ވޯލްޑް ކަޕްގެ ގިނަ މެޗުތައް ބައްލަވަން އިންފަންޓީނޯ އިންނަވާތީ، ދަތުރު ކުރައްވާ ގޮތާ މެދު ގިނަ ބަޔަކަށް ހައިރާން ކަމެއް

މިހާރު ކުރިއަށްދާ ފީފާ ވޯލްޑް ކަޕްގެ ގިނަ މެޗު ތަކެއް ބައްލަވަން، ފީފާގެ ރައީސް ޖިއާނީ އިންފަންޓީނޯ ވަޑައިގަންނަވާތީ ގިނަ ބައެއްގެ ސަމާލުކަން އެކަމަށް ލިބިއްޖެ އެވެ. 

މިފަހަރުގެ މުބާރާތް ބާއްވަނީ އެމެރިކާ އާއި ކެނެޑާ އަދި މެކްސިކޯގައި ކަމަށްވާއިރު، މުބާރާތުގެ ގިނަ މެޗު ތަކެއް ބައްލަވަން އިންފަންޓީނޯ ވަޑައިގަންނަވަ އެވެ. އެހެންވެ އެކި ސިޓީ ތަކުގެ މެދުގައި ދަތުރު ކުރެއްވުމުގައި އިންފަންޓީނޯ އަމަލު ކުރައްވާ ގޮތާ މެދު ސުވާލު ތަކެއް ވެސް އުފެދިފައި އެވެ. ތިން ޤައުމުގައި ކުރިއަށްދާ މި މުބާރާތުގައި އިންފަންޓީނޯ ދުވާލަކު މަދު ވެގެން ދެ މެޗު ބައްލަވަން އެކި ސިޓީ ތަކަށް ވަޑައިގަންނަވަ އެވެ.

އިންފަންޓީނޯގެ މި ބުރަ ދަތުރު ތަކުގެ ތާވަލްގެ ފަހަތުގައިވާ ސިއްރަކީ ޤަތަރު އެއާވޭސް އިން ފީފާ އަށް ފޯރުކޮށްދީފައިވާ ޚާއްސަ ޕްރައިވެޓް ޖެޓެކެވެ. މިއީ ޤަތަރު އެއާވޭސް އާއި ފީފާއާ ދެމެދު އޮންނަ ސްޕޮންސާޝިޕް އެއްބަސްވުމުގެ ދަށުން ހަމަޖައްސާފައިވާ އިންތިޒާމެކެވެ. މި އިންތިޒާމުގެ ސަބަބުން މުބާރާތް ބާއްވާ ތިން ޤައުމުގެ އެކި ސިޓީ ތަކުގެ މެދުގައި ވަރަށް އަވަހަށް ދަތުރު ކުރުމުގެ ފުރުސަތު އިންފަންޓީނޯ އަށް ލިބިވަޑައިގެންފައިވެ އެވެ. 

އިންފަންޓީނޯ ދަތުރު ކުރައްވަނީ ޤަތަރު އެއާވޭސް އެގްޒެކެޓިވް އިން އޮޕަރޭޓު ކުރާ ގަލްފްސްޓްރީމް ޖީ 650 އީއާރު މަރުކާގެ މަތިންދާ ބޯޓެއްގައި އެވެ. ގަޑިއަކު ގާތް ގަނޑަކަށް 1000 ކިލޯ މީޓަރުގެ ބާރު މިނުގައި ދަތުރު ކުރާ މި ބޯޓަކީ، އެއްފަހަރާ 13،900 ކިލޯ މީޓަރަށް ދަތުރު ކުރުމުގެ ޤާބިލުކަން ލިބިފައިވާ ބޯޓެކެވެ. 

މި ބޯޓުގެ ކެބިން ފަރުމާ ކޮށްފައި ވަނީ އޮފީހެއްގެ ގޮތުގައި މަސައްކަތް ކުރެވޭނެ އަދި އަރާމު ކޮށްލެވޭނެ ފަދަ ލަގްޒަރީ ސޫޓެއްގެ ގޮތުގައި އެވެ. މިއީ އިންފަންޓީނޯ އަށް މެޗު ތަކުގެ މެދުގައި އޮންނަ މަދު ވަގުތު ކޮޅުގެ ތެރޭގައި އެއް ސިޓީ އިން، އަނެއް ސިޓީ އަށް ވަޑައިގަތުމަށް މަގުފަހިހާ މައިގަނޑު ސަބަބު ކަމަށް ބުނެފައި އެވެ. 

މުބާރާތް ފެށި ދުވަހު އިންފަންޓީނޯ ހުންނެވީ މެކްސިކޯގައި އެވެ. އެއީ މުބާރާތުގެ ފުރަަތަމަ މެޗުގައި މެކްސިކޯ އާއި ދެކުނު އެފްރިކާާ ބައްދަލު ކުރި މެޗުގައި އެވެ. އޭގެ ގަޑިއިރު ތަކެއް ފަހުން އޭނާ ވަނީ ދެކުނު ކޮރެއާ އާއި ޗެކް ރިޕަބްލިކް ބައްދަލު ކުރި މެޗު ބައްލަވަން މެކްސިކޯގެ ގުއަޑަލަޖަރާ އަށް ވަޑައިގެންފައި އެވެ.

މުބާރާތުގެ ދެ ވަނަ ދުވަހު އިންފަންޓީނޯ ހުންނެވީ އެމެރިކާގައި އެވެ. އެއީ މުބާރާތުގައި އެމެރިކާގެ ފުރަތަމަ މެޗުގައި ޕެރަގުއޭއާ ދެކޮޅަށް ކުޅުނު މެޗު ބެއްލެވުމަށެވެ. އޭގެ ފަހުން އިންފަންޓީނޯ ވަނީ އެމެރިކާގެ ސެން ފްރެންސިސްކޯ އާއި ކެނެޑާގެ ވެންކޫވާ އަށް ވެސް ވަޑައިގެންފައި އެވެ.

ނަމަވެސް، ކޮންމެ ދުވަހަކު ޕްރައިވެޓް ޖެޓެއްގައި އިންފަންޓީނޯ ކުރައްވާ މި ދަތުރުތަކާ ގުޅިގެން ތިމާވެށީގެ މާހިރުންގެ ފާޑު ކިޔުންތައް ވަނީ އަމާޒުވެފައި އެވެ. ވޯލްޑް ކަޕް އަކީ މިހާރު ވެސް ތިމާވެއްޓަށް ބޮޑު އަސަރެއް ކުރާ މުބާރާތަކަށް ވާއިރު، މިހާ ގިނަ އަދަދަކަށް ޕްރައިވެޓް ޖެޓް ބޭނުން ކުރުމަކީ ކާބަން ފުޓްޕްރިންޓް އިތުރު ވާނެ ކަމެއް ކަމަށް މާހިރުން އަންނަނީ ފާހަގަ ކުރަމުންނެވެ. 

މި ފާޑުކިޔުންތަކާ އެކު ވެސް، ފީފާ އިން ބުނަމުން ދަނީ މި ދަތުރު ތަކުގެ ސަބަބުން މުބާރާތް ބާއްވާ ތިން ގައުމުގެ ސަޕޯޓަރުންނާ ގާތުން ގުޅުން ބޭއްވުމަށާއި، މުބާރާތުގެ ކަންކަން ގާތުން ބެލެހެއްޓުމަށް ރައީސް އަށް ފުރުސަތު ލިބިވަޑައިގަންނަވާ ކަމަށެވެ. އެހެން ނަމަވެސް، މިހާ ގިނަ އަދަދަކަށް ޕްރައިވެޓް ޖެޓުގައި ދަތުރު ކުރުމަކީ އެންމެ މުހިންމު ކަމެއްތޯ ބައެއް ފަރާތްތަކުން އަދިވެސް ދަނީ ސުވާލު އުފައްދަމުންނެވެ.