ސްޕޯޓްސް އެވޯޑްސް އަށް ރައީސް މުޢިއްޒުގެ ދަރިކަލުން އުމެއިރު ނޮމިނޭޓު ވެއްޖެ

މިއަހަރުގެ މޯލްޑިވްސް ސްޕޯޓްސް އެވޯޑްސް އަށް، ރައީސުލްޖުމްހޫރިއްޔާ ޑޮކްޓަރު މުޙައްމަދު މުއިއްޒުގެ ދަރިކަލުން، އުމެއިރު މުޙައްމަދު މުޢިއްޒު ނޮމިނޭޓު ވެއްޖެ އެވެ.

އާދީއްތަ ދުވަހުގެ ރޭ ސްޕޯޓްސް އެވޯޑްސް އޮންނައިރު، އުމެއިރު ނޮމިނޭޓު ވެފައި ވަނީ އަހަރުގެ އެންމެ މޮޅު ޒުވާން ފިރިހެން ކުޅުންތެރިޔާގެ ކެޓަގަރީ އަށެވެ. މި ކެޓަގަރީ އަށް އުމެއިރުގެ އިތުރުން، ހަތަރު ކުޅުންތެރިން ނޮމިނޭޓު ވެފަ އެވެ. އެވޯޑަށް އުމެއިރު ނޮމިނޭޓު ވެފައި ވަނީ ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީ)ގެ ފަރާތުންނެވެ. 

އެވޯޑަށް އުމެއިރު ނޮމިނޭޓު ވެފައިވާއިރު، ގިނަ ބަޔަކު އަންނަނީ އެކަމުގެ ސުވާލު ވެސް އުފައްދަމުންނެވެ. އެގޮތުން އެވޯޑަށް އުމެއިރު ނޮމިނޭޓު ވެފައި ވަނީ ކޮން ގޮތަކުންތޯ އާއި، އުމެއިރު ހޯދާފައިވާ ކާމިޔާބީ ތަކަކީ ކޮބައިތޯ ވެސް ސުވާލު އުފައްދާފައިވެ އެވެ. ސޯޝަލް މީޑިއާގައި އެކަން ފާހަގަ ކޮށްފައިވާ ފަރާތްތަކުން ވަނީ، މިއީ ނުފޫޒުން ކޮށްފައިވާ ކަމެއްގެ ގޮތުގައި ވެސް ސިފަ ކޮށްފަ އެވެ.

އުމެއިރުގެ އިތުރުން ޓީޓީގެ ޒީކް ޙަސަން ލަޠީފް ވެސް ވަނީ އެވޯޑަށް ނޮމިނޭޓުވެފަ އެވެ. ދެން ނޮމިނޭޓު ވެފައި ވަނީ ބޯޑީ ބޯޑިން އެސޯސިއޭޝަންގެ ފަރާތުން އިޔާން އަޙުމަދު އާއި، މުޙައްމަދު އަޒާން އަޙުމަދުގެ އިތުރުން، ސްވިމިން އެސޯސިއޭޝަން އިން މުޙައްމަދު ރިހާމް ޝިހާމް އެވެ.

ސްޕޯޓްސް އެވޯޑަކީ 2022 ވަނަ އަހަރު ރައީސް އިބްރާހީމް މުޙައްމަދު ސޯލިޙުގެ ސަރުކާރުގައި ތައާރަފު ކޮށްފައިވާ އެވޯޑެކެެވެ. ޤަވާއިދުން އެވޯޑު ބާއްވަމުން އައި ނަަމަވެސް، ވެރިކަން ބަދަލުވެ ޤަވާއިދުން އެވޯޑު ބޭއްވިފައި ނުވެ އެވެ. އާދީއްތަ ދުވަހުގެ ރޭ ބާއްވަނީ 2024 ވަނަ އަހަރު ކުޅުންތެރިން ހޯދާފައިވާ ކާމިޔާބީތަކުގެ އެވޯޑު ޙަފްލާ އެވެ. އަދި 2025 ވަނަ އަހަރުގެ އެވޯޑު ޙަފްލާ މިއަހަރުގެ ފަހު ކޮޅު ބާއްވަން ނިންމާފައިވާ ކަމަށް ކުޅިވަރު ވުޒާރާ އިން މައުލޫމާތު ދީފައިވެ އެވެ.

މިއަހަރުގެ އެވޯޑަށް ކުޅުންތެރިން ނޮމިނޭޓު ވެފައިވާ ގޮތާ މެދު ގިނަ ބައެއްގެ ކަންބޮޑުވުން ވަނީ ފާޅު ކޮށްފަ އެވެ. އެގޮތުން އެވޯޑަށް ނޮމިނޭޓުވެފައިވާ ކަމަށް އަންގައި، ފޮޓޯ ވެސް ނެގުމަށް ފަހު، ނޮމިނޭޝަން ރަސްމީކޮށް އިއުލާން ކުރިއިރު އެ ކުޅުންތެރިން ނެތް މައްސަލަ ވެސް ވަނީ ފެންމަތިވެފަ އެވެ.