އުތުރު ކޮރެއާ އިން ރަޝިއާގެ ކުރްސްކް ސަރަހައްދަށް އިތުރު ސިފައިން ފޮނުވައިފި އެވެ.އުތުރު ކޮރެއާއިން ކުރްސްކް ސަރަހައްދުގައި ފްރަންޓްލައިންގައި ބައިވެރިވާ ސިފައިން ދިޔަކަން ހާމަ ކުރީ ދެކުނު ކޮރެއާގެ އިންޓެލިޖެންސް އޭޖެންސީން ބުރާސްފަތި ދުވަހު އެވެ.ދެކުނު ކޮރެއާ އަދި ހުޅަނގުގެ އިންޓެލިޖެންސް އޭޖެންސީތަކުން ބުނާ ގޮތުގައި، ރަޝިއާ އަށް އެހީތެރިވުމަށް ވޭތުވެދިޔަ އަހަރު އުތުރު ކޮރެއާއިން 10،000 އަށްވުރެ ގިނަ ސިފައިން ފޮނުވާފައިވެއެވެ. މި ސިފައިން ފޮނުވާފައިވަނީ ޔުކްރެއިން އިން ދޭ ކުއްލި ހަމަލާތަކާ ދެކޮޅަށް ހަނގުރާމަ ކުރުމަށެވެ.މި މަހުގެ ކުރީކޮޅު، ކުރްސްކް ސަރަހައްދުގައި ހަނގުރާމަ ކުރަމުންދިޔަ އުތުރު ކޮރެއާގެ ސިފައިން ޖެނުއަރީ މެދުތެރެއިން ފެށިގެން ހަނގުރާމައިގައި ބައިވެރިވެފައި ނުވާކަމަށް ދެކުނު ކޮރެއާއިން ބުނެފައިވެއެވެ. އަދި ޔުކްރެއިން އިން ބުނެފައިވަނީ ގިނަ އަދަދެއްގެ ސިފައިން މަރުވުމާ ގުޅިގެން އެ ސިފައިން އަނބުރާ ގެންގޮސްފައިވާ ކަމަށެވެ.ނަމަވެސް ބުރާސްފަތި ދުވަހު ދެކުނު ކޮރެއާގެ ނެޝަނަލް އިންޓެލިޖެންސް އޭޖެންސީގެ އިސް އޮފިޝަލަކު ހާމަކުރި ގޮތުގައި އެ ސަރަހައްދަށް އަލުން ސިފައިން ފޮނުވައި، އިތުރު ސިފައިން ގެންގޮސްފައިވެއެވެ. އިތުރަށް ފޮނުވި ސިފައިންގެ އަދަދު ދެނެގަތުމުގެ މަސައްކަތް ކުރަމުންދާ ކަމަށް އެ އޮފިޝަލް ބުނެފައިވެއެވެ.