ބައިޑަންގެ ފޯނު ކޯލުގެ ރެކޯޑިން ހާމަ ކުރުން ހުއްޓުވުމަށް ކުރި މަސައްކަތް ކޯޓުން ބަަލައި ނުގަތް

އެމެރިކާާގެ ކުރީގެ ރައީސް ޖޯ ބައިޑަންގެ ފޯނު ކޯލުތަކެއްގެ ރެކޯޑިން ހާމަ ކުރުމަށް އެމެރިކާގެ ސަރުކާރުން ކުރަމުން އަންނަ މަސައްކަތް ހުއްޓުވުމަށް ބައިޑަންގެ ފަރާތުން ކޯޓަށް ހުށަހެޅި މައްސަލަ ބަލައި ނުގަންނަން ނިންމައިފި އެވެ. 

އެމެރިކާގެ ކޯޓަކުން މިހެން ނިންމާފައި ވަނީ ހުކުރު ދުވަހު އެވެ. ކޯޓުގެ ގާޒީ ޑެބްނީ ފްރީޑްރިކް ވިދާޅުވީ، މި މައްސަލައިގައި ބައިޑަންގެ ޕްރައިވަސީ އަށް ވުރެ، އެމެރިކާގެ ރައްޔިތުންގެ ޙައްގުތައް މާ މުހިންމު ކަމަށެވެ. ނަމަވެސް، އިސްތިއުނާފު ކުރުމުގެ ފުރުސަތު ބައިޑަން އަށް ދިނުމުގެ ގޮތުން ތިން ހަފުތާ އަށް ވުރެ ދިގު މުއްދަތަކަށް އޭނާގެ ޙުކުމް ހިފެހެއްޓުމަށް ގާޒީ ނިންމެވި އެވެ. 

މި ރެކޯޑިންތައް ހޯދާފައި ވަނީ ސްޕެޝަލް ކައުންސެލް ރޮބާޓް ހަރް އެވެ. އެއީ އެމެރިކާގެ ސެނެޓަރެއްގެ ގޮތުގައި ބައިޑަން ހުންނެވި ދުވަސްވަރާއި، އެމެރިކާގެ ނައިބު ރައީސްގެ މަގާމުގައި ބައިޑަން ހުންނެވި ދުވަސްވަރު، ސިއްރު ލިޔެ ކިޔުން ތަކެއް ނުރައްކާތެރި ގޮތުގައި ބަހައްޓާފައިވޭތޯ ތަހުގީގު ކުރަމުން ދަނިކޮށެވެ. 

ބައިޑަންއާ ދެކޮޅަށް ދައުވާ ނުކުރުމަށް ހަރް ނިންމުމާ އެކު، އެމެރިކާގެ ކޮންގްރެސްގައި ތިބި ރިޕަބްލިކަންް ޕާޓީގެ މެމްބަރުން ވަނީ އެ ރެކޯޑިންތައް ހާމަ ކުރުމަށް ގޮވާލައިފަ އެވެ. 2026 ވަނަ އަހަރާއި 2017 ވަނަ އަހަރު، އޭރުގެ ޑިމޮކްރަޓިކް ޕާޓީގެ ވެރިކަމުގައި ވަނީ ރެކޯޑިންތަކާއި، ޓްރާންސްކްރިޕްޓްތައް ހަވާލު ކުރުމަށް ދެކޮޅު ހަދައިފަ އެވެ. 

ނަމަވެސް، ޓްރަމްޕްގެ ސަރުކާރުގެ ޖަސްޓިސް ޑިޕާޓްމަންޓް އިން ވަނީ އެ މައުލޫމާތުތައް ހާމަ ކުރުމުގެ ހުއްދަ ދީފަ އެވެ. އެކަމުގެ ސަބަބުން ކޮންސަވޭޓިވް ހެރިޓޭޖް ފައުންޑޭޝަންގެ ސްޓާފް މެމްބަރަކު ރެކޯޑިންތައް ހާމަ ކުރުމަށް ރަސްމީކޮށް އެދުމާ އެކު، މިދިޔަ މެއި މަހު ބައިޑަންގެ ފަރާތުން ވަނީ އެކަން ހުއްޓުވައި ދިނުމަށް އެދި މައްސަލަ ހުށަހަޅައިފަ އެވެ. 

އެކަމާ ގުޅޭ ގޮތުން ބައިޑަންގެ ފަރާތުން ވިދާޅުވެފައި ވަނީ އެ ރެކޯޑިން ތަކުގައި އޭނާގެ ދަރިކަލުން ބިއު ބައިޑަންގެ މަރާއި، ޒާތީ ކަންކަމާ ގުޅޭ ހިތް ދަތި މައުލޫމާތު ތަކެއް ހިމެނޭތީ އެއީ އޭނާގެ ޕްރައިވަސީ އަށް އަރައި ގަތުން ކަމަށެވެ. ނަމަވެސް، މައްސަލަ ބެއްލެވި ގާޒީ ވިދާޅުވެފައި ވަނީ، ސަރުކާރުން އެ މައުލޫމާތުތައް ފޮރުވާފައިވާ ކަމަށެވެ. 

ފްރީޑްރިކް އަކީ ޓްރަމްޕްގެ ފުރަތަމަ ވެރި ކަމުގައި 2017 ވަނަ އަހަރު ނޮމިނޭޓު ކޮށްފައިވާ ގާޒީ އެކެވެ.