ލުބުނާނާއި އިސްރާއީލާ ދެމެދު އެމެރިކާ މެދުވެރިވެގެން އެކުލަވާލި އެއްބަސްވުން ހިޒްބުﷲގެ ލީޑަރު ބަލައިނުގަނެ ބޭރުކޮށްލައިފި

ލުބުނާނާއި އިސްރާއީލާ ދެމެދު އެމެރިކާ މެދުވެރިވެގެން އެކުލަވާލި ސަލާމަތީ އެއްބަސްވުމުގައި ސޮއިކުރިތާ އެއްދުވަސް ފަހުން، ހިޒްބުﷲގެ ލީޑަރު ނައީމް ގާސިމް ހޮނިހިރު ދުވަހު އެ އެއްބަސްވުން ބަލައިނުގަނެ ބޭރުކޮށްލައިފި އެވެ. އޭނާ އެ އެއްބަސްވުން ސިފަކުރެއްވީ އިސްރާއީލުގެ ކުރިމަތީގައި އިސްޖެހުން ނުވަތަ އަމާންދިނުމެއްގެ ގޮތުގަ އެވެ.

ތަކުރާރުކޮށް ހަނގުރާމަ ހުއްޓާލުމުގެ އެއްބަސްވުންތައް އެކުލަވާލަމުންދިޔަ ނަމަވެސް، ހަމަލާތައް ހުއްޓުމެއްނެތި ކުރިއަށްދާކަމުގެ ހެއްކެއްގެ ގޮތުން، އިސްރާއީލުން ހޮނިހިރު ދުވަހު ވަނީ ލުބުނާނުގެ ދެކުނަށް ޑްރޯން ހަމަލާއެއް ދީފަ އެވެ.

ލުބުނާނުގައި އިސްރާއީލުން ހިންގާ ހަނގުރާމައާ ގުޅިގެން ލުބުނާނުގެ އެއް މިލިއަނަށްވުރެ ގިނަ މީހުން ވަނީ އެމީހުންގެ ގެދޮރު ދޫކޮށް ރައްކާތެރި ހިސާބުތަކަށް ބަދަލުވާން މަޖުބޫރުވެފަ އެވެ. ހިޒްބުﷲ އާއި އީރާނުން ބުނާ ގޮތުގައި، މީގެ ދެ ހަފުތާ ކުރިން އީރާނާ ދެކޮޅަށް ފުޅާ ދާއިރާއެއްގައި ކުރަމުންދާ ހަނގުރާމަ ހުއްޓާލުމަށް ސޮއިކުރި ފަހުމުނާމާގެ ދަށުން، ލުބުނާނުގައި ކުރިއަށްދާ ހަމަލާތައް ހުއްޓުވުމަށް ވޮޝިންޓަނުން ވަނީ ވައުދުވެފަ އެވެ.

ހުކުރު ދުވަހު އެއްބަސްވި އޮނިގަނޑުގައިވާ ގޮތުން، ލުބުނާނުގެ ދެކުނުގެ ބައެއް ސަރަހައްދުތަކުން އިސްރާއީލު ސިފައިން މަރުހަލާތަކަކަށް ބަހާލައިގެން ފޭބުމާއެކު، އެ ސަރަހައްދުތަކުގައި ލުބުނާނުގެ އަސްކަރިއްޔާ ރުކުރުވާލަން ޖެހެއެވެ. ނަމަވެސް، އެއްބަސްވުމުގެ އިތުރު ކަންކަން ފުރިހަމަވަންދެން، ފުޅާކޮށްފައިވާ ސަލާމަތީ ސަރަހައްދެއްގައި އިސްރާއީލު ސިފައިންނަށް ވަގުތީ ގޮތުން މަޑުކުރުމުގެ ހުއްދަ އެ އެއްބަސްވުމުގެ ދަށުން ލިބިދެ އެވެ.

ނައީމް ގާސިމް ނެރުއްވި ބަޔާނެއްގައި އެ އެއްބަސްވުމަކީ ބާތިލު އެއްބަސްވުމެއްގެ ގޮތުގައި ކަނޑައަޅުއްވައި، ލުބުނާނުގެ ސަރުކާރުން އަމިއްލައަށް ބައެއް ކަންކަމުގައި ދޫދީ، ގައުމުގެ މިނިވަންކަމާއި އިސްތިގުލާލަށް އުނިކަން ލިބޭ ފަދަ އަމަލުތަކެއް ހިންގާފައިވާ ކަމަށް ތުހުމަތު ކުރެއްވި އެވެ.

އިސްރާއީލު ސިފައިން ފޭބުމާ، ހިޒްބުﷲގެ ހަތިޔާރު އެޅި ބާރުތައް އުވާލުމާ ގުޅުވާފައިވާ މާއްދާތަކަށް އޭނާ ފާޑުވިދާޅުވި އެވެ. އޭނާ ވިދާޅުވި ގޮތުގައި މިއީ އިސްރާއީލުގެ އަސްކަރިއްޔާ އެ ގައުމުގައި ތިބުމަށް ގާނޫނީ ހައިސިއްޔަތު ދިނުން ފަދަ ކަމެއް ކަމަށާއި، މިއީ ހުރިހާ "ރަތް ރޮނގުތަކެއް" ހުރަސްކުރުން ކަމަށެވެ.

އެ ޖަމާއަތުން ހަތިޔާރު އެޅި ހަރަކާތްތައް ކުރިއަށް ގެންދާނެ ކަމަށް ވިދާޅުވަމުން އޭނާ އިތުރަށް ވިދާޅުވީ، އެންމެ ދަތި އުނދަގޫ ހާލަތްތަކުގައި ވެސް ހަނގުރާމައިގެ މައިދާން ދޫކޮށް ނުދާ ކަމަށާއި، ކުރިއަށް އޮތް ތަނުގައި ވެސް މައިދާން ދޫކޮށް ނުދާނެ ކަމަށެވެ.

ލުބުނާނުގެ ދައުލަތުގެ ނޫސް އެޖެންސީން ރިޕޯޓްކޮށްފައިވާ ގޮތުގައި، ހޮނިހިރު ދުވަހު އިސްރާއީލުގެ ޑްރޯނަކުން ވަނީ ނަބަތިއްޔާ އަލް-ފައުގާ އަށް ހަމަލާދީފަ އެވެ. މި ސަރަހައްދަކީ އިސްރާއީލު ސިފައިންގެ ކޮންޓްރޯލްގެ ދަށުގައި ބާއްވާނެ ކަމަށް ބުނެ އެ ގައުމުން އާންމުކުރި ޗާޓުގައިވާ ސަލާމަތީ ސަރަހައްދުން ބޭރުގައިވާ ތަނެކެވެ.

އިސްރާއީލުގެ އަސްކަރިއްޔާއިން ރޮއިޓާސްއަށް މައުލޫމާތު ދެމުން ބުނީ، އެ ސަރަހައްދުގައި އެ ގައުމުގެ އެއްގަމު ސިފައިން ނެތުމުން ޑްރޯން ބޭނުންކޮށްގެން ހަމަލާދީފައިވާނެ ކަމަށެވެ. އަދި އެ ހަމަލާ އަމާޒުކުރީ އިސްރާއީލުގެ ފައުޖުތަކަށް ނުރައްކާވެދާނެ ފަދަ މީހަކަށް ކަމަށް ބުނި ނަމަވެސް، އެކަމުގެ އިތުރު ތަފްސީލެއް ނުވަތަ ހެއްކެއް ހާމަކޮށްފައެއް ނުވެ އެވެ.

ނައީމް ގާސިމް ވިދާޅުވީ، ހުކުރު ދުވަހުގެ ވޮޝިންޓަން އެއްބަސްވުމުގެ ބަދަލުގައި، ލުބުނާނުގެ ސަރަހައްދީ އިސްތިގުލާލު ކަށަވަރުކޮށްދޭ، މި މަހުގެ ކުރީކޮޅު އީރާނާއި އެމެރިކާއާ ދެމެދު ވެވުނު ފަހުމުނާމާ އަކީ ހަމަނުޖެހުންތައް ނިމުމަކަށް ގެނައުމުގެ އަސާސް ކަމުގައި ބަލަންޖެހޭނެ ކަމަށެވެ.