ދެކުނު ކޮރެއާގެ ބޯޓަކަށް އީރާން އިން ހަމަލާ ދިން ކަމަށް ބުނާ ވާހަކަ އެ ޤައުމުން ދޮގު ކޮށްފި

ހޮރްމޫޒް ކަނޑު އޮޅިން ދަތުރު ކުރި ދެކުނު ކޮރެއާގެ މުދާ އުފުލާ ބޯޓަކަށް އަމާޒުކޮށް އީރާންގެ އަސްކަރިއްޔާ އިން ހަމަލާ ދީފައިވާ ކަމަށް ބުނެ ދެކެވެމުން އަންނަ ވާހަކަތައް، އެ ޤައުމުން ދޮގު ކޮށްފި އެވެ. 

މި ހަފުތާގެ ހޯމަ ދުވަހު ހޮރްމޫޒް ކަނޑު އޮޅިން ދަތުރު ކުރަމުން ދަނިކޮށް، ޕެނަމާގެ ދިދަ ޖަހާފައިވާ "އެޗްއެމްއެމް ނާމޫ" ނަމަކަށް ކިޔާ މި ބޯޓުގައި ގޮވުމެއް ގޮވައި، އަލިފާނުގެ ހާދިސާއެއް ވަނީ ހިނގައިފަ އެވެ. މި ހާދިސާ ހިނގިއިރު، ބޯޓުގައި ޖުމުލަ 24 ފަޅުވެރިން ތިއްބެވެ. 

މި ހާދިސާއާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ، އީރާން އިން އެ ބޯޓަށް ހަމަލާ ދީފައިވާ ކަމަށް ތުހުމަތު ކުރައްްވައިފަ އެވެ. އަދި އެ ސަރަހައްދުގެ ކަނޑު ދަތުރު ފަތުރުގެ ރައްކާތެރިކަން ކަށަވަރު ކުރުމަށް އެމެރިކާ އިން ހިންގާ އޮޕަރޭޝަން ތަކުގައި ބައިވެރިވުމަށް، ޓްރަމްޕް ވަނީ ދެކުނު ކޮރެއާ އަށް ގޮވާލައްވައިފަ އެވެ. 

އެކަމާ ގުޅިގެން އީރާން އިން ނެރުނު ބަޔާނެއްގައި ބުނެފައި ވަނީ، ހޮރްމޫޒް ކަނޑު އޮޅީގައި ދެކުނު ކޮރެއާގެ ބޯޓަށް ލިބުނު ގެއްލުން ތަކުގައި އީރާންގެ އިސްލާމީ ޖުމްހޫރިއްޔާގެ އަސްކަރިއްޔާގެ އެއްވެސް ބައިވެރިވުމެއް ނޯންނާނެ ކަމަށާއި، އެފަދަ ބައިވެރިވުމެއް އޮތް ކަމަށް ބުނެ ދެކެވޭ ވާހަކަތައް ހަރުކަށި އިބާރާތުން ކުށްވެރި ކުރާ ކަމަށެވެ. 

މިއަހަރުގެ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާން އަށް ދިން ހަމަލާ ތަކަށް ފަހު، ހޮރްމޫޒް ކަނޑު އޮޅި އަކީ އީރާންގެ ދިފާއީ ސަރަހައްދުގެ މުހިންމު ބައެއް ކަމަށް އެ ޤައުމުން ތަކުރާރުކޮށް ދަނީ ބުނަމުންނެވެ. އެހެންކަމުން އެ ސަރަހައްދުން ރައްކާތެރިކަމާ އެކު ދަތުރު ކުރުމަށްޓަކައި ކަނޑައެޅިފައިވާ ޤަވާއިދު ތަކަށް ފުރިހަމަ އަށް އަމަލު ކުރަން ޖެހޭނެ ކަމަށް އީރާން އިން ބުނެ އެވެ.

އީރާންގެ ބަޔާނުގައި އިތުރަށް ބުނެފައި ވަނީ، ކަނޑަ އެޅިފައިވާ އުސޫލު ތަކާއި ހަގީގީ ޙާލަތަށް ރިއާޔަަތް ނުކޮށް އަމަލު ކުރުމަކީ ގަސްދުގައި ނޫން ނަމަވެސް، ނުރައްކާތެރި ހާދިސާ ތަކެއް ހިނގުމަށް މެދުވެރިވާނެ ސަބަބެއް ކަމަށެވެ. އަދި މިފަދަ ކަންކަމަށް ސަމާލުކަން ނުދީ، އެ ސަރަހައްދުން ދަތުރު ކުރާ ފަރާތްތަކުން އެކަމުގެ ޒިންމާ އުފުލަން ޖެހޭނެ ކަމަށް ވެސް އީރާން އިން ބުނެފައިވެ އެވެ.