ކޮމާޝަލް ފްލައިޓެއްގައި ބައިޑަން ދަތުރު ކުރެއްވުމުން، އެތައް ބައެއްގެ ސަމާލުކަމަށް އެކަމަށް ލިބިއްޖެ

އެމެރިކާގެ ކުރީގެ ރައީސް ޖޯ ބައިޑަން ކޮމާޝަލް ފްލައިޓެއްގައި ދަތުރު ކުރައްވާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދައުރުވުމާ އެކު، އެތައް ބައެއްގެ ސަމާލުކަން އެކަމަށް ލިބިއްޖެ އެވެ.

ޖޫން މަހުގެ 17 ވީ ބުދަ ދުވަހު، އުމުރުން 83 އަހަރުގެ ބައިޑަން ކޮމާޝަލް ފްލައިޓަކަށް އަރައި ވަޑައިގަންނަވާ މަންޒަރު ފެންނަ ވީޑިއޯ ދައުރު ކޮށްފައި ވަނީ އެހެން ފްލައިޓެއްގައި އިން ފަސިންޖަރެކެވެ. 

އެ ވީޑިއޯގައި ފެންނަ ގޮތުން ބައިޑަން ވަނީ އެ މަނިކުފާނުގެ ކާރު ކޮޅުން ފައިބައި ވަޑައިގެން، ބްރީފްކޭސް އެއް ހިއްޕަވައިގެން ސީކްރެޓް ސާވިސްގެ ރައްކާތެރިކަމާ އެކު ފްލައިޓަށް އަރައި ވަޑައިގަންނަވާފަ އެވެ. ސޯޝަލް މިޑީއާގެ އިންފްލުއެންސާ ނިކް ތޯމާ އިންސްޓަގްރާމް އަދި ފޭސްބުކްގައި މި ވީޑިއޯ ހިއްސާ ކޮށްފައިވެ އެވެ. 

ވީޑިއޯގައި އޭނާ އެންމެ ފުރަތަމަ ބުނާ އަޑު އިވެނީ، ބައިޑަން އެ ފްލައިޓަށް އަރާ ކަމަށެވެ. ނަމަވެސް، ފަހުން އޭނާ ވަނީ ބައިޑަން އެރީ އެހެން ފްލައިޓަކަށް ކަމަށް ބުނެފަ އެވެ. އޭނާގެ އިތުރުން ބައެއް އެހެން ފަރާތް ތަކުން ވެސް ބައިޑަންގެ ވީޑިއޯ ސޯޝަލް މީޑިއާގައި ދައުރު ކޮށްފައިވެ އެވެ. 

މީގެ އިތުރުން އެހެން މީހަކު ސޯޝަލް މީޑިއާގައި ބުނެފައި ވަނީ، އެމެރިކާގެ މިހާރުގެ ރައީސް ޑޮނަލްޑް ޓްރަމްޕް އަމިއްލަ މީހާ އާއި އާއިލާ އަށް ފައިދާވާ ގޮތަށް ރައްޔިތުންގެ ޓެކްސް ފައިސާ ބޭނުން ކުރައްވާއިރު، އާންމު ރައްޔިތުންނެކޭ އެއް ފަދައިން ބައިޑަން ކޮމާޝަލް ފްލައިޓް ބޭނުން ކުރައްވާ ކަމަށެވެ. މި ވާހަކަ ހިއްސާ ކޮށްފައިވާ އެޑްވާޑް ކްރަސެންސްޓައިން އަކީ ޓްރަމްޕްގެ ފުރަތަމަ ދައުރުގައި ވެސް އޭނާ އށް ވަރަށް ބޮޑަށް ފާޑު ކިޔާފައިވާ ފަރާތެކެވެ. 

ފްލައިޓުގެ ޑޭޓާ މައުލޫމާތުތަކަށް ބަލާއިރު، ބައިޑަން ދަތުރު ކުރައްވާފައި ވަނީ ފިލަޑެލްފިއާ އިންޓަނޭޝަނަލް އެއާޕޯޓް އިން ޗިކާގޯގެ އޮހެއާ އިންޓަނޭޝަނަލް އެއާޕޯޓަށެވެ. އެގޮތުން ބައިޑަން ޗިކާގޯ އަށް ވަޑައިގެންނެވީ މިދިޔަ ބުރާސްފަތި ދުވަހު އޮތް، އެމެރިކާގެ ކުރީގެ ރައީސް ބަރަކް އޮބާމާގެ ރިޔާސީ މަރުކަޒު ހުޅުވުމުގެ ރަސްމިއްޔާތުގައި ބައިވެރިވެ ވަޑައިގެންނެވުމަށެވެ.