އެމެރިކާ އަށް އުފަންވާ ކުދިންނަށް އޮޓޮމެޓިކުން ރައްޔިތުކަން ލިބުން ހަނިކުރުމަށް ޓްރަމްޕް ނެރުއްވި ގަރާރަކީ ގާނޫނުއަސާސީއާ ޚިލާފު ގަރާރެއް ކަމަށް އެ ގައުމުގެ ސުޕްރީމް ކޯޓުން ކަނޑައަޅައިފި

އެމެރިކާގެ ފަސްގަނޑަށް އުފަންވާ ކުދިންނަށް އޮޓޮމެޓިކުން ރައްޔިތުކަން ލިބުން ހަނިކުރުމަށް އެމެރިކާގެ ރައީސް ޑޮނަލްޑް ޓްރަމްޕް ނެރުއްވި ރިޔާސީ ގަރާރަކީ ގާނޫނުއަސާސީއާ ޚިލާފު ގަރާރެއް ކަމަށް ކަނޑައަޅައި، އެ ގައުމުގެ ސުޕްރީމް ކޯޓުން އެ ގަރާރު ބާތިލުކޮށްފި އެވެ.

ޓްރަމްޕްގެ އައު ދައުރުގެ ފުރަތަމަ ދުވަސް ކަމަށްވާ 2025 ޖެނުއަރީ 20 ވަނަ ދުވަހު ސޮއިކުރެއްވި މި ގަރާރުގައިވަނީ، އެމެރިކާގެ ފަސްގަނޑަށް އުފަންވާ ކުދިންގެ މައިންބަފައިންގެ ތެރެއިން އެކަކީވެސް އެމެރިކާގެ ރައްޔިތަކަށް ނުވަތަ އެ ގައުމުގައި ދާއިމީކޮށް ދިރިއުޅުމުގެ ގާނޫނީ ހުއްދަ އޮތް މީހަކަށް ނުވާނަމަ، އެ ކުދިންނަށް ރައްޔިތުކަން ނުދިނުމަށް ފެޑަރަލް އެޖެންޓުންނަށް އަންގަވާފަ އެވެ. ނަމަވެސް، އެމެރިކާގެ ދަށު ކޯޓުތަކުން މި ސިޔާސަތަކީ ގާނޫނުއަސާސީއާ ޚިލާފު ކަމެއް ކަމަށް ނިންމައި، މުޅި ގައުމުގައި އެ އަމުރު ތަންފީޒުކުރުން ހުއްޓުވާފައި އޮތުމުން، މިހާތަނަށް އެ ސިޔާސަތަށް އަމަލުކުރަން ފަށާފައެއް ނުވެ އެވެ. މި މައްސަލައިގައި ގޮތެއް ނިންމައިދިނުމަށް ސުޕްރީމް ކޯޓުގައި އެދުނީ ޓްރަމްޕްގެ ސަރުކާރުންނެވެ.

އަންގާރަ ދުވަހު ސުޕްރީމް ކޯޓުން މި މައްސަލަ ނިންމީ 6 ފަނޑިޔާރުންގެ އަޣުލަބިއްޔަތުންނެވެ. ކޯޓުގެ ނިންމުމުގައިވަނީ، ޓްރަމްޕްގެ އަމުރަކީ އެމެރިކާގެ ގާނޫނުއަސާސީގެ 14 ވަނަ އިސްލާހުގެ "ސިޓިޒަންޝިޕް ކްލޯޒް" ނުވަތަ ރައްޔިތުކަމާ ބެހޭ މާއްދާއާ ޚިލާފު އަމުރެއް ކަމަށެވެ. އެ މާއްދާގައި ބުނަނީ އެމެރިކާގައި އުފަންވާ ނުވަތަ ގާނޫނީ ގޮތުން ރައްޔިތުކަން ހޯދާ ކޮންމެ މީހަކީ އެމެރިކާގެ ރައްޔިތެއް ކަމަށެވެ.

މި ނިންމުމަށް ތާއީދުކުރެއްވި ފަނޑިޔާރުންގެ ތެރޭގައި އުއްތަމަ ފަނޑިޔާރު ޖޯން ރޮބަޓްސްގެ އިތުރުން ކޮންޒަވޭޓިވް ފަނޑިޔާރު އެމީ ކޯނީ ބެރެޓް އަދި ލިބަރަލް ތިން ފަނޑިޔާރުން ކަމަށްވާ އިލީނާ ކޭގަން، ސޯނިއާ ސޮޓޮމަޔޯ އަދި ކެޓާންޖީ ބްރައުން ޖެކްސަން ހިމެނިވަޑައިގަންނަވަ އެވެ. ކޮންޒަވޭޓިވް ފަނޑިޔާރު ބްރެޓް ކަވަނޯވެސް އެ ގަރާރު ބާތިލުކުރުމަށް ތާއީދުކުރެއްވި ނަމަވެސް، އޭނާ ވިދާޅުވީ އެ ގަރާރު ޚިލާފުވަނީ ސީދާ ގާނޫނުއަސާސީއާ ނޫން ކަމަށާއި، އެއީ އެމެރިކާގައި އުފަންވާ މީހުންގެ ދަރަޖަ ކަނޑައަޅާ 1940 ވަނަ އަހަރުގެ ފެޑަރަލް ގާނޫނާ ޚިލާފު އަމުރެއް ކަމަށެވެ.

ކޯޓުގައި ތިއްބަވާ އަނެއް ތިން ކޮންޒަވޭޓިވް ފަނޑިޔާރުން ކަމަށްވާ ކްލެރެންސް ތޯމަސް، ސެމިއުލް އެލީޓޯ އަދި ނީލް ގޯސަޗް ވަނީ މި ނިންމުމާ ދެކޮޅަށް ރައުޔު ނެރުއްވާފަ އެވެ. ފަނޑިޔާރު އެލީޓޯ މި ނިންމުމަކީ "ބޮޑު ގޯހެއް" ކަމަށް ސިފަކުރައްވައި ވިދާޅުވީ، ގަވާއިދާ ޚިލާފަށް އުޅޭ ހިޖުރަވެރިންނަށް އުފަންވާ ކުދިންނަށް، އެ ކުދިންގެ މައިންބަފައިން ނިސްބަތްވާ ގައުމުގެ ރައްޔިތުކަން ލިބޭނަމަ، އޮޓޮމެޓިކުން އެމެރިކާގެ ރައްޔިތުކަން ލިބިގެން ނުވާނެ ކަމަށެވެ.

ފަނޑިޔާރު ތޯމަސް ވިދާޅުވީ، ރައްޔިތުކަން ހޯދުމުގެ ބޭނުމުގައި އެމެރިކާއަށް ދަތުރުކުރާ މީހުންނަކީ އެ ގައުމުގެ ބައެއްގެ ގޮތުގައި ނުބެލެވޭނެ ކަމަށެވެ. އަދި ފަނޑިޔާރު ގޯސަޗް ވެސް އެފަދަ މޭރަމަކުން ވާހަކަދައްކަވަމުން ވިދާޅުވީ، އެންމެ މުހިންމު ކަމަކީ އެ ކުއްޖެއްގެ މައިންބަފައިންނަކީ، އެމެރިކާއަކީ އެމީހުންގެ ދާއިމީ ވަޒަން ކަމުގައި ހަދައިގެން އުޅޭ ބައެއްތޯ ބެލުން ކަމަށެވެ.

ކޯޓުގެ މި ނިންމުމާ ގުޅިގެން ޓްރަމްޕް ވިދާޅުވީ މިއީ ގައުމަށް ލިބުނު ވަރަށް ބޮޑު ދެރައެއް ކަމަށެވެ. އޭނާގެ ސޯޝަލް މީޑިއާ ޕްލެޓްފޯމް "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، ކޮންގްރެސް މެދުވެރިކޮށް އައު ގާނޫނެއް ހަދައިގެން މިކަން ހައްލުކުރެވިދާނެ ކަމަށާއި، މިއަދުން މިއަދަށް އެ މަސައްކަތް ފެށުމަށް ގާނޫނު ހަދާ މަޖިލީހުގެ މެންބަރުންނަށް ގޮވާލައްވާ ކަމަށެވެ. އަދި އެފަދަ ބިލަކަށް ފުރިހަމަ ތާއީދު ދެއްވާނެ ކަމަށްވެސް ޓްރަމްޕް ވިދާޅުވި އެވެ.

ހައުސް ސްޕީކަރު މައިކް ޖޯންސަންވެސް ނޫސްވެރިންނާ ވާހަކަދައްކަވަމުން ވަނީ ކޯޓުގެ ނިންމުމާމެދު މާޔޫސްވާކަން ހާމަކުރައްވާފައެވެ. ގާނޫނީ ވަކީލެއްގެ ގޮތުގައި ކުރިން މަސައްކަތް ކުރެއްވި ޖޯންސަން ވިދާޅުވީ، ގާނޫނުއަސާސީގެ 14 ވަނަ އިސްލާހުގެ ބޭނުން ނަހަމަ ގޮތުގައި ހިފައިގެން "ބާތް ޓޫރިޒަމް" ނުވަތަ ރައްޔިތުކަން ހޯދުމަށް ވިހަން އަންނަ މީހުން އިތުރުވަމުންދާ ކަމަށާއި، މީގެ ސަބަބުން ކުރިއަށް އޮތް ތަނުގައި ބޮޑެތި ގޮންޖެހުންތަކެއް ކުރިމަތިވާނެ ކަމަށެވެ.

ނަމަވެސް، އިދިކޮޅު ޑިމޮކްރެޓުން ވަނީ ކޯޓުގެ ނިންމުމަށް މަރުހަބާ ކިޔާފަ އެވެ. ހައުސް މައިނޯރިޓީ ލީޑަރު ހަކީމް ޖެފްރީސް ވިދާޅުވީ ޓްރަމްޕްގެ އަމުރަކީ "ލަދުވެތި" އަދި "ކަނޑައެޅިގެން ގާނޫނާ ޚިލާފު" އަމުރެއް ކަމަށެވެ. ސެނެޓް މައިނޯރިޓީ ލީޑަރު ޗަކް ޝޫމަރ ވިދާޅުވީ، މިއީ މީހުންގެ އަތުން ރައްޔިތުކަން "ފޭރިގަތުމަށް" ޓްރަމްޕް ކުރެއްވި މަސައްކަތް ހުއްޓުވައިދިން މުހިންމު ނިންމުމެއް ކަމަށެވެ.

ޓްރަމްޕްގެ ސަރުކާރުން މަސައްކަތް ކުރަމުންދަނީ، ދަރިންނަށް އެމެރިކާގެ ރައްޔިތުކަން ހޯދައިދިނުމުގެ ބޭނުމުގައި އެ ގައުމަށް ދަތުރުކޮށް، ވިހެއުމަށްފަހު އެނބުރި ގައުމަށްދާ މީހުން ހުއްޓުވުމަށެވެ.

މި މަހުގެ ކުރީކޮޅު އެމެރިކާގެ ސްޓޭޓް ޑިޕާޓްމަންޓުން ވަނީ، މިފަދަ ކަންކަމާ ގުޅުންހުރި އެފްރިކާ އަދި ޔޫރަޕްގެ ނެޓްވޯކްތައް ރޫޅާލައި، އެތައް ސަތޭކަ ވިސާއެއް ބާތިލުކުރަން ނިންމާފައިވާކަން އިއުލާންކޮށްފަ އެވެ. ނަމަވެސް، ފާޑުކިޔާ ފަރާތްތަކުން ބުނަނީ އެމެރިކާގައި އަހަރަކު އުފަންވާ ކުދިންގެ ތެރެއިން މިގޮތަށް ރައްޔިތުކަން ހޯދާ ކުދިންގެ ނިސްބަތަކީ އެންމެ 1 އިންސައްތައަށްވުރެވެސް ކުޑަ މިންވަރެއް ކަމަށެވެ.