ރައީސް މުއިއްޒު މަސައްކަތް މިހާރު ކުރައްވަނީ ކޮންމެ ރަށެއްގެ އިހުތިސާސް ފޭރިގަތުމަށް، ރައްޔިތުން ދެކޮޅަށް ނުކުންނަން ޖެހޭ: ވަހީދު

ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިހާރު މަސައްކަތް ކުރައްވަނީ ކޮންމެ ރަށެއްގެ އިހުތިސާސް އާއި ބިން ފޭރިގަތުމަށް ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެ އެވެ. 

އަންގާރަ ދުވަހުގެ ރޭ އެމްޑީޕީން ބޭއްވި ހަރުގެ ޖަލްސާގައި ވަހީދު ވިދާޅުވީ، ދުނިޔޭގެ ތާރީހުގައި ދެކޮޅުވެރިކަމާއި، ރުޅިވެރިކަން ފުރަތަމަ އައީ ބަޔެއްގެ ޓެރިޓޮރީއަށް ވަނުމުން ކަމަށާއި، މިހާރު ވެސް ބައެއްގެ ސަރަހައްދަށް އެހެން ބަޔަކު އަތްގަދަ ކުރާ ނަމަ ދެކޮޅުވެރިކަން ފެށޭ ކަމަށެވެ. 

މިއީ މަސްލަހަތު އެއްކޮށް ގެއްލޭ ކަމެއްކަން ފާހަގަކުރައްވައި ވަހީދު ވިދާޅުވީ އެމްޑީޕީގެ މަސައްކަތުން ރާއްޖޭގެ ކޮންމެ ރަށެއް ވަށައިގެން އޮތް 700 މީޓަރުން ކަނޑު އޮޅިން އެތެރެ އެރަށުގެ އަމިއްލަ ބައެއްގެ ގޮތުގައި ކަނޑައަޅައި ދީފައިވާ ކަމަށެވެ. ނަމަވެސް ރައީސް މުއިއްޒު މިހާރު ކޮންމެ ރަށެއްގެ އިހުތިސާސް ފޭރި ގަންނަމުންދާ ކަމަށް އޭނާ ވިދާޅުވި އެވެ. 

ވަހީދު ވިދާޅުވީ މިސަރުކާރުގައި ރަށްރަށުގެ ރައްޔިތުންނަށް މިހާރު އެރަށެއް ތަރައްގީ ކުރުމުގެ ބާރެއް ނެތް ކަމަށާއި، ކައުންސިލް ތަކަށް ދިން ބްލޮކް ގްރާންޓާއި، ކައުންސިލަރުންގެ އަދަދު މަދުކޮށް ރައްޔިތުންނާއި، ކައުންސިލްގެ ބާރުަތައް ހިފަހައްޓަމުންދާ ކަމަށެވެ. 

ޑރ.މުއިއްޒު މިހާރު އެގެންދަވަނީ ކޮންމެ ރަށެއްގެ އިހުތިސާސް ފޭރި ގަންނަން ތައްޔާރުވަމުން. ކޮންމެ ރަށެއްގެ ބިން ފޭރިގަންނަން ތައްޔާރުވަމުން އެދަނީ. ބައްލަވާ މަސްމަހާ މެހި ވެސް އެސޮރުގެ އާއިލާ ނުވަތަ ވިހައިގެން އުޅޭ އެއްޗެހި އުޅޭ ސަރަހައްދަށް މީހަކު ކައިރި ވަންޏާ ކޮށައި ގަންނާނެ. ކުކުޅުހާ ވެސް މި ދެންނެވިހެން ހާއްޔާ މީހަކު ކައިރިވާ ކަމަށްވަންޏާ ދެކޮޅު ވެރިކަމުގެ ކޮންމެވެސް ކަމެއް ދައްކާނެ. ހިފައި ގަންނާނެ. ކުރިމަތިލާނެ. ވަލު ޖަނަވާރުން ހުންނަ ކަމެއް އެއީ އޭގެ ޓެރިޓަރީއަށް ދަރިން އުޅޭ ތަނަށް އާއިލާ އުޅޭ ތަނަށް އެހެން މީހަކު ވަދެ ގަންނަންޏާ ދެކޮޅު ވެރިވާނެ. ހަމަލާ ދޭނެ. މަޑެއްކޮށް ނުތިބޭނެ. ރާއްޖޭގެ ކޮންމެ ރަށެއްގެ އިހުތިސާސް ބައްލަވާ މިވީ ދެ އަހަރުގެ ތެރޭގައި އެންމެ ގާނޫޏު އަސާސީއަށް ގެނައި އެންމެ ބަދަލަކު އެހުރީ ޖީބަށް ލައްވައިގެން. 

ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު

މިސަރުކާރުގެ ދެ އަަހަރުގެ ތެރޭގައި ހައްގަކުން ހައްގެއް ނިގުޅައި ގަންނަމުންދާކަން ފާހަގަކުރައްވައި ވަހީދު ވިދާޅުވީ، ދިރިއުޅުމުގެ ހައްގު، އިޖްތިމާއީ ހައްގު، އަދި އިގްތިސާދީ ހައްގުތަކަށް އަރައިގަންނަމުންދާ ކަމަށެވެ. 

ވަހީދު ވިދާޅުވީ ގާނޫނުން ކަށަވަރު ކޮށްދީފައިވާ ހިލޭ ބޭސް ފަރުވާގެ ޚިދުމަތް ނުލިބޭ ކަމަށާއި، އެންމެ އަސާސީ ބޭސް ހޯދުމަށް ވެރިން ގާތަށް ދާން މަޖުބޫރުވެފައިވާ ކަމަށެވެ. އަދި ދައުލަތުން ޔަގީންކަން ދީގެން ރާއްޖެއިން ބޭރަށް ކިޔަވަންދާ ދަރިވަރުންނަށް ކޯސް ފީ ނުލިބި ވެސް ތަކުލީފު އުފުލަން ޖެހިފައިވާ ކަމަށް އޭނާ ވިދާޅުވި އެވެ. 

މިނިވަން ދައުލަތެއް ވެއްޖެއްޔާ ހިނގަންޖެހޭނެ އެންމެ އަސާސީ ސިފައަކީ އެގައުމެއްގައި ލިޔެ ކަނޑައެޅިފައި އޮންނަ ގާނޫނު އަސާސީއާ އެއްގޮތަށް ދައުލަތް ހިންގުން. ބައްލަވާ ލާމަރުކަޒީ ނިޒާމު އެކަންޏެއް ނޫނޭ ހަލާކުކޮށްލައްވައިގެން މިއުޅެނީ. ގާނޫނު އަސާސީގެ 4 ވަނަ މާއްދާ އެހުރީ ހަލާކުކޮށްލައްވައިގެން. 5 ވަނަ މާއްދާ އެހުންނެވީ ޖާބަށް ލައްވައިގެން. 6 ވަނަ މާއްދާ އެހުންނެވީ ގަނޑުބަޑު ކުރައްވައިގެން. 7 ވަނަ މާއްދާ އެ ހުންނެވީ އޮޅާލައްވައިގެން. ގާނޫނު އަސާސީގައި އަސާސީ ހައްގުތައް، ހައްގަކުން ހައްގަކުން އެ ގެންދަނީ އަތުލަމުން ފޭރެމުން އެންމެ ދެ އަހަރުގެ ތެރޭގައި. ގާނޫނު އަސާސީ ކަށަވަރު ކުރޭ ދިރިހުުރުމުގެ ހައްގު. އަޅުގަނޑުމެން މިހާރު ވެރިންނަށް ސަނާ ކިޔައިގެން ވެރިކަމަށް ތަބާވެގެން ކުރުނީސް ކޮށްގެން ނޫނީ ދިރިނޫޅެވޭ ހާލަތަށް ދިވެހި ރައްޔިތުން އަޅުވެތި ކޮށްފި އެންމެ ދެ އަހަރުގެ ތެރޭގައިި.

ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު

ވަހީދު ވިދާޅުވީ ގާނޫނު އަސާސީގެ 22 ވަނަ މާއްދާގައި، އަންނަން އޮތް ޖީލުތަކަށް ދިވެހިރާއްޖޭގެ  ވެށި ސަލާމަތުން ރައްކާތެރިކޮށް ފޯރުވައި ދިނުމަކީ ދައުލަތުގެ ޒިންމާއެއް ކަމަށް ބަޔާން ކޮށްފައިވާ ކަމަށެވެ. ނަމަވެސް ވާދޫ ކަނޑުއޮޅި ހިއްކަމުން ދަނީ ފަނިގަނޑެއް ގިރާހެން ކަމަށާއި، ތިމާވެއްޓަށް ރައްކާތެރި ވުމުގެ ގޮތުން ގެންގުޅެމުން އައި ހުރިހާ ހަމައެއް ނަގާލައި، އީއައިއޭ ހެދުން ވެސް ހުއްޓާލާފައިވާ ކަަމަށް ވަހީދު ވިދާޅުވި އެވެ.

ވަހީދު ވިދާޅުވީ މިއީ ރަނގަޅު ވެރިއެއް ނޫން ކަމަށާއި، އެމަނިކުފާނުގެ ވެރިކަމުގެ ދެ އަހަރުގެ ތެރޭގައި ހައްދަވާފައިވާ ހުރިހާ ދޮގުތަކާ ރައްޔިތުން ކުރިމަތިލުމަށްފަހު، ކުރިއަށް އޮތް ލޯކަލް ކައުންސިލް އިންތިޚާބުގައި މިސަރުކާރަށް ނޫނެކޭ ބުނަން ޖެހޭ ކަމަށެވެ.