އީރާންގެ ޓީމަށް ވިސާ ދިނުމަކީ ވެސް ވަރަށް ބޮޑު ކަމެއް: އެމެރިކާގެ ޓާސްކް ފޯހުގެ އިސްވެރިޔާ

އެމެރިކާ އާއި މެކްސިކޯ އަދި ކެނެޑާގައި ކުރިއަށްދާ ފީފާ ވޯލްޑް ކަޕްގައި ވާދަ ކުރާ އީރާންގެ ޓީމަށް، އެމެރިކާ އަށް އެތެރެވުމުގެ ވިސާ ދިނުމަކީ ވެސް ހައިރާން ކުރުވަނިވި ކަމެއް ކަމަށް އެންޑްރޫ ގިއުލިއާނީ ވިދާޅުވެއްޖެ އެވެ.

ގިއުލިއާނީ އަކީ ވޯލްޑް ކަޕަށް ތައްޔާރުވުމުގެ ގޮތުން އެމެރިކާގެ ރިޔާސީ ގަނޑުވަރު ވައިޓް ހައުސް އިން އެކުލަވާލާފައިވާ ޓާސްކު ފޯހުގެ އިސްވެރިޔާ އެވެ. އެމެރިކާ އިން އީރާން އަށް އެތައް ދަތި ކުރުން ތަކެއް ކުރިމަތި ކޮށްފައިވާއިރު، އެމެރިކާ އިން އަންނަނީ އެކަންކަން ދިފާއުކޮށް ވާހަކަ ދައްކަމުންނެވެ. 

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ އިސް އޮފިޝަލެއްގެ ގޮތުގައި ވެސް ހުންނަވާ ގިއުލިއާނީ މިހެން ވިދާޅުވީ، އީރާންގެ ޓީމާ މެދު އެމެރިކާ އިން ކަންތައް ކުރަމުން އަންނަ ގޮތާ ގުޅޭ ގޮތުން އަމާޒު ވަމުންދާ ފާޑު ކިޔުން ތަކަށް ރައްދު ދިނުމުގެ ގޮތުންނެވެ. އޭނާ ވަނީ އީރާންގެ ޓީމާ މެދު އެމެރިކާގެ ސަރުކާރުން ގެންގުޅޭ ސިޔާސަތުތައް ވަރަށް ބޮޑަށް ދިފާއު ކުރައްވައިފަ އެވެ. 

މުބާރާތުގައި ވާދަ ކުރާ އީރާާންގެ ޓީމަށް ވިސާ ދޫކުރި ނަމަވެސް، އެމެރިކާގެ ހަރުކަށި އުސޫލު ތަކުގެ ސަބަބުން އެ ޓީމަށް މަޖުބޫރުވެފައި ވަނީ މެކްސިކޯގައި ކޭމްޕު ކުރުމަށެވެ. އެހެންކަމުން، މެޗުތައް ކުޅުމަށްޓަކައި އީރާާންގެ ކުޅުންތެރިންނާއި އޮފިޝަލުންނަށް ޖެހެނީ ކޮންމެ މެޗަކަށް މެކްސިކޯ އިން އެމެރިކާ އަށް އައިސް، އަދި މެޗު ކުޅުމަށް ފަހު އަނބުރާ މެކްސިކޯ އަށް ދިޔުމަށެވެ. 

މި އިންތިޒާމުތަކާ ގުޅޭ ގޮތުން ވާހަކަ ދައްކަމުން ގިއުލިއާނީ ވިދާޅުވީ، ދެ ޤައުމުގެ ދެ މެދުގައި އޮތް ސިޔާސީ ނުތަނަވަސް ކަމަށް ބަލާއިރު، އީރާންގެ ޓީމަށް އެމެރިކާގެ ވިސާ ލިބުމަކީ ވެސް "ވަރަށް ބޮޑު" ކަމެއް ކަމަށެވެ. އަދި އެމެރިކާގެ ސަލާމަތީ ކަންކަން ހުރި ގޮތުންނާއި، މިހާރުގެ ސިޔާސަތުތަކުގެ ދަށުން މިފަދަ ފުރުސަތު ލިބުމަކީ ވެސް ހައިރާންވާން ޖެހޭ ކަމެއް ކަމަށް އޭނާ ފާހަގަ ކުރެއްވި އެވެ. 

އީރާންގެ ޓީމާ ދިމާވެފައިވާ މި ދަތިތަކާ ގުޅިގެން ކުޅިވަރުގެ ދާއިރާގެ ގިނަ ބަޔަކު އަންނަނީ ކަންބޮޑުވުން ފާޅު ކުރަމުންނެވެ. ނަމަވެސް، ވައިޓް ހައުސްގެ ޓާސްކް ފޯހުން ޤަބޫލު ކުރާ ގޮތުގައި، މިހާރު ހަމަޖެހިފައިވާ އުސޫލަކީ އެމެރިކާގެ ޤައުމީ ސަލާމަތަށް ބަލާއިރު އެންމެ އެކަށީގެންވާ ގޮތެވެ. 

މި މައްސަލަ އަކީ ބައިނަލްއަޤުވާމީ ކުޅިވަރު މައިދާނުގައި ސިޔާސީ ނުފޫޒު ވަދެފައިވާ މިންވަރު ހާމަ ކޮށްދޭ ކަމެއްގެ ގޮތުގައި ގިނަ ބަޔަކު ދަނީ ސިފަ ކުރަމުންނެވެ. ޚާއްސަކޮށް ވޯލްޑް ކަޕް ފަދަ ބޮޑު މުބާރާތެއްގައި ބައިވެރިވާ ޓީމަކަށް މިފަދަ ދަތިތަކާ ކުރިމަތިލާން ޖެހުމަކީ މުބާރާތުގެ ރޫޙާ ޚިލާފު ކަމެއް ކަމަށް ބައެއް ފަރާތް ތަކުން ބުނެ އެވެ.