އިސްރާއީލު: ހިޒްބުﷲގެ ހަތިޔާރު އަތުލަންދެން ލުބުނާނުން ނުފައިބާނަން
ލުބުނާނުގެ ދެކުނުގައި ހަރަކާތްތެރިވާ ހިޒްބުالله ޖަމާއަތުގެ ހަތިޔާރު އެއްކޮށް އަތުލައި، އެ ސަރަހައްދަކީ ހަތިޔާރު ނެތް ތަނަކަށް ހެދުމުގެ ކުރިން އިސްރާއީލު ސިފައިން ފަހަތަށް ނުޖެހޭނެ ކަމަށް އެ ގައުމުން ބުނެފި. އެމެރިކާ މެދުވެރިވެގެން ވޮޝިންގޓަނުގައި ކުރިއަށްދާ މަޝްވަރާތަކުގައި ދެ ގައުމުން އެއްބަސްވުމަކާ ގާތަށް ގޮސްފައިވާ ކަމަށް އެމެރިކާގެ ސެކްރެޓަރީ އޮފް ސްޓޭޓް ވިދާޅުވި ނަމަވެސް، އިސްރާއީލުން ބުނަނީ އެ ގައުމުގެ ސަލާމަތް ކަށަވަރު ކުރުމަށްޓަކައި ބޯޑަރު ކައިރީގައި އެއްވެސް ޓެރަރިސްޓް ޖަމާއަތަކަށް ފުރުސަތު ނުދޭނެ ކަމަށް.
އިސްރާއީލުގެ އަސްކަރިއްޔާއިން އިންތިޒާމުކޮށްގެން، އެ ލަޝްކަރާއެކު ހަރަކާތްތެރިވުމުގެ ފުރުސަތު ނޫސްވެރިންނަށް ދީގެން 2024 އޮކްޓޫބަރު 13 ގައި ނަގާފައިވާ މި ފޮޓޯއިން ފެންނަނީ، ލުބުނާނުގެ ދެކުނުގެ ބޯޑަރު ކައިރީގައިވާ ނަގޫރާ ސަރަހައްދުގައި ގާއިމުކޮށްފައިވާ އދ. ގެ ވަގުތީ ސުލްހަ ބަލަހައްޓާ ފައުޖު (ޔުނިފިލް) ގެ މަރުކަޒެއްގެ ކައިރީގައި އިސްރާއީލުގެ ސިފައިން ފޯރިމަރަމުންދާ މަންޒަރު. | އޭއެފްޕީ
ވޮޝިންގޓަނުގައި އެމެރިކާ މެދުވެރިވެގެން ކުރިއަށްދާ މަޝްވަރާތަކުގެ ތެރެއިން، ހިޒްބުاللهގެ ހަތިޔާރު އެއްކޮށް އަތުލައި ނިމުމުން ނޫނީ ލުބުނާނުގެ ދެކުނުން އިސްރާއީލުގެ ސިފައިން ނުބާލާނެ ކަމަށް އެ ގައުމުން ބުރާސްފަތި ދުވަހު ބުނެފިއެވެ.
މިދިޔަ މާރިޗު މަހު އީރާނުގެ މަދަދުލިބޭ ވަރުގަދަ ޖަމާއަތެއް ކަމަށްވާ ހިޒްބުالله އިން މެދުއިރުމަތީގެ ހަނގުރާމައިގެ ތެރެއަށް ވަނުމާ ގުޅިގެން، އިސްރާއީލު ސިފައިން ދަނީ ލުބުނާނަށް ވަރުގަދަ ވައިގެ ހަމަލާތަކެއް ދެމުންނެވެ. އަދި އިސްރާއީލުގެ އެއްގަމު ސިފައިން ވެސް ވަނީ ލުބުނާނުގެ ދެކުނުގެ ސަރަހައްދުތަކަށް އަރާފައެވެ.
އިސްރާއީލު ސަރުކާރުގެ ތަރުޖަމާނު ޑޭވިޑް މެންސަރ ނޫސްވެރިންނަށް މައުލޫމާތު ދެއްވަމުން ވިދާޅުވީ، ހިޒްބުالله އަކީ ނުރައްކަލެއްގެ ގޮތުގައި އޮތްހާ ހިނދަކު އަދި އެ ޖަމާއަތުގެ ހަތިޔާރުތައް އަތުލައި، އެ ސަރަހައްދަކީ ހަތިޔާރު ނެތް ތަނަކަށް ހެދުމުގެ ކުރިން ލުބުނާނުގެ ދެކުނުން އިސްރާއީލުގެ ސިފައިން ފަހަތަށް ނުޖެހޭނެ ކަމަށެވެ.
އެމެރިކާގެ ބާރު އެޅުމާއެކު، ލުބުނާނުގެ އޮފިޝަލުން ވަނީ އިސްރާއީލާއެކު ސީދާ މަޝްވަރާތަކެއް މިދިޔަ އޭޕްރިލް މަހު ވޮޝިންގޓަނުގައި ފަށާފައެވެ.
މިހާރު ކުރިއަށްދާ ތިން ދުވަހުގެ މަޝްވަރާތައް ބުރާސްފަތި ދުވަހުގެ ނިޔަލަށް ނިންމާލުމަށް ވަނީ ހަމަޖެހިފައެވެ.
މި މަޝްވަރާތަކާ ގުޅޭގޮތުން ވާހަކަދައްކަވަމުން އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، އަވަށްޓެރި މި ދެ ގައުމުން މިހާރު ތިބީ ވަކި ކަންތައްތަކަކަށް އިގުރާރުވުމާ ވަރަށް ގާތުގައި ކަމަށެވެ.
މި މަޝްވަރާތަކާ ގުޅޭގޮތުން ސުވާލު ކުރުމުން މެންސަރ ވިދާޅުވީ، އިސްރާއީލުގެ އުތުރުގެ ރައްޔިތުންނާއި މުޅި ގައުމުގެ ސަލާމަތާއި ރައްކާތެރިކަން ކަށަވަރު ކުރުމަކީ އެ ސަރުކާރުގެ ޒިންމާއެއް ކަމަށެވެ. އަދި އިސްރާއީލުގެ ބޯޑަރު ކައިރީގައި އެއްވެސް ޓެރަރިސްޓް ޖަމާއަތަކަށް ފުރުސަތު ނުދޭނެ ކަމަށާއި، އިސްރާއީލު ސިފައިން އެ ސަރަހައްދުން ބާލާނީ ލުބުނާނުގެ ދެކުނަކީ ހަތިޔާރު ނެތް ސަރަހައްދަކަށް ހަދައި، ހިޒްބުاللهގެ ހަތިޔާރު އަތުލައި ނިމުމުން ކަމަށް އޭނާ ތަކުރާރުކޮށް ވިދާޅުވިއެވެ.
މީގެ އިތުރުން އޭނާ ވިދާޅުވީ 2024 ވަނަ އަހަރުގެ ތެރޭގައި ވެސް މިފަދަ ހާލަތެއް ކުރިމަތިވި ކަމަށާއި، އެ ފަހަރު ވެސް ހިޒްބުاللهގެ ހަތިޔާރު އަތުލަން ޖެހޭނެ ކަމަށް ބުނި ނަމަވެސް އެކަން އެގޮތަށް ހިނގާފައި ނުވާ ކަމަށެވެ.
