މެސީގެ 39 ވަނަ އުފަންދުވަހުގެ ތަހުނިޔާ ކިޔުމަށް ގިނަ އަދަދެއްގެ ރައްޔިތުން މަގުތަކަށް

ވޯލްޑް ކަޕްގައި ލިއޮނަލް މެސީ ދައްކަމުންދާ ރެކޯޑް މުގުރާލަނިވި ކުޅުމުގެ ސަބަބުން އާންމުންނަށް ލިބުނު އުފާވެރިކަމާއެކު، ބުދަ ދުވަހު އުމުރުން 39 އަހަރު ފުރުނު އެ ގައުމުގެ އެންމެ މަގުބޫލު ފުޓްބޯޅަ ކުޅުންތެރިޔާއަށް އުފަންދުވަހުގެ ތަހުނިޔާ ކިޔުމަށް އާޖެންޓީނާގެ ގިނަ އަދަދެއްގެ ރައްޔިތުން މަގުތަކަށް ނުކުމެެއްޖެއެވެ. 

އާޖެންޓީނާގެ ދިދަ ހިފައިގެން ޖިމްތަކުގައި ތިބި ރައްޔިތުންނާއި، ސްކޫލް ކުދިންނާއި، ފިހާރަތަކުގެ މުވައްޒަފުންގެ އިތުރުން އަވަށްޓެރިން ގުޅިގެން ގައުމުގެ އެކި ކަންކޮޅުތަކަށް އެއްވެ، ސޯޝަލް މީޑިއާގައި މެސީއަށް މަރުހަބާގެ މެސެޖުތައް ވަނީ ފުނުވާއެވެ. މީގެ އިތުރުން، ސަޕޯޓަރުން ވަނީ ބިއުނަސް އައިރެސްގެ މެދުތެރޭގައި ހުންނަ މަޝްހޫރު "އޮބެލިސްކް" ބިނާ ކައިރިއަށް ވެސް އެއްވެފައެވެ.

އާޖެންޓީނާގެ ރައީސް ހާވިއޭ މިލެއި ވެސް ވަނީ މެސީއަށް އުފަންދުވަހުގެ ތަހުނިޔާ ފޮނުއްވާފައެވެ. އެމަނިކުފާނުގެ އެކްސް އެކައުންޓުގައި ކުރެއްވި ޕޯސްޓެއްގައި "ލިއޮނަލް މެސީއަށް އުފަންދުވަހުގެ ތަހުނިޔާ" ކިޔުއްވައި، އާޖެންޓީނާއަށް ހިތްވަރު ދެއްވާފައިވެއެވެ. އަށް ފަހަރު ބެލޮންޑިއޯ އެވޯޑް ހޯދާފައިވާ މެސީ ވަނީ މިދިޔަ ހޯމަ ދުވަހު ވޯލްޑް ކަޕްގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑް މުގުރާލާފައެވެ. އޭނާ ވަނީ މި މުބާރާތުގައި މިހާތަނަށް ކުޅުނު ދެ މެޗުން ފަސް ލަނޑު ކާމިޔާބުކޮށްފައެވެ.

އާޖެންޓީނާގެ ކޯޗު ލިއޮނަލް ސަކަލޯނީ، އެ ޓީމުގެ އެންމެ މުހިންމު ކުޅުންތެރިޔާއަށް އުފަންދުވަހުގެ ހެޔޮއެދުންތައް ފޮނުވީ ވަރަށް އާދައިގެ ގޮތަކަށެވެ. ސަކަލޯނީ ބުނީ އޭނާ އެދެނީ މެސީއަކީ އަބަދުވެސް އުފާވެރި މީހެއްގެ ގޮތުގައި ހުރުން ކަމަށެވެ.