ސްޕޯޓްސް އެވޯޑްސްގެ ނޮމިނޭޝަންތަކާ މެދު އެތައް ބައެއްގެ ފާޑު ކިޔުން

މޯލްޑިވްސް ސްޕޯޓްސް އެވޯޑްސް ހަފްލާ އާދީއްތަ ދުވަހުގެ ރޭ އޮންނައިރު، އެތައް ބައެއް ފާޑު ކިޔުމާއި، ނުރުހުން އެވޯޑަށް ނޮމިނޭޓުވެފައިވާ ގޮތަށް އަމާޒުވެއްޖެ އެވެ. 

ސަރުކާރުން އެންމެ ފުރަތަމަ މި ބާއްވަނީ 2024 ވަނަ އަހަރުގެ އެވޯޑު ޙަފްލާ އެވެ. މިދިޔަ އަހަރު ބާއްވަން އޮތް އެވޯޑު ޙަފްލާ ނުބޭއްވި، ކުޅިވަރު ވުޒާރާ އިން ނިންމީ އެންމެ ފުރަތަަމަ ބާއްވާނީ 2024 ގެ އެވޯޑު ޙަފްލާ ކަމަށެވެ. އަދި 2025 ވަނަ އަހަރުގެ އެވޯޑު ޙަފްލާ މިއަހަރުގެ ފަހު ކޮޅު ބާއްވާނެ ކަމަށް ވެސް ހާމަ ކޮށްފައިވެ އެވެ. 

ކުޅިވަރު ވުޒާރާ އިން ވަނީ އެވޯޑުގެ ނޮމިނޭޝަންތައް އިއުލާން ކޮށްފަ އެވެ. ނަމަވެސް، އެވޯޑުގެ ނޮމިނޭޝަންތަކާ މެދު ގިނަ ބަޔަކު ވަނީ ފާޑު ކިޔަން ފަށައިފަ އެވެ. އަދި ކުޅިވަރު ތަކުން ކުޅުންތެރިން ނޮމިނޭޓު ކޮށްފައިިވާ ގޮތާ މެދު ވެސް ގިނަ ބަޔަކު ވަނީ ސުވާލު އުފައްދައިފަ އެވެ. އެއާ އެކު، ކުޅިވަރު ވުޒާރާ އިން ބުނެފައި ވަނީ ނޮމިނޭޝަންތައް ހުށަހަޅަނީ ކުޅިވަރު އެސޯސިއޭޝަން ތަކުން ކަމަށެވެ. ނޮމިނޭޝަން ނެތީ، އެސޯސިއޭޝަން ތަކުން ނޮމިނޭޝަން ހުށަ ނާޅާ ކުޅިވަރު ތަކުން ކަމަށް ވެސް އެ ވުޒާރާ އިން ބުނެފައިވެ އެވެ.

އެވޯޑަށް ނޮމިނޭޓު ވެފައިވާ ގޮތާ މެދު އެތައް ބައެއްގެ ފާޑު ކިޔުން އަމާޒުވެފައިވާއިރު، އެވޯޑަށް ނޮމިނޭޓުވި ކަމަށް އެންގުމަށް ފަހު، ފައިނަލް ނޮމިނޭޝަން ޕޯސްޓު އާންމު ކުރިއިރު ލިސްޓުން އުނިވެފައިވާ ކަމުގެ ޝަކުވާ ވެސް ވަނީ ބޮޑުވެފަ އެވެ. އެކަމާ ގުޅުން ހުރި ބައެއް ޕޯސްޓުތައް ވެސް ސޯޝަލް މީޑިއާގައި ވަނީ ދައަރުވެފަ އެވެ. 

މީގެ އިތުރުން ބައެއް ކުޅުންތެރިންނާ ދެކޮޅަށް އެސޯސިއޭޝަން ތަކުން މަސައްކަތް ކުރަމުން ދާ ކަމުގެ ތުހުމަތު ވެސް އަމާޒުވެފައިވެ އެވެ. އެގޮތުން ހޯދާފައިވާ ބައެއް ބައިނަލްއަޤުވާމީ މެޑަލްތަކުގެ ސެޓްފިކެޓު ނެތް ކަމަށް އަންގައި، އެ މެޑަލް ކެންސަލް ކުރުމަށް ވެސް އަންގާފައިވާ ކަމުގެ ޝަކުވަ ވަނީ ބޮޑުވެފަ އެވެ. އެއާ އެކު، އެވޯޑު ދިނުމުގައި ހަމަހަމަ ކަމާއި، އިންސާފުން ކަންކަން ނުކުރެވޭ ކަމުގެ ތުހުމަތު މިނިސްޓްރީ އާއި، އެސޯސިއޭޝަން އަދި ފަނޑިޔާރުންގެ ޕެނަލް އަށް ވެސް ވަނީ އަމާޒުވެފަ އެވެ.

ހަމަ އެހެންމެ، އެވޯޑުގައި ހިމެނޭ އަހަރުގެ އެންމެ މޮޅު ކުޅިވަރު ނޫސްވެރިޔާ އާއި، އަހަރުގެ އެންމެ މޮޅު ވިޝުއަލް އާޓިސްޓްގެ ނޮމިނޭޝަންތަކާ މެދު ވެސް ސުވާލު އުފައްދާފައިވެ އެވެ. އެގޮތުން ގިނަ ބަޔަކު ކަންބޮޑުވުން ފާޅު ކޮށްފައި ވަނީ، އެންމެ މޮޅު ކުޅިވަރު ނޫސްވެރިޔާގެ އެވޯޑަށް ތަޖުރިބާކާރު ނޫސްވެރިޔާ އައްޒާމް އަލިފުޅު ނޮމިނޭޓު ވެފައި ނުވާތީ އެވެ. ގިނަ ބަޔަކު ބުނެފައި ވަނީ، އެއީ ސިޔާސީ ހަސަދަވެރި ކަމެއްގެ ތެރެއިން ކޮށްފައިވާ ކަމެއް ކަމަށެވެ. 

މިއަހަރުގެ އެވޯޑު ޙަފްލާ ބޭއްވުމަށް ހަމަޖެހިފައި ވަނީ އާދީއްތަ ދުވަހުގެ ރޭ ޒުވާނުންގެ މަރުކަޒުގަ އެވެ.