ދެކުނު ކޮރެއާ ގެ ކުރީގެ ރައީސް ޔޫން ސުކް ޔިއޯލް ގެ މައްޗަށް މަރުގެ އަދަބު ދިނުމަށް ހުށަހަޅައިފި

2024 ވަނަ އަހަރުގެ ޑިސެމްބަރު މަހު ދެކުނު ކޮރެއާ ގައި ކުރު މުއްދަތަކަށް "މާޝަލް ލޯ" ނުވަތަ އަސްކަރީ ގާނޫނު އިއުލާނުކުރެއްވި މައްސަލައިގައި، އެ ގައުމުގެ ކުރީގެ ރައީސް ޔޫން ސުކް ޔިއޯލްގެ މައްޗަށް އުފުލާފައިވާ ބަޣާވާތްކުރުމުގެ ދައުވާ ގައި، އޭނާ އަށް މަރުގެ އަދަބު ދިނުމަށް ޚާއްސަ ޕްރޮސިކިއުޓަރު އަންގާރަ ދުވަހު އެދިފި އެވެ.

ޔޫންގެ މައްޗަށް ތުހުމަތު ކުރެވެނީ ބަޣާވާތެއް ރޭއްވެވި ކަމަށެވެ. ދެކުނު ކޮރެއާގެ ގާނޫނުތައް ބުނާގޮތުން މިފަދަ ކުށްތަކަށް ދެވޭނެ އެންމެ ބޮޑު އަދަބަކީ މަރުގެ އަދަބެވެ. ނަމަވެސް، ފާއިތުވި އެތައް އަހަރެއްގެ ތެރޭގައި އެ ގައުމުގައި މަރުގެ އަދަބު ތަންފީޒުކޮށްފަ އެއް ނުވެ އެވެ.

ސޯލް ސެންޓްރަލް ޑިސްޓްރިކްޓް ކޯޓުގައި މައްސަލައިގެ ފަހު ބަސް އިއްވަމުން ޕްރޮސިކިއުޓަރު ވިދާޅުވީ، ވެރިކަމުގެ ބާރުތަކުގައި ދެމިހުންނެވުމަށްޓަކައި ޔޫން އާއި ކުރީގެ ޑިފެންސް މިނިސްޓަރު ކިމް ޔޮން-ހިޔުން ގުޅިގެން، 2023 ވަނަ އަހަރުގެ އޮކްޓޯބަރު މަހުން ފެށިގެން ރޭވުންތަކެއް ރާވަމުން އައިކަން ތަހުގީގަށް ކަށަވަރުވެފައިވާ ކަމަށެވެ.

އުމުރުން 65 އަހަރުގެ ޔޫން ވަނީ މި ތުހުމަތުތަކަށް އިންކާރު ކުރައްވާފަ އެވެ. އޭނާ ވަކާލާތު ކުރައްވާ ގޮތުގައި، ކުއްލި ނުރައްކަލުގެ ހާލަތު އިއުލާނު ކުރުމަކީ ރައީސަށް ލިބިގެންވާ ގާނޫނީ ބާރެކެވެ. އަދި އެ ފިޔަވަޅު އެޅުއްވީ އިދިކޮޅު ޕާޓީތަކުން ސަރުކާރުގެ ހިންގުމަށް ހުރަސްއަޅަމުންދާ ދިއުމާމެދު އިންޒާރު ދެއްވުމަށް ކަމަށްވެސް އެމަނިކުފާނު ވިދާޅުވި އެވެ.

މި މައްސަލައިގައި ސޯލް ސެންޓްރަލް ޑިސްޓްރިކްޓް ކޯޓުން އަންނަ ފެބްރުއަރީ މަހުގެ ތެރޭގައި ހުކުމް ކުރާނެ ކަމަށް ބެލެވެ އެވެ.