސްވެރިންގެ ބައްދަލުވުމުގައި ނޫސްވެރިން ކުރި ސުވާލުތަކަށް ޖަވާބުދެއްވަމުންނެވެ.
ޕޭ ހާމަނައިޒްކުރުމާއި، ސަރުކާރު ހިއްސާވާ ކުންފުނިތަކުގެ މުވައްޒަފުންގެ ޢަދަދަކީ، އެ ކުންފުންޏަކަށް އެންމެ އެކަށީގެންވާ ޢަދަދުކަމުގައި ކަށަވަރު ކުރުމަށް ޤައުމީ ފެނަވަރުގައި އަޅަމުންދާ ފިޔަވަޅުތަކާ ބެހޭ ގޮތުން ނޫސްވެރިން ކުރެއްވި ސުވާލުތަކަށް ޖަވާބުދެއްވަމުން ރައީސުލްޖުމްހޫރިއްޔާ ވިދާޅުވީ، ޕޭ ހާމަނައިޒްކުރައްވާ އެންމެ މުހިންމު މަޤްޞަދުތަކުގެ ތެރޭގައި، ގެއަށް ގެންދަން ލިބޭ އާމްދަނީގެ މިންވަރު ބޮޑުކުރުމާއި، މަސައްކަތުގެ އަޚްލާގު ހަރުދަނާކުރުން ހިމެނޭކަމުގަ އެވެ. އަދި އިޤްތިޞާދު ހަރުދަނާކުރުންވެސް މި މަޤްޞަދުތަކުގެ ތެރޭގައި ހިމެނޭކަން ރައީސް މުއިއްޒު ފާހަގަކުރެއްވި އެވެ. ޕޭ ހާމަނައިޒޭޝަނާ ގުޅުންހުރި ކަންކަން ތަންފީޒުވަމުންދާއިރު، ވަކިވަކީން ރިޢާޔަތްކުރަންޖެހޭ ކޭސްތައްވެސް އެބަހުރިކަމަށާ، އެކަންކަން އެގޮތުގައި ބައްލަވައިގެން ކުރިއަށްގެންދެވުމަށް ކަމާބެހޭ ފަރާތްތަކަށް އަންގަވާފައިވާނޭކަމުގައި ރައީސުލްޖުމްހޫރިއްޔާ ވިދާޅުވި އެވެ.
ހަމަމިއާއެކު، ކުންފުނިތައް ރައިޓް-ސައިޒް ކުރުމަށް ނުވަތަ އެ ކުންފުންޏަކަށް އެކަށީގެންވާ މިންވަރަށް މުވައްޒަފުން ބޭތިއްބުމަށް ކުރެވޭ މަސައްކަތްތަކަކީ އަޚުލާޤީ ގޮތުން ވަކި ހަމަތަކަކާއި ފެންވަރެއް ހިފެހެއްޓުމަށް ކުރެވޭ ކަމެއްކަމަށާ، މިކަމުގެ ސަބަބުން ޚަރަދުތަކެއްވެސް ކުޑަކުރެވިގެންދާކަމުގައި އެމަނިކުފާނު ފާހަގަކުރެއްވި އެވެ. އަދި މިކަންކަން މިފަދައިން ކުރެއްވުމަކީ، ސިޔާސީ ނުފޫޒުން ބަޔަކު ވަޒީފައިން ވަކި ކުރުން ކަމުގައި ބުނާނެ ޖާގައެއް ނޯންނާނެކަމުގެ ޔަޤީންކަންވެސް އެމަނިކުފާނު ވަނީ މިއަދުގެ ނޫސްވެރިންގެ ބައްދަލުވުމުގައި ދެއްވާފަ އެވެ.
ސަރުކާރުން އަޅުއްވަމުން ގެންދަވާ މިފަދަ ފިޔަވަޅުތަކަކީ، އެ ދާއިރާ އިތުރަށް ހަރުދަނާކުރުމަށް ކުރެވޭ މަސައްކަތަކަށް ވާއިރު، ބޭރުގެ ޤައުމުތަކަށް ދިވެހިރާއްޖެއިން ދައްކަންޖެހޭ ދަރަނި ދައްކާ ޚަލާސްކުރުމަކީވެސް ނުހަނު މުހިންމު، އަދި ފަރުދީ ފެންވަރެއްގައި ރައްޔިތުންނާ ގުޅިފައި އޮންނަކަމެއްކަން ރައީސް ފާހަގަކުރެއްވި އެވެ. މިމޭރުމުން އެމަނިކުފާނު ވަނީ، ދިވެހިރާއްޖޭގެ އިޤްތިޞާދީ މަސްރަޙުގައި އަދު ކަންހިނގަމުންދާ ގޮތަށް ރިޢާޔަތްކުރައްވާ، އިޤްތިޞާދު ހަރުދަނާކޮށް ނެގެހެއްޓުމުގެ މަސައްކަތްތައް ސާބިތުކަމާއެކު ކުރިއަށްދާނެކަމުގެ ޔަޤީންކަންދެއްވާފަ އެވެ.
މަސްދަރު: ރައީސް އޮފީސް
