ދެކުނު ކޮރެއާގެ ބޯޓަކަށް ދިން ހަމަލާ ގައި އީރާނުގެ އަސްކަރިއްޔާގެ އެއްވެސް ބައިވެރިވުމެއް ނެތް ކަމަށް ބުނެފި

ހޮރްމޫޒް ކަނޑުއޮޅިން ދަތުރުކުރި ދެކުނު ކޮރެއާގެ އުޅަނދެއްގައި މި ހަފުތާގައި ހިނގި ގޮވުމުގެ ހާދިސާގައި އީރާނުގެ އަސްކަރިއްޔާގެ އެއްވެސް ބައިވެރިވުމެއް ނެތް ކަމަށް ބުނެ، އެ ގައުމުން އެ ތުހުމަތުތައް ބުރާސްފަތި ދުވަހު ދޮގުކޮށްފިއެވެ.

ޕެނަމާގެ ދިދަ ނަގައިގެން 24 ފަޅުވެރިންނާއެކު ދަތުރުކުރި "އެޗްއެމްއެމް ނާމޫ" ނަމަކަށް ކިޔާ މުދާ އުފުލާ ބޯޓުގައި މި ގޮވުމާއި އަލިފާނުގެ ހާދިސާ ހިނގާފައިވަނީ މިދިޔަ ހޯމަ ދުވަހުއެވެ.

އެމެރިކާގެ ރައީސް ޑޮނަލްޑް ޓްރަމްޕް ފަހުން ވިދާޅުވެފައިވަނީ، އީރާނުން އެ އުޅަނދަށް "ހަމަލާތަކެއް ދީފައިވާ" ކަމަށެވެ. އަދި މިހާރު ދަތުރުފަތުރު ކުރުން ގާތްގަނޑަކަށް ހުއްޓިފައިވާ އެ ކަނޑުއޮޅިން އާންމު ހާލަތުގައި އުޅަނދުފަހަރަށް ދަތުރުކުރެވޭނެ މަގު ފަހިކުރުމަށް އެމެރިކާއިން ހިންގާ އޮޕަރޭޝަންތަކުގައި ބައިވެރިވުމަށް ޓްރަމްޕް ވަނީ ދެކުނު ކޮރެއާއަށް ގޮވާލައްވާފައެވެ.

ތެހެރާނުން ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ، ހޮރްމޫޒް ކަނޑުއޮޅިން ދަތުރުކުރި ކޮރެއާގެ އުޅަނދަށް ލިބުނު ގެއްލުންތަކުގައި އީރާނުގެ އަސްކަރީ ބާރުތަކުގެ  ބައިވެރިވުމެއް އޮތް ކަމަށް ބުނެ ކުރާ ތުހުމަތުތައް ހަރުކަށި އިބާރާތުން ދޮގުކުރާ ކަމަށެވެ.

ނިމިދިޔަ ފެބްރުއަރީ މަހުގެ ފަހުކޮޅު އެމެރިކާއާއި އިޒްރޭލުން އީރާނަށް ހަމަލާދޭން ފެށި ފަހުން، ހޮރްމޫޒް ކަނޑުއޮޅިއަކީ އެ ގައުމުގެ ދިފާއީ ސަރަހައްދުގެ މުހިންމު ބައެއް ކަމަށް އީރާނުން ތަކުރާރުކޮށް ބުނަމުންދާ ކަމަށް އެމްބަސީން ފާހަގަކުރިއެވެ.

އެހެންކަމުން، ހޮރްމޫޒް ކަނޑުއޮޅިން ރައްކާތެރިކަމާއެކު ދަތުރުކުރެވޭނީ ކަނޑައެޅިފައިވާ ގަވާއިދުތަކަށް ފުރިހަމައަށް އަމަލުކޮށްގެން ކަމަށްވެސް އެ ބަޔާނުގައިވެއެވެ.

އީރާނުން އިތުރަށް ބުނެފައިވަނީ، މިފަދަ ހާލަތެއްގައި އިއުލާންކޮށްފައިވާ އިރުޝާދުތަކަށް އިހުމާލުވުމަކީ، ގަސްދުގައި ނޫން ނަމަވެސް ނުރައްކާތެރި ހާދިސާތަކެއް ހިނގުމަށް މެދުވެރިވެދާނެ ސަބަބެއް ކަމަށެވެ.

ޓްރަމްޕްގެ ވާހަކަތަކާ ގުޅިގެން ދެކުނު ކޮރެއާއިން ކުރިން ބުނެފައިވަނީ، އެ ސަރަހައްދުން ދަތުރުކުރާ އުޅަނދުފަހަރަށް ހިމާޔަތް ދިނުމަށް އެމެރިކާއިން ހިންގާ އޮޕަރޭޝަންތަކުގައި ބައިވެރިވުމާ މެދު އެ ގައުމުން ނިންމާފައިވާ ނިންމުން އަލުން މުރާޖައާ ކުރާނެ ކަމަށެވެ.

ނަމަވެސް، ދެކުނު ކޮރެއާގެ ނޭޝަނަލް ސެކިއުރިޓީ އެޑްވައިޒަރު ވީ ސަންގް-ލަކް ބުދަ ދުވަހު ވިދާޅުވީ، "ޕްރޮޖެކްޓް ފްރީޑަމް" ގެ ނަމުގައި ހިންގާ އެ ޕްރޮގްރާމް މެދުކަނޑާލާފައިވާތީ، އެ ނިންމުން މުރާޖައާ ކުރަން މިހާރު ބޭނުންނުވާ ކަމަށެވެ.