އިރާނުގެ ނިއުކްލިއާ މަރުކަޒުތަކަށް އދ. ގެ އިންސްޕެކްޓަރުން ވަންނާނެ: އިންޓަނޭޝަނަލް އެޓޮމިކް އެނާޖީ އެޖެންސީގެ އިސްވެރިޔާ

އިރާނުގެ ނިއުކްލިއާ މަރުކަޒުތަކަށް އދ. ގެ އިންސްޕެކްޓަރުން ވަންނާނެ ކަމުގެ އިޝާރާތެއް، އިންޓަނޭޝަނަލް އެޓޮމިކް އެނާޖީ އެޖެންސީ (އައި.އޭ.އީ.އޭ) ގެ އިސްވެރިޔާ ރަފައެލް މަރިއާނޯ ގްރޮސީ ބުދަ ދުވަހު ދެއްވައިފިއެވެ. މިއީ އެމެރިކާއާއި އިރާނާ ދެމެދު ހިނގަމުންދާ ހަނގުރާމަ ހުއްޓާލުމަށްޓަކައި އެކުލަވާލާފައިވާ ވަގުތީ އެއްބަސްވުމުގެ މުހިންމު ބައެކެވެ.

މިއީ، އިރާނުގެ ނިއުކްލިއާ ރައްކާކޮށްފައިވާ މިންވަރު ދެނެގަތުމުގައި މުހިންމު ދައުރެއް އަދާކުރާ އދ. ގެ އެ އިދާރާއިން މިހާތަނަށް ދީފައިވާ އެންމެ ވަރުގަދަ ޔަގީންކަމެވެ.

2025 ވަނަ އަހަރު އިޒްރޭލުން އީރާނާ ދެކޮޅަށް 12 ދުވަހުގެ ހަނގުރާމައެއް ފެށި ފަހުން، އީރާނުން ވަނީ އައިއޭއީއޭގެ އިންސްޕެކްޓަރުން އެ ގައުމުގެ ނިއުކްލިއާ މަރުކަޒުތަކަށް ވަނުން ހުއްޓުވާފައެވެ. ބެލެވޭ ގޮތުގައި އެ މަރުކަޒުތަކުގައި އީރާނުން ވަނީ، ނިއުކްލިއާ ބޮމެއް އުފެއްދުމަށް ބޭނުންވާ މިންވަރަށް މުއްސަނދިކޮށްފައިވާ ޔުރޭނިއަމް ރައްކާކޮށްފައެވެ. އަދި ބޮމެއް އުފެއްދުމަށް އީރާނުން ނިންމައިފި ނަމަ، އެ ގައުމުގައި މިހާރު ހުރި ޔުރޭނިއަމްއިން 10 ނިއުކްލިއާ ހަތިޔާރު އުފެއްދުމުގެ ގާބިލުކަން ހުރި ކަމަށް ބެލެވެއެވެ.

އީރާނުގެ ނިއުކްލިއާ ޕްރޮގްރާމަކީ ސުލްހަވެރި ބޭނުންތަކަށް ހިންގާ ޕްރޮގްރާމެއް ކަމަށް އެ ގައުމުން އަބަދުވެސް ބުނަމުންދެއެވެ. ނަމަވެސް، ދުނިޔޭގައި ނިއުކްލިއާ ހަތިޔާރު އުފެއްދުމުގެ ޕްރޮގްރާމެއް ނެތި، 60 އިންސައްތައަށް ޔުރޭނިއަމް މުއްސަނދިކުރާ ހަމައެކަނި ގައުމަކީ އީރާނެވެ.

އީރާނުގެ ނިއުކްލިއާ މަރުކަޒުތައް އިންސްޕެކްޓް ކުރާނެތޯ ނުވަތަ ނޫންތޯ މި ސުވާލާ ގުޅިގެން، އަންގާރަ ދުވަހު އެމެރިކާއާއި އީރާނުން ވަނީ އެއްގަލަކަށް ނާރާ، ތަފާތު ވާހަކަތަކެއް ދައްކާފައެވެ.

ސުނާމީގެ އަސަރުކޮށްފައިވާ ފުކުޝީމާ ޑައިޗީ ނިއުކްލިއާ ޕަވަރ ޕްލާންޓުގައި ބޭއްވި ނޫސްވެރިންގެ ބައްދަލުވުމެއްގައި ގްރޮސީ ވިދާޅުވީ، ސިޔާސީ ބަޔާންތަކަކީ ހަގީގަތުގެ ބައެއް ކަމަށް ގަބޫލުކުރައްވާ ކަމަށެވެ. ނަމަވެސް، އެންމެ މުހިންމު ކަމަކީ ދެ ގައުމުގެ ރައީސުން ސޮއިކުރައްވާފައިވާ ފަހުމުނާމާއެއް (އެމްއޯޔޫ) އޮތްކަން ހަނދާންކޮށްދިނުން ކަމަށް އޭނާ ވިދާޅުވިއެވެ.

އެ އެއްބަސްވުމުގައި، ނިއުކްލިއާ މަރުކަޒުތަކުގައި ކުރިއަށްގެންދާ ހުރިހާ ހަރަކާތްތަކެއް އައިއޭއީއޭގެ ބެލުމުގެ ދަށުން ހިނގާނެކަން ސާފު އިބާރާތުން ބަޔާންކޮށްފައިވާ ކަމަށް ގްރޮސީ ވިދާޅުވިއެވެ.

މީގެ އިތުރުން ގްރޮސީ ވިދާޅުވީ، އެ މަސައްކަތް ކުރުމަށްޓަކައި އިންސްޕެކްޝަންތައް ކުރިއަށް ގެންދަންޖެހޭ ކަމަށެވެ. އަދި އެކަން ހިނގާނީ މާދަމާ ނޫން އަނެއް ދުވަހުތޯ، ނުވަތަ އެއް ހަފުތާ ފަހުންތޯ ނުވަތަ ދިހަ ދުވަސް ފަހުންތޯ އެއީ މުހިންމު ކަމެއް ނަމަވެސް، އެންމެ އަސާސީ ކަމަކީ އެކަން ހިނގާނެކަން ކަމަށް އޭނާ ވިދާޅުވިއެވެ.

މި އިންސްޕެކްޝަންތަކަކީ އެމެރިކާއާއި އީރާނުގެ އެއްބަސްވުމުގެ އެންމެ މުހިންމު ބައެވެ. އެ އެއްބަސްވުމުގައިވާ ގޮތުން، އީރާނުން މުއްސަނދިކޮށްފައިވާ ޔުރޭނިއަމްގެ މިންވަރު ދަށްކޮށް، "ޑައުންބްލެންޑް" ކުރަން ޖެހެއެވެ.