އިޒްރޭލު ސިފައިން ހިފާފައިވާ ލުބުނާނުގެ ބައެއް ސަރަހައްދުތައް އެ ގައުމުގެ އަސްކަރިއްޔާއާ ހަވާލުކުރުމަށް މަޝްވަރާކުރަނީ

އިޒްރޭލާއި ލުބުނާނާ ދެމެދު ކުރިއަށްދާ މަޝްވަރާތަކުގައި، ހިޒްބުﷲއާ ދެކޮޅަށް ކުރަމުންދާ ހަނގުރާމައިގައި އިޒްރޭލު ސިފައިން ހިފާފައިވާ ލުބުނާނުގެ ބައެއް ސަރަހައްދުތައް އެ ގައުމުގެ އަސްކަރިއްޔާއާ ހަވާލުކުރުމަށް އެމެރިކާއިން ހުށަހަޅާފައިވާ ހުށަހެޅުމަކަށް މަޝްވަރާކުރަމުންދާކަމަށް އިޒްރޭލާއި ލުބުނާނުގެ އޮފިޝަލުން ވިދާޅުވެއްޖެއެވެ.

އިޒްރޭލުގެ އޮފިޝަލުން ވިދާޅުވި ގޮތުގައި، މި ސަރަހައްދުތަކާ ހަވާލުވާ ލުބުނާނުގެ ސިފައިންނަކީ އީރާނުގެ މަދަދުލިބޭ ހިޒްބުﷲ ޖަމާއަތާ އެއްވެސް ގުޅުމެއް ނެތް ބައެއްކަން ކަށަވަރުކުރުމަށްޓަކައި، އެމެރިކާއިން އެމީހުން ތަމްރީނުކޮށް ސްކްރީން ކުރާނެއެވެ. އަދި މި އެއްބަސްވުމުގެ ދަށުން ބޯޑަރު ސަރަހައްދުގައި ކަނޑައަޅާފައިވާ ބަފަރ ޒޯނެއްގައި އިޒްރޭލުގެ އަސްކަރީ ހަރަކާތްތައް ކުރިއަށް ގެންދިއުމުގެ ފުރުސަތު އޮންނާނެއެވެ.

މި "ޕައިލެޓް" މަޝްރޫއާ ގުޅޭގޮތުން މަޝްވަރާ ކުރަމުންދަނީ އަންގާރަ ދުވަހު ވޮޝިންގްޓަންގައި ފެށި ލުބުނާނާއި އިޒްރޭލުގެ އޮފިޝަލުންގެ އާ ބުރުގެ ބައްދަލުވުންތަކުގައެވެ.

އިޒްރޭލުގެ އޮފިޝަލުން ދެއްކެވި ވާހަކަތަކާ ގުޅޭގޮތުން ސުވާލު ކުރުމުން، ލުބުނާނުގެ ސަލާމަތީ ބާރުތަކުގެ އިސް އޮފިޝަލަކު ވިދާޅުވީ ވޮޝިންގްޓަންގައި މަޝްވަރާތައް ކުރިއަށްދާ ކަމަށާއި، ބުދަ ދުވަހު ދެ ގައުމުގެ އަސްކަރިއްޔާގެ މެދުގައި ޚާއްސަ ބައްދަލުވުންތަކެއް ބޭއްވޭނެ ކަމަށެވެ. މީގެ ތެރޭގައި ޕައިލެޓް ޒޯންތަކާ ގުޅޭ މަޝްވަރާތައް ހިމެނޭނެ ކަމަށްވެސް އޭނާ ވިދާޅުވިއެވެ.

ލުބުނާނުގެ އޮފިޝަލް އިތުރަށް ވިދާޅުވީ، މި މަޝްވަރާތަކުގައި މައިގަނޑު ގޮތެއްގައި ބަލާނީ އިޒްރޭލު ސިފައިން އެ ސަރަހައްދުތަކުން ފޭބުމަށް ކަނޑައަޅާ ތާވަލަކަށް ކަމަށާއި، އެއްވެސް ރަސްމީ ޕްލޭނެއް ފައިނަލް ވާނީ ބުރާސްފަތި ދުވަހު ބާއްވާ އެންމެ ފަހު ބައްދަލުވުމަށްފަހު ކަމަށެވެ. ނަމަވެސް، ލުބުނާނުގެ ސިފައިން އެމެރިކާއިން ސްކްރީން ކުރާނެ ކަމަށް އިޒްރޭލުން ބުނާ ބުނުމާ ގުޅޭގޮތުން އެ އޮފިޝަލް އެއްވެސް އެއްޗެއް ވިދާޅެއް ނުވެއެވެ.

ނަމަވެސް ހިޒްބުﷲއިން މި ހުށަހެޅުންތަކަށް އިންކާރުކުރުމާއި އީރާނުގެ ނުފޫޒުގެ ސަބަބުން މި ޑިޕްލޮމެޓިކް މަސައްކަތްތަކަށް ވަނީ ގޮންޖެހުންތަކެއް ކުރިމަތިވެފައެވެ.

ހިޒްބުﷲ އާއި އިޒްރޭލާ ދެމެދު އެންމެ ފަހުން މި ފެށުނު ހަނގުރާމައަކީ، އީރާނާއި އެމެރިކާ-އިޒްރޭލާ ދެމެދު ހިނގަމުންދާ ކުރިމަތިލުންތަކުގެ ކުރީކޮޅު، އީރާނަށް ތާއީދުކޮށް ހިޒްބުﷲއިން އިޒްރޭލަށް ހަމަލާދޭން ފެށުމާ ގުޅިގެން ފެށުނު ހަނގުރާމައެކެވެ.

އިޒްރޭލުގެ އުތުރުގެ ސަރަހައްދުތަކަށް ހިޒްބުﷲއިން ދީފާނެ ހަމަލާއަކުން ރައްކާތެރިވުމަށް ކަމަށް ބުނެ، ލުބުނާނުގެ ދެކުނުގެ ސަރަހައްދުތަކަށް އިޒްރޭލު ސިފައިން އަރައި އެ ތަންތަން ހިފާފައިވީ ނަމަވެސް، އާދީއްތަ ދުވަހުން ފެށިގެން ހަމަލާ ބަދަލުކުރުން ހުއްޓާލުމުގެ އެއްބަސްވުމަށް ބޮޑުތަނުން ދަނީ އަމަލުކުރަމުންނެވެ.

ވޭތުވެދިޔަ ހަފުތާގައި އީރާނާއި އެމެރިކާއާ ދެމެދު ސޮއިކުރި ވަގުތީ އެއްބަސްވުމުގެ ދަށުން، ދެ ގައުމާއި އެ ގައުމުތަކުގެ ބައިވެރިން ލުބުނާނު ހިމެނޭހެން ހުރިހާ ފްރަންޓެއްގައި އަސްކަރީ ހަރަކާތްތައް ވަގުތުން އަދި ދާއިމީކޮށް ހުއްޓާލަން ޖެހެއެވެ. އަދި ލުބުނާނުގެ ސިޔާދަތާއި މިނިވަންކަން ކަށަވަރުކޮށްދިނުމަށްވެސް މި އެއްބަސްވުމުގައި ލާޒިމުކުރެއެވެ.