ކުރީގެ ހަތަރު ރައީސުންގެ ތާރީޚީ ފެނިލުމާ އެކު، އޮބާމާގެ ރިޔާސީ މަރުކަޒު ހުޅުވައިފި
20 ޖޫން 2026 | ހޮނިހިރު 07:29އޮބާމާގެ މި ރިޔާސީ މަރުކަޒު ޤާއިމު ކޮށްފައި ވަނީ ގާތް ގަނޑަކަށް 850 މިލިއަން އެމެރިކާ ޑޮލަރު ޚަރަދު ކޮށްގެން. މި މަރުކަޒުގައި އާންމު ލައިބްރަރީއެއްގެ އިތުރުން، މިއުޒިއަމް އަކާއި، ފަންނުވެރި ކަމުގެ ހޯލެއް އަދި ބާސްކެޓު ކުޅޭނެ ކުޅިވަރު މަރުކަޒެއް ވެސް ހިމެނޭ.
އެމެރިކާގެ ކުރީގެ ރައީސުން ކަމަށްވާ އޮބާމާ އާއި، ކްލިންޓަން، ބުޝް އަދި ބައިޑަން. | ގެޓީ އިމޭޖަސް
އެމެރިކާގެ ކުރީގެ ރައީސް ބަރަކް އޮބާމާގެ ރިޔާސީ މަރުކަޒު ރަސްމީކޮށް ހުޅުވައިފި އެވެ.
އެމެރިކާގެ ޗިކާގޯގައި ހުންނަ މި މަރުކަޒު ހުޅުވީ ބުރާސްފަތި ދުވަހުގެ ރޭ ބޭއްވި ޚާއްސަ ރަސްމިޔާތެއްގައި އެވެ. އެ ރަސްމިއްޔާތުގައި އެމެރިކާގެ އިތުރުން، ދުނިޔޭގެ އެކި ކަންކޮޅު ތަކުން ދައުވަތު ދީގެން އެކި އެކި ބޭފުޅުން ބައިވެރިވެ ވަޑައިގެންފައި އެވެ.
އޮބާމާ ފައުންޑޭޝަން އިން ޚަރަދު ކޮށްގެން ޤާއިމު ކޮށްފައިވާ މި މަރުކަޒު ހުންނަނީ ޗިކާގޯގެ ތާރީޚީ ޖެކްސަން ޕާކުގައި އެވެ. މި ސަރަހައްދަކީ އޮބާމާގެ ދަރިންނަށް ކިޔަވައި ދެމުން އަންނަ ޗިކާގޯ ޔުނިވާސިޓީ ވެސް ހުންނަ ސަރަހައްދެވެ.
ރިޔާސީ މަރުކަޒު ޤާއިމު ކުރުމަށް އޮބާމާ މި ސަރަހައްދު ކަނޑަ އަޅާފައި ވަނީ، އޭނާ އާއި އަނބިކަނބަލުން މިޝޭލް އޮބާމާ ކައިވެނި ބައްލަވައި ގަތުމަށް ފަހު ދިރިއުޅުން ފެއްޓެވީ އެ ސަރަހައްދުގައި ކަމަށްވާތީ އެވެ. ރަސްމިއްޔާތުގައި އޮބާާމާ ވިދާޅުވެފައި ވަނީ، އޭނާ އެންމެ ލޯބިވާ ސިޓީގައި އެފަދަ ތަނެއް ހުޅުވުމަކީ ބޮޑު ހިތްހަމަ ޖެހުމެއް ކަމަށާއި، ރައްޔިތުންނަށް އެކަމުން އުފާވެރިކަން ލިބޭނެ ކަމަށް އުންމީދު ކުރައްވާ ކަމަށެވެ.
އޮބާމާގެ މި ރިޔާސީ މަރުކަޒު ޤާއިމު ކޮށްފައި ވަނީ ގާތް ގަނޑަކަށް 850 މިލިއަން އެމެރިކާ ޑޮލަރު ޚަރަދު ކޮށްގެންނެވެ. މި މަރުކަޒުގައި އާންމު ލައިބްރަރީއެއްގެ އިތުރުން، މިއުޒިއަމް އަކާއި، ފަންނުވެރި ކަމުގެ ހޯލެއް އަދި ބާސްކެޓު ކުޅޭނެ ކުޅިވަރު މަރުކަޒެއް ވެސް ހިމެނެ އެވެ.
އެމެރިކާގެ ކުރީގެ ރައީސް އޮބާމާގެ ރިޔާސީ މަރުކަޒު ހުޅުވުމަށް ބޭއްވި ރަސްމިއްޔާތުގެ ތެރެއިން.
މި މަރުކަޒު ހުޅުވުމުގެ ރަސްމިއްޔާތު ޙާއްސަ ވެފައި ވަނީ، މި ރަސްމިއްޔާތުގައި އެމެރިކާގެ ކުރީގެ ތިން ރައީސުން ބައިވެރިވެ ވަޑައިގެންނެވުމުންނެވެ. އޭގެ ތެރޭގައި ކުރީގެ ރައީސް ބިލް ކްލިންޓަން އާއި، ކުރީގެ ރައީސް ޖޯޖް ޑަބްލިއު ބުޝް އަދި ކުރީގެ ރައީސް ޖޯ ބައިޑަން ހިމެނި ވަޑައިގަންނަވަ އެވެ. ބުޝް އަކީ އޮބާމާގެ ކުރިން ވެރިކަމުގައި ހުންނެވި ބޭފުޅާ އެވެ. އަދި ބައިޑަން ވަނީ އޮބާމާގެ ދެ ދައުރުގައި ވެސް އޭނާގެ ނައިބު ރައީސްކަން ކުރައްވައިފަ އެވެ.
މި ބޭފުޅުންގެ އިތުރުން ޖަރުމަނުގެ އެންމެ ފުރަތަމަ އަންހެން ޗާންސެލަރު އެންޖެލާ މާކަލް އާއި، އިޓަލީގެ ކުރީގެ ބޮޑު ވަޒީރު މަޓެއޯ ރެންޒީ އަދި ކެނެޑާގެ ކުރީގެ ބޮޑު ވަޒީރު ޖަސްޓިން ޓްރޫޑޯ ވެސް ވަނީ މި ރަސްމިއްޔާތުގައި ބައިވެރިވެ ވަޑައިގެންފައި އެވެ. އަދި މަޝްހޫރުން ފަންނާނުން ކަމަށްވާ ސްޓީވީ ވޮންޑާ އާއި ބްރޫސް ސްޕްރިންގްސްޓީން ފަދަ މަޝްހޫރު ފަރާތްތައް ވެސް ވަނީ މި ރަސްމިއްޔާތުގައި ބައިވެރިވެފައި އެވެ.
އެމެރިކާގެ މިހާރުގެ ރައީސް ޑޮނަލްޑް ޓްރަމްޕް މި ރަސްމިއްޔާތުގައި ބައިވެރިވެ ވަޑައިގެންފައި ނުވެ އެވެ. ޓްރަމްޕް އަށް މި ރަސްމިއްޔާތުގެ ދައުވަތު ދެއްވާފައި ނުވާއިރު، ދާދި ފަހުން ޓްރަމްޕް ވަނީ އޮބާމާ އާއި އޭނާގެ އަނބިކަނބަލުންނަށް ނަސްލީ ގޮތުން ފުރައްސާރަ ކޮށްފައި އެވެ. އެކަމުގެ ސަބަބުން އެތައް ބައެއްގެ ފާޑު ކިޔުމާއި ނުރުހުން ޓްރަމްޕް އަށް އަމާޒުވެގެން ދިޔަ އެވެ.
