ސްޕޯޓްސް މިނިސްޓްރީގައި 250، އެނިމަލް މިނިސްޓްރީގައި 50ށް ވުރެ ގިނަ ސިޔާސީ މުވައްޒަފުން އެބަތިބި!
ސްޕޯޓްސް މިނިސްޓްރީ އާއި އެނިމަލް މިނިސްޓްރީގައި ގިނަ އަދަދެއްގެ ސިޔާސީ މުވައްޒަފުން ތިބިކަން ހާމަވެފައިވާއިރު، މީގެ ތެރޭގައި އެއްވެސް މަސައްކަތެއް ނެތް މީހުން ހިމެނޭ ކަމަށް މައުލޫމާތު ލިބޭ. އެގޮތުން ސްޕޯޓްސް މިނިސްޓްރީގައި 291 އަދި އެނިމަލް މިނިސްޓްރީގައި 53 ސިޔާސީ މުވައްޒަފުން އެބަތިބި. މި ސަރުކާރުގައި ސިޔާސީ މުވައްޒަފުންގެ އަދަދު 700 އަށްވުރެ ގިނަ ނުކުރާނެ ކަމަށް ރައީސް މުއިއްޒު ވައުދުވެވަޑައިގެންފައިވާއިރު، ސިޔާސީ މަގާމުތަކުގެ ޖުމްލަ އަދަދު ސިއްރު ކުރުމަށް ދަނީ ވަރަށް ބޮޑަށް މަސައްކަތް ކުރަމުން. މައުލޫމާތު ލިބޭ ގޮތުގައި މިސަރުކާރުގެ ސިޔާސީ މަގާމުތައް 2500ށް ވުރެ އިތުރުވާނެ.
ޕްރެޒިޑެންޓްސް ކަޕްގެ ފައިނަލް މެޗުގައި ރައީސް ޑރ.މުހައްމަދު މުއިއްޒުގެ އަރިހުގައި ސްޕޯޓްސް، ފިޓްނަސް އެންޑް ރެކްރިއޭޝަންގެ މިނިސްޓަރު އަބްދުﷲ ރާފިއު. | ރައީސް އޮފީސް
މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންގައި 200ށް ވުރެ ގިނަ ސިޔާސީ މުވައްޒަފުން އަދި މިނިސްޓްރީ އެގްރިކަލްޗަރ އެންޑް އެނިމަލް ވެލްފެއާގައި 50ށް ވުރެ ގިނަ ސިޔާސީ މުވައްޒަފުން ތިބިކަން ހާމަވެއްޖެ އެވެ.
މައުލޫމާތު ލިބިފައިވާ ގޮތުގައި ސްޕޯޓްސް މިނިސްޓްރީގެ އެކި މަގާމުތަކުގައި ޖުމްލަ 291 މީހުންނަށް ސިޔާސީ މަގާމުތައް ވަނީ ދީފަ އެވެ.
އެއީ 3 ސްޓޭޓް މިނިސްޓަރުުން، 18 ޑެޕިއުޓީ މިނިސްޓަރުން، 114 ސީނިއާ ޕޮލިޓިކަލް ޑިރެކްޓަރުން، 78 ޕޮލިޓިކަލް ޑިރެކްޓަރުން، 20 އެސިސްޓަންޓް ޕޮލިޓިކަލް ޑިރެކްޓަރުން އަދި 56 ޔޫތު އެސޯސިއޭޓުން އެވެ.
މީގެ އިތުރުން އެނިމަލް މިނިސްޓްރީގައި 53 ސިޔާސީ މުވައްޒަފުން ތިބި ކަމަށް މައުލޫމާތު ލިބެ އެވެ.
އެއީ މިނިސްޓަރު ގެ އިތުރުން 3 ސްޓޭޓް މިނިސްޓަރުންނާއި، 6 ޑެޕިއުޓީ މިނިސްޓަރުންނާއި 29 ސީނިއާ ޕޮލިޓިކަލް ޑިރެކްޓަރުން އަދި 14 ޕޮލިޓިކަލް ޑިރެކްޓަރުންނެވެ.
މި ސަރުކާރުގައި ސިޔާސީ މުވައްޒަފުންގެ އަދަދު 700 އަށްވުރެ ގިނަ ނުކުރާނެ ކަމަށް ރައީސް މުއިއްޒު ވައުދުވެވަޑައިގެންފައިވާއިރު، ސިޔާސީ މަގާމުތަކުގެ ޖުމްލަ އަދަދު ސިއްރު ކުރުމަށް ދަނީ ވަރަށް ބޮޑަށް މަސައްކަތް ކުރަމުންނެވެ.
އާއްމު ރައްޔިތުންގެ ފާޑުކިޔުންތަކާއި، ނޫސްވެރިންގެ ސުވާލުތަކާ ގުޅިގެން 15 ޖުލައި 2025 ގައި ރައީސް އޮފީހުން ނެރުނު ބަޔާނެއްގައި ބުނީ އެ ވަގުތު ސިޔާސީ މަގާމުތަކުގައި 922 މުވައްޒަފުން ތިބި ކަމަށެވެ. އަދި ސިޔާސީ މުވައްޒަފުންގެ މައުލޫމާތު ސިއްރު ކުރަން އެތައް މަސައްކަތްތަކެއް ކުރުމަށް ފަހު އެންމެ ފަހުން މި މައުލޫމާތު ހާމަ ކުރި އިރު، ސަރުކާރުގެ ޚަރަދުތައް ކުޑަކުރަން ކަމަށް ބުނެ 2024 ވަނަ އަހަރުގެ ނޮވެމްބަރު މަހު، ސަރުކާރުން ވަކިި ކުރި ކަމަށް ބުނި 248 މުވައްޒަފުންގެ މައުލޫމާތު ހާމަ ކުރަން ވެސް ރައީސް އޮފީހުން ވަނީ ދެކޮޅު ހަދާފަ އެވެ.
އޭގެފަހުން މިއަދާ ހަމައަށް އަދި މިފަހުން ބޭއްވި ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބުގެ އިތުރުން ރިފެރެންޑަމް އިންތިޚާބާ ގުޅިގެން ވެސް ގިނަ ބަޔަކަށް ސިޔާސީ ގޮތުން ވަޒީފާ ދީފައިވެ އެވެ. ނަމަވެސް ޖުމްލަ އަދަދެއް ނޭނގޭ އެވެ.
ސަރުކާރުގެ ސިޔާސީ މަގާމުތަކުގައި ތިބި ބައެއް މީހުންނަކީ ކުރާނެ މަސައްކަތެއް އަދި އިށީންނާނެ ގޮނޑިމޭޒު ވެސް އޮފީހުގައި ނުހުންނަ، އަދި ބައެއް މީހުންނަކީ އޮފީހަށް ހަމަ އެކަނި ސޮއި ކޮށްލަން އަންނަ ބައެއް ކަމަށް މައުލޫމާތު ލިބެ އެވެ. އަދި މިސަރުކާރުގެ ސިޔާސީ މަގާމުތައް 2500ށް ވުރެ އިތުރުވާނެ ކަމަށް މައުލޫމާތު ލިބެ އެވެ.
