ވައުދާ ހުވާ ކުރާނެއޭ، އެ ހަނދާން ނެތޭނެޔޭ.. ނޫނީ އެހެން ގޮތެއްގާ، މަޖުބޫރުވާނެޔޭ...

ހޯމަ ދުވަހު އޮތް ނޫސްވެރިންގެ ބައްދަލުވުމުގައި ރައީސް ޑރ. މުޙައްމަދު މުއިއްޒު ދެއްކެވި ވާހަކަފުޅާއެކު އަޅުގަނޑުގެ ހިޔާލުގައި އެނބުރެމުންދިޔައީ ލަސްޓަރ ބޭންޑުގެ ޢަބްދުއްރާފިޢު 1990 ގެ އަހަރުތަކުގައި ނެރުނު "ލޯބި ލޯބިން" މި ލަވައިގެ ޅެން ބައިތެކެވެ.  

ވައުދާ ހުވާ ކުރާނެޔޭ، އެ ހަނދާން ނެތޭނެޔޭ

ނޫނީ އެހެން ގޮތެއްގާ، މަޖުބޫރުވާނެޔޭ،

ވައުދަށް ކަމޭ ހިތާނަމޭ ބުނެފާ ނުވޭހޭ؟

އެހެން ނުވާންވީ ސަބަބެއް ވެސް ނެތެވެ. ރައީސްއާ އަމާޒުވި ސުވާލަކީ ރިޔާސީ އިންތިޚާބުގެ ކެމްޕޭނުގެ ތެރޭގައި ވަޒީފާތަކުން މީހުން ވަކި ނުކުރާނެކަމަށް 200 އެތައް ފަހަރަކު ވިދާޅުވެފައި ވެސް އެކަން ތިޔަ ކުރައްވަނީ ކީއްވެތޯއެވެ؟ ވައުދާ ޚިލާފު ތިޔަ ވަނީ ކީއްވެތޯއެވެ؟

އެ ސުވާލުގެ ޖަވާބުގައި ރައީސް ވިދާޅުވީ ހަމަ ލަވައިގައި އެ ދޭ ކަހަލަ ޖަވާބެކެވެ. އެކިއެކި ބަހަނާތައް ދެއްކެވުމަށް ފަހު ރައީސް ވިދާޅުވީ ވަޒީފާއިން މީހުން ވަކި ކުރަނީ ކޮންމެހެން ކުރަން ޖެހިގެންކަމަށެވެ. އެނޫން ގޮތެއް ނެތް ކަމަށާއި، އެއީ އެންމެ ފައިދާހުރި ގޮތް ކަމަށެވެ.

200 ފަހަރު ވައުދާ ހުވާކޮށްފައި ވެސް ރައީސް އެ ވައުދުގެ މަތިން ހަނދާން ނެތީތޯއެވެ؟ ނޫނީ ހަމަ ހަގީގަތުގައި ވެސް އާދައިގެ ނިކަމެތި ރައްޔިތުން ފުލުފުލުގައި ވަޒީފާއިން ވަކިކުރަން ސަރުކާރަށް މަޖުބޫރުވީތޯއެވެ؟

އެތައް މުވައްޒަފުންނެއް ވަޒީފާއިން ވަކި ކުރަމުންދާއިރު ވެސް، ރައީސުލްޖުމްހޫރިއްޔާ މި ވިދާޅު ވަނީ މުވައްޒަފުން ވަކިކުރުމަކީ ކުރިން ވެވަޑައިގެންނެވި ވައުދާ ފުށުއަރާ ކަމެއްގެ ގޮތުގައި ދެކިގެން ނުވާނެ ކަމަށެވެ.

ހާހުން ގުނާލެވޭ އެތައް ދިވެހި ރައްޔިތުންނަކަށް މި ދެންނެވި ވަޒީފާއަކީ ހަމައެކަނި އަދާކުރާ މަސައްކަތެއް ނޫނެވެ. އެއީ މަސް ނިމޭއިރު ގަވާއިދުން ދައްކަންޖެހޭ ކުއްޔާއި، ދަރިންގެ ސްކޫލް ފީއާއި، އުމުރުން ދުވަސްވީ މައިންބަފައިންގެ ބޭސްފަރުވާ އާއި، ކާބޯތަކެއްޗަށް ބޭނުންވާ ތަކެތި ހޯދުމަށް އޮތް ހަމައެކަނި މަގެވެ. ކޮންމެ މުސާރައެއްގެ ފަހަތުގައި، އެ މުސާރައަށް ބަރޯސާވެގެން ތިބި އާއިލާއެއް އޮވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ކެމްޕޭނުގައި ވެވަޑައިގެންނެވި އެ ވައުދަށް ބަރޯސާވެ ވޯޓު ދިން މީހުން ވެސް މަދެއް ނުވާނެއެވެ. އެމަނިކުފާނުގެ ސަރުކާރެއްގައި، ސަރުކާރުގެ ވުޒާރާތަކާއި ކުންފުނިތަކުގައި މަސައްކަތްކުރާ އާދައިގެ މުވައްޒަފުންގެ ވަޒީފާ ނުގެއްލޭނެ ކަމުގެ ޔަގީންކަން ތަކުރާރުކޮށް ދެއްވިއެވެ. އަދި ސަރުކާރު ބަދަލުވުމާއެކު ވަޒީފާއިން ވަކިވާނީ ހަމައެކަނި ސިޔާސީ މަގާމުތަކުގައި ތިއްބަވާ ބޭފުޅުން ކަމަށް ވަރަށް ސާފުކޮށް ވިދާޅުވިއެވެ.

ސަރުކާރުތަކުން އިގްތިސާދީ ގޮތުން އުނދަގޫ ނިންމުންތައް ނިންމަންޖެހޭނެއެވެ. އަދި ދައުލަތުގެ ޚަރަދު ކުޑަކުރުމަކީ ސިޔާސީ ގޮތުން ކުރަންޖެހޭ މުހިންމު ކަމަކަށް ވެދާނެއެވެ. ނަމަވެސް، އެ ނިންމުންތަކަކީ ރައްޔިތުންނަށް ކުރިން ދީފައިވާ ސާފު ޔަގީންކަމަކާ ފުށުއަރާ ކަންކަމަށް ވާނަމަ، އޭގެ ސަބަބުން ގެއްލިގެންދަނީ ރައްޔިތުންގެ އިތުބާރެވެ.

ދިވެހިރާއްޖޭގެ ފަހުގެ ތާރީޚަށް ނަޒަރު ހިންގާލާއިރު، މިހާރު ފެންނަމުންދާ މަންޒަރުތަކާއި އޭރުގެ ކަންކަން ހުރި ގޮތުގެ ތަފާތު ވަރަށް ބޮޑަށް ހާމަވެއެވެ. ރާއްޖެއަށް ކުރިމަތިވި އެންމެ ނުރައްކާތެރި އިގްތިސާދީ ކާރިސާ ކަމަށްވާ ކޯވިޑް-19 ގެ ބަލިމަޑުކަމުގެ ދުވަސްވަރު، މާލީ ގޮތުން މީގެ ކުރިން ދުވަހަކު ވެސް ކުރިމަތިނުވާ ފަދަ ބޮޑެތި ގޮންޖެހުންތަކެއް ކުރިމަތިވި ނަމަވެސް، އޭރުގެ ސަރުކާރުން ވަނީ ދައުލަތުގެ މުވައްޒަފުން ގަނޑުކޮށް ވަކިކުރުމުން ދުރުހެލިވެފައެވެ.

އޭގެ ބަދަލުގައި، ގައުމަށް ކުރިމަތިވި ނުތަނަވަސްކަމުގެ އެ ދަނޑިވަޅުގައި ވަޒީފާތައް ކަށަވަރުކޮށްދިނުމަށް މަސައްކަތްކޮށް، ކުރީ ސަފުގައި މަސައްކަތްކުރި މުވައްޒަފުންނާއި އާންމު ޚިދުމަތްތެރިންނަށް މާލީ އިނާޔަތްތަކާއި އެހީތެރިކަން ފޯރުކޮށްދިނުމުގެ ސިޔާސަތުތަކެއް އެ ސަރުކާރުން ތައާރަފުކުރިއެވެ. ނަމަވެސް މިއަދު ފެންނަނީ، ޚަރަދު ކުޑަކުރުމުގެ ބަހަނާގައި އާންމު ގިނަ މުވައްޒަފުންތަކެއް ވަޒީފާއިން ވަކިކުރަމުންދާ މަންޒަރެވެ.

މި ދެ ސަރުކާރުގެ އަމަލުތަކުގެ މެދުގައި ހުރި މި ފަރަގުގެ ސަބަބުން، ދެންވެސް ހަމަ ހިތަށް އަންނަނީ އެ ލަވައިގެ ޅެން ބައިތެކެވެ.

ތީހޭ ކަލާގެ ޒާތަކީ ވެދިއުންހެ ބޭވަފާ

ދެގޮތެއް މަށެއް ނުވާނަމޭ ބުނެފައި ނުވޭހޭ؟