ކެރީބިއަން ކަނޑުގައި ދަތުރުކުރި އުޅަނދަކަށް އެމެރިކާގެ އަސްކަރިއްޔާ އިން ހަމަލާދީ ދެ މީހަކު މަރާލައިފި

ކެރީބިއަން ކަނޑުގެ ސަރަހައްދުން ދަތުރުކުރަމުންދިޔަ އުޅަނދަކަށް އެމެރިކާގެ އަސްކަރިއްޔާއިން ހޯމަ ދުވަހު ދިން ހަމަލާއެއްގައި ދެ މީހަކު މަރާލައިފިއެވެ. އެމެރިކާގެ އަސްކަރިއްޔާއިން ތުހުމަތުކުރާ ގޮތުގައި އެ އުޅަނދަކީ "ޓެރަރިސްޓް ޖަމާއަތްތަކުން" ބޭނުންކުރަމުންދިޔަ އުޅަނދެކެވެ. ނަމަވެސް އެއީ ކޮން ޖަމާއަތްތަކެއް ކަމެއް ހާމަކޮށްފައެއް ނުވެއެވެ.

އެމެރިކާގެ ސަަދަން ކޮމާންޑުން ބުނި ގޮތުގައި މި އޮޕަރޭޝަނުގައި އެމެރިކާގެ އަސްކަރީ އެއްވެސް ސިފައިންގެ މީހަކަށް އަނިޔާއެއް ލިބިފައެއް ނުވެއެވެ. އަދި މި ހަމަލާގައި މަރުވި ދެ މީހުންނަކީ މަސްތުވާތަކެތީގެ ވިޔަފާރިކުރާ "ނާކޯ-ޓެރަރިސްޓުން" ކަމަށް ސިފަކޮށްފައިވީ ނަމަވެސް، އެކަމާ ގުޅޭ އިތުރު ތަފްސީލެއް ދީފައެއް ނުވެއެވެ.

މިއީ އިންސާނީ ހައްގުތަކަށް މަސައްކަތްކުރާ ޖަމާއަތްތަކުން "ޝަރީއަތަކާ ނުލައި މީހުން މަރާލުން" ނުވަތަ އެކްސްޓްރާޖުޑީޝަލް ކިލިންގްސްގެ ގޮތުގައި ކަނޑައަޅައި ކުށްވެރިކުރަމުންދާ މިފަދަ ހަމަލާތަކުގެ ތެރެއިން އެންމެ ފަހުން ހިނގި ހާދިސާއެވެ. ނަމަވެސް ޑޮނަލްޑް ޓްރަމްޕްގެ ސަރުކާރުން ބުނަމުންދަނީ މިފަދަ ހަމަލާތަކަކީ މަސްތުވާތަކެތީގެ ވިޔަފާރިކުރާ ޓެރަރިސްޓުންނާ ދެކޮޅަށް ދެވޭ ހަމަލާތަކެއް ކަމަށެވެ.

މި ހަމަލާއަށްފަހު އެ އުޅަނދުގައި ތިބި ހަ ފިރިހެނަކު ސަލާމަތްވެފައިވާ ކަމަށް އެމެރިކާގެ ސަދަން ކޮމާންޑުން ބުނެއެވެ. އަދި އެ މީހުން ހޯދައި ސަލާމަތްކުރުމުގެ މަސައްކަތް ކުރުމަށް އެމެރިކާގެ ކޯސްޓް ގާޑަށް މިހާރު އަންގާފައިވާ ކަމަށްވެސް އެ އިދާރާއިން ބުނެފައިވެއެވެ.

އެމެރިކާގެ އަސްކަރިއްޔާއިން އެކްސްގައި ކުރި ޕޯސްޓެއްގައި ބުނެފައިވަނީ، އިންޓެލިޖެންސް މައުލޫމާތުން ކަށަވަރުވާ ގޮތުގައި އެ އުޅަނދަކީ ކެރީބިއަން ކަނޑުގައި މަސްތުވާތަކެތި އުފުލުމަށް އާންމުކޮށް ބޭނުންކުރާ މަގުތަކުން ދަތުރުކޮށް، މަސްތުވާތަކެތީގެ ވިޔަފާރީގެ އޮޕަރޭޝަންތަކުގައި ބައިވެރިވަމުންދިޔަ އުޅަނދެއް ކަމަށެވެ.

މަސްތުވާތަކެތި އުފުލާ ކަމަށް ތުހުމަތުކުރެވޭ އުޅަނދުތަކަށް ހަމަލާދިނުމަށް އެމެރިކާގެ އަސްކަރިއްޔާ ބޭނުންކުރުމަކީ، މީގެ ކުރިން އެމެރިކާއިން މިފަދަ މައްސަލަތަކުގައި އަމަލުކުރަމުން އައި އުސޫލުތަކާ ވަރަށް ބޮޑަށް ތަފާތު، އާދަޔާ ހިލާފު ނިންމުމެކެވެ.