ފުޓްސަލް އާއި ނެޓުބޯޅަ ކޮމްޕެލްސް ޤާއިމު ކުރަން ހަވާލު ކޮށްފައިވާ ކަމަށް ރައީސް ވިދާޅުވިއިރު، އަމަލީ އެއްވެސް މަސައްކަތެއް ކުރިއަށް ނުދޭ!
1 ޖޫން 2026 | ހޯމަ 07:15ފުޓްސަލް ކޮމްޕްލެކްސް ޤާއިމު ކުރުމަށް ހަމަޖައްސާފައި އޮތީ ހުޅުމާލޭ ފޭސް ދޭއްގައި ހުންނަ ހިޔާ ޓަވަރުގެ ތެރެއިން، 16 ވަނަ ޓަވަރުގެ ކުރިމަތީގައި އޮންނަ ބިމުގައި. ނެޓުބޯޅަ ކޮމްޕްލެކްސް ޤާއިމު ކުރުމަށް ހަމަޖެހިފައި ވަނީ ފޭސް އެކެއްގައި ހުންނަ ޣާޒީ ސްކޫލު ކުރިމަތީގައި އޮންނަ ބިމުގައި.
ހޯމަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް މުޢިއްޒު ވާހަކަ ދައްކަވަނީ. | ރައީސް އޮފީސް
ފުޓްސަލް އާއި ނެޓުބޯޅަ ކޮމްޕެލްސް ޤާއިމު ކުރުމަށް ކުޅިވަރު ވުޒާރާ އިން ބަޔަކާ ހަވާލު ކޮށްފައިވާ ކަމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވީއިރު، އެ ދެ މަޝްރޫއުގެ އަމަލީ އެއްވެސް މަސައްކަތެއް ކުރިއަށް ނުދެ އެވެ.
ހޯމަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް މުޢިއްޒު ވިދާޅުވެފައި ވަނީ، ފުޓްސަލް އާއި ނެޓުބޯޅަ ކޮމްޕްލެކްސް ޤާއިމު ކުރުމަށް ކުޅިވަރު ވުޒާރާ އިން މިހާރު ހަވާލު ކޮށްފައިވާ ކަމަށެވެ. އޭގެ އިތުރުން ބައެއް އެހެން ކުޅިވަރު ތަކުގެ އުމްރާނީ ވަސީލަތްތައް ޤާއިމު ކުރުމަށް ވެސް ހަވާލު ކޮށްފައިވާ ކަމަށް ރައީސް މުޢިއްޒު ވިދާޅުވެފައިވެ އެވެ.
ދެ އަހަރުވީއިރު ވެސް، ފުޓްސަލް އާއި ނެޓުބޯޅަ ކޮމްޕްލެކްސްގެ މައްސަކަތް ނުފެށޭ
ފުޓްސަލް އާއި ނެޓުބޯޅަ ކޮމްޕްލެކްސް ޤާއިމު ކުރުމަކީ ރައީސް މުޢިއްޒުގެ ސަރުކާރުގެ ހަފުތާ 14ގެ ތެރޭގައި ހިމެނޭ ވައުދެކެވެ. ބައިނަލްއަޤުވާމީ މިންގަނޑާ އެއްގޮތަށް ފަރުމާ ކުރެވިފައިވާ ފުޓްސަލް ކޮމްޕްލެކްސް އެއް ހުޅުމާލޭ ފޭސް ދޭއްގައި ޤާއިމު ކުރުމަށް ނިންމާފައިވާއިރު، ބައިނަލްއަޤުވާމީ މިންގަނޑަށް ފަރުމާ ކުރެވިފައިވާ ނެޓުބޯޅަ ކޮމްޕްލެކްސް ޤާއިމު ކުރުމަށް ކަނޑައަޅާފައި ވަނީ ފޭސް އެކެކެވެ.
އެގޮތުން 2024 ވަނަ އަހަރުގެ ފެބްރުވަރީ މަހުގެ 24 ވަނަ ދުވަހު ވަނީ، ހުޅުމާލޭގައި ފުޓްސަލް އާއި ނެޓުބޯޅަ ކޮމްޕްލެކްސް ޤާއިމު ކުރުމަށް ބޭނުންވާ ބިން ހަވާލު ކޮށްފަ އެވެ. އެ ދުވަހުގެ ރަސްމިއްޔާތުގައި ކުޅިވަރު ވުޒާރާ އާއި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ދެމެދު އެއްބަސްވުމުގައި ސޮއި ކޮށްފައިވާއިރު، ކުޅިވަރު ވުޒާރާގެ ފަރާތުން ސޮއި ކުރެެއްވީ ވަޒީރު ޢަބްދުﷲ ރާފިޢު އެވެ. އަދި އެޗްޑީސީގެ ފަރާތުން ސޮއި ކުރެއްވީ އެ ކުންފުނީގެ އޭރުގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު އެވެ.
މީގެ ތެރެއިން ފުޓްސަލް ކޮމްޕްލެކްސް ޤާއިމު ކުރުމަށް ހަމަޖައްސާފައި އޮތީ ހުޅުމާލޭ ފޭސް ދޭއްގައި ހުންނަ ހިޔާ ޓަވަރުގެ ތެރެއިން، 16 ވަނަ ޓަވަރުގެ ކުރިމަތީގައި އޮންނަ ބިމުގަ އެވެ. ފުޓްސަލް ކޮމްޕްލެކްސް ޤާއިމު ކުރުމަށް ކަނޑައަޅާފައިވާ ބިމުގެ ބޮޑު މިނަކީ 54،992 އަކަ ފޫޓެވެ. ފުޓްސަލް ކޮމްޕްލެކްސް ޤާއިމު ކުރުމަށް ކަނޑައެޅި ސަަރަހައްދުގައި އެ ކޮމްޕްލެކްސް ޤާއިމު ކުރުމުގެ އެއްވެސް މަސައްކަތެއް ކުރިއަށް ނުދެ އެވެ. ނަމަވެސް، އެ ސަރަހައްދުގައި މި ފަހުން އެޗްޑީސީ އިން ވަނީ ކުޅިވަރު ކުޅޭ ބައެއް ދަނޑުތައް ޤާއިމު ކޮށްފަ އެވެ.
މީގެ އިތުރުން ނެޓުބޯޅަ ކޮމްޕްލެކްސް ޤާއިމު ކުރުމަށް ހަމަޖެހިފައި ވަނީ ފޭސް އެކެއްގައި ހުންނަ ޣާޒީ ސްކޫލު ކުރިމަތީގައި އޮންނަ ބިމުގައި ކަމަށްވާއިރު، އެއީ 50،142 އަކަ ފޫޓު ބޮޑު މިނުގެ ބިމެކެވެ. ނަމަވެސް، ނެޓުބޯޅަ ކޮމްޕްލެކްސް ޤާއިމު ކުރުމަށް ބިމުގައި އެއްވެސް މަސައްކަތެއް ކުރިއަށް ނުދެ އެވެ. އެ ސަރަހައްދުގައި މިވަގުތު ވެސް ކާރުތަކާއި، ޕިކަޕުތައް ޕާކު ކޮށްފައި ހުރިއިރު، ނެޓުބޯޅަ ކޮމްޕްލެކްސް ޤާއިމު ކުރުމުގެ އެއްވެސް މަސައްކަތެއް އެ ސަރަހައްދުގައި ކުރިއަކަށް ނުދެ އެވެ.
