ދެކުނު ކޮރެއާގެ ކުރީގެ ފަސްޓް ލޭޑީ ހަތް އަހަރަށް ޖަލަށްލާން ހުކުމް ކޮށްފި

ދެކުނު ކޮރެއާގެ ކުރީގެ ފަސްޓް ލޭޑީ ކިމް ކިއޮން ހީ، ސިޔާސީ އަދި ވިޔަފާރީގެ މަންފާތަކެއް ހޯދައިދިނުމުގެ ބަދަލުގައި އަގުބޮޑު ގަހަނާއާއި "ޑިއޯ" ބްރޭންޑުގެ އަތްދަބަހެއް ހިމެނޭހެން އަގުބޮޑު ހަދިޔާތަކެއް ގަބޫލުކުރި މައްސަލައިގައި، އެކަމަނާ ހަތް އަހަރަށް ޖަލަށްލުމަށް އެ ގައުމުގެ ކޯޓަކުން ހުކުމްކޮށްފި އެވެ.

ކިމް ކިއޮން ހީ އަކީ، 2024 ވަނަ އަހަރުގެ ފަހުކޮޅު ދެކުނު ކޮރެއާގައި މާޝަލް ލޯ ނުވަތަ އަސްކަރީ ގާނޫނު އިއުލާންކުރަން ކުރި ނާކާމިޔާބު މަސައްކަތާ ގުޅިގެން މަގާމުން ވަކިކޮށްފައިވާ ކުރީގެ ރައީސް ޔޫން ސުކް ޔިއޯލްގެ އަނބިކަނބަލުންނެވެ. ރައީސް ޔޫންގެ މައްޗަށް ވެސް ގިނަ ދައުވާތަކެއް އުފުލައި ޖަލު ހުކުމްތަކެއް އިއްވަމުންދާއިރު، ސޯލް ސެންޓްރަލް ޑިސްޓްރިކްޓް ކޯޓުން ބުނީ ކިމް ވަނީ ފަސްޓް ލޭޑީގެ ނުފޫޒު ބޭނުންކޮށްގެން ވަޒީފާތަކާއި ވިޔަފާރީގެ އެކި ފުރުސަތުތައް ފަހިކޮށްދީފައި ކަމަށެވެ. އަދި އެ މަގާމުގެ ހައިސިއްޔަތުން، ރައީސެއްގެ އަނބިކަނބަލުންނަކީ އަމިއްލަ ނަފްސު ކޮންޓްރޯލްކުރުމާއި ސަމާލުވުމުގައި އެންމެ މަތީ ދަރަޖައިގެ ނަމޫނާ ދައްކަންޖެހޭނެ ފަރާތެއްކަން ވެސް ކޯޓުގެ ހުކުމުގައި ފާހަގަކޮށްފައިވެ އެވެ.

ކޯޓުގެ ހުކުމުގައި އިތުރަށް ބުނެފައިވަނީ، އެފަދަ އިޖުތިމާއީ ޒިންމާތަކަށް ބެލުމެއްނެތި، ދައުވާ ލިބޭ ކިމް ކިއޮން ހީ ވަނީ އެކަމަނާގެ ނުފޫޒު ބޭނުންކޮށްގެން ކަންކަން ފަހިކޮށްދިނުމުގެ ވަސީލަތެއްގެ ގޮތުގައި ތަކުރާރުކޮށް އަގުބޮޑު ތަކެތި ގަބޫލުކޮށްފައި ކަމަށެވެ.

ކިމްގެ ފިރިކަލުން ރައީސްކަމުގެ މަގާމުގައި ހުންނެވި ދުވަސްވަރު، އަގުބޮޑު ތަކެތި ހަދިޔާގެ ގޮތުގައި ހޯއްދަވާފައިވާކަން ކޯޓަށް ވަނީ ސާބިތުވެފައެވެ. މީގެ އިތުރުން ގާތްގަނޑަކަށް 19،000 ޕައުންޑް (ގާތްގަނޑަކަށް 375،000 ދިވެހި ރުފިޔާ) އަށް ވުރެ އަގުބޮޑު "ވެޝެރޮން ކޮންސްޓަންޓިން" ބްރޭންޑުގެ އަތުކުރީ ގަޑިއެއް ވެސް އެކަމަނާ ވަނީ ގަބޫލުކުރައްވާފަ އެވެ.

ކޯޓުން ވަނީ މި ހަދިޔާތައް ފެންނަން ހުރި ނަމަ އެ ތަކެތި ދައުލަތަށް ނެގުމަށް އަމުރުކޮށް، ކިމް ކިއޮން ހީ ގާތްގަނޑަކަށް 32,000 ޕައުންޑުން (ގާތްގަނޑަކަށް 632,000 ދިވެހި ރުފިޔާ) ޖޫރިމަނާކުރުމަށް ވެސް ހުކުމްކޮށްފަ އެވެ.