މުލަކު ފިޓްނަސް ސެންޓަރުގެ ޤާއިމު ކުރަން ކުރީ ސަރުކާރުން ގިނަ މަސައްކަތް ތަކެއް ކުރި: މިނިސްޓަރު ރާފިޢު

މ.އަތޮޅު މުލަކުގައި ދާދި ފަހުން ހުޅުވި ފިޓްނަސް ސެންޓަރު ޤާއިމު ކުރުމަށް، ކުރީގެ ސަރުކާރުން ވަރަށް ގިނަ މަސައްކަތް ތަކެއް ކޮށްފައިވާ ކަމަށް ކުޅިވަރު ވަޒީރު ޢަބްްދުﷲ ރާފިޢު ވިދާޅުވެއްޖެ އެވެ. 

މުލަކު ފިޓްނަސް ސެންޓަރު ހުޅުވައި ދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު އެވެ. ސަރުކާރުން ވަނީ މި ދެ މަޝްރޫއުގެ މަސައްކަތް ނިންމައި، އެކަމުގެ ކާމިޔާބީ ފާހަގަ ކޮށްފައި އެވެ. އެ ސެންޓަރު ހުޅުވުމަށް ބޭއްވި ރަސްމިއްޔާތުގައި މިނިސްޓަރު ރާފިޢު ވަނީ އެ މަޝްރޫއު ކުރިއަށް ދިޔަ ގޮތް ހިއްސާ ކުރައްވައިފަ އެވެ. 

އެގޮތުން މިނިސްޓަރު ވިދާޅުވީ އެ ސެންޓަރުގެ ބިންގާ އެޅުނީ 2008 ވަނަ އަހަރު ކަމަށެވެ. އަދި އޭގެ ފަހުން 2012 ވަނަ އަހަރު ސްޕޯޓްސް މިނިސްޓްރީ އާއި ކައުންސިލް ގުޅިގެން މަސައްކަތް ތަކެއް ކުރި ނަމަވެސް، ކުރިއަށް ނުދާ ކަމަށް މިނިސްޓަރު ވިދާޅުވި އެވެ.

އޭގެ ނުވަ އަހަރު ފަހުން، 2021 ވަނަ އަހަރު އެ މަސައްކަތް ބަޔަކާ ހަވާލު ކުރި ކަމަށާއި، އެ މަޝްރޫއުގެ ގިނަ މަސައްކަތް ތަކެއް ކުރިއަށް ގެންދިޔަ ކަމަށް މިނިސްޓަރު ވަނީ ވިދާޅުވެފައި އެވެ. ނަމަވެސް، މި ސަރުކާރު އައިއިރު މަޝްރޫއު ނުނިމި އޮތް ކަމަށާއި، ބާކީ ބައި ސަރުކާރުން ކުރިއަށް ގެންދިޔަ ކަމަށް ފާހަގަ ކުރެއްވި އެވެ. 

އެކަމާ ގުޅޭ ގޮތުން މައުލޫމާތު ދެއްވަމުން މުލަކު ކައުންސިލްގެ ކުރީގެ މެމްބަރަކު ވިދާޅުވީ، އެއީ މި ސަރުކާރުން މަސައްކަތް ފަށައިގެން ނިންމާފައިވާ މަޝްރޫއެއް ނޫން ކަމަށެވެ. އެންމެ ފުރަތަމަ ރައްޔިތުންގެ ބަޖެޓުން މަސައްކަތް ފެށި ނަމަވެސް، ފާއިތުވި ހުރިހާ ސަރުކާރެއްގައި ވެސް އެ މަޝްރޫއުގެ މަސައްކަތް ކޮށްފައިވާ ކަމަށް އެ ބޭފުޅާ ވިދާޅުވި އެވެ. އެންމެ ފަހުން 2021 ވަނަ އަހަރު އެ މަސައްކަތް ބަޔަކާ ހަވާލުކޮށް، މި ސަރުކާރު އައިއިރު، ބޮޑު އިންސަައްތައެއް ނިމިފައިވާ ކަމަށް ވިދާޅުވި އެވެ. 

މީގެ އިތުރުން ސަރުކާރުން ދާދި ފަހުން ހުޅުވި ވ.ފުލިދޫ އައުޓް ޑޯ ވޮލީ ކޯޓުގެ މަޝްރޫއަކީ ކުރީގެ ރައީސް އިބްރާހީމް މުޙައްމަދު ޞޯލިޙުގެ ސަރުކާރުގައި މަސައްކަތް ފަށާފައިވާ ދެ މަޝްރޫއެވެ. އެގޮތުން ފުލިދޫ ވޮލީ ކޯޓުގެ މަސައްކަތް ކުރުމަށް ބަޔަކާ ހަވާލު ކޮށްފައި ވަނީ 2021 ވަނަ އަހަރު އެވެ.

މީގެ ކުރިން ވެސް މި ސަރުކާރުން ވަނީ، ކުރީގެ ސަރުކާރުން ރަށް ރަށުގައި ފަށާފައިވާ ބައެއް ކުޅިވަރު މަޝްރޫއު ތަކުގެ ނިމުން ފާހަގަކޮށް، އެކަމުގެ ކްރެޑިޓް ނެގުމަށް މަސައްކަތް ކޮށްފައި އެވެ. އެގޮތުން ފުޓްސަލް ދަނޑު ތަކާއި، ވޮލީ ކޯޓު ތަކުގެ އިތުރުން އައުޓް ޖިމް ހުޅުވުމުގެ ކްރެޑިޓް ސަރުކާރުން ނަގަން މަސައްކަތް ކޮށްފައިވެ އެވެ.