ދެކުނު ކޮރެއާގެ ކުރީގެ ފަސްޓް ލޭޑީ ރިޝްވަތު ހިފި މައްސަލައިގައި 20 މަސް ދުވަހަށް ޖަލަށްލުމަށް ހުކުމްކޮށްފި

ދެކުނު ކޮރެއާގެ މަގާމުން ދުރުކޮށްފައިވާ ކުރީގެ ރައީސްގެ އަނބިކަނބަލުން،  ރިޝްވަތު ހިފި މައްސަލައިގައި 20 މަސް ދުވަހަށް ޖަލަށްލުމަށް ހުކުމްކޮށްފި އެވެ.

ނަމަވެސް، އުމުރުން 52 އަހަރުގެ ކިމް ކިއުން ހީގެ މައްޗަށް ކުރެވުނު އެހެން ދައުވާތައް ކަމަށްވާ ހިއްސާގެ އަގުތަކަށް ބަދަލު ގެނައުމަށް ނުފޫޒު ފޯރުވުމާއި، 2022 ވަނަ އަހަރުގެ ރިޔާސީ އިންތިޚާބުގެ ކުރިން ސިޔާސީ ބްރޯކަރެއްގެ އަތުން ޚިޔާލު ހޯދުމުގެ ސާވޭތަކެއް ހޯދި ކަމުގެ ތުހުމަތުތަކުން ކޯޓުން ވަނީ އޭނާ ބަރީއަކޮށްފަ އެވެ. އެ އިންތިޚާބު ކާމިޔާބު ކުރެއްވީ އޭނާގެ ފިރިކަލުން ޔޫން ސުކް ޔިއޯލް އެވެ.

ޔޫން ވަނީ 2024 ވަނަ އަހަރު އަސްކަރީ ގާނޫނު ހިންގުމަށް ކުރި ނާކާމިޔާބު މަސައްކަތާ ގުޅިގެން، ބާރުގެ ބޭނުން ނަހަމަ ގޮތުގައި ހިފުމާއި އިންސާފަށް ހުރަސް އެޅުމުގެ ކުށުގައި ފަސް އަހަރުގެ ޖަލު ހުކުމެއް މިހާރުވެސް ތަންފީޒު ކުރައްވަން ފަށްޓަވައިފަ އެވެ. މިއީ ދެކުނު ކޮރެއާގެ ތާރީޚުގައި ކުރީގެ ރައީސަކާއި އެމަނިކުފާނުގެ އަނބިކަނބަލުން އެއްފަހަރާ ކުށްވެރިވި ފުރަތަމަ ފަހަރެވެ.

ސޯލް ސެންޓްރަލް ޑިސްޓްރިކްޓް ކޯޓުގެ ގާޒީ ވޫ އިން-ސަންގް ބުދަ ދުވަހު ނިންމެވި ނިންމެވުމުގައި ވަނީ، ކިމް އޭނާގެ މަގާމުގެ ބޭނުން ހިފާފައި ވަނީ އަމިއްލަ ފައިދާ ހޯދުމުގެ ވަސީލަތެއްގެ ގޮތުގައި ކަމަށެވެ. "މަގާމު މަތިވިވަރަކަށް، މިފަދަ އަމަލުތަކުން ދުރުހެލިވުމަށް ބޮޑަށް ސަމާލުވާންޖެހޭނެ. ދައުވާ ލިބޭ ފަރާތުން ވަނީ އެކި ހުށަހެޅުންތަކަށް ނޫނެކޭ ބުނުމުގައި ނުކުޅެދި، އަމިއްލަ ނަފްސު ޒީނަތްތެރިކުރުމަށް އިސްކަންދީފައި،" ގާޒީ ވިދާޅުވި އެވެ.

މި މައްސަލަ ތަހުގީގު ކުރި ޚާއްސަ ޓީމުން ބުނި ގޮތުގައި، 2022 ވަނަ އަހަރުގެ އޭޕްރީލް މަހާއި ޖުލައި މަހާ ދެމެދު ކިމް ވަނީ ޔުނިފިކޭޝަން ޗާޗްގެ ފަރާތުން 80 މިލިއަން ވޮންގެ އަގުހުރި ހަދިޔާ ހޯދާފަ އެވެ. މީގެ ތެރޭގައި 'ގްރާފް' ބްރޭންޑްގެ އަލިމަސް ހާރަކާއި 'ޝްނެލް' ބްރޭންޑްގެ ބައެއް އަތްދަބަސްތައް ހިމެނެއެވެ. މިއީ ވިޔަފާރި އަދި ސިޔާސީ އެކި ކަންކަމުގައި އެހީތެރިކަން ފޯރުކޮށްދިނުމުގެ ބަދަލުގައި ދީފައިވާ ތަކެއްޗެވެ.

ތަހުގީގީ ޓީމުން ވަނީ ތިން ދައުވާއަށް ޖުމްލަ 15 އަހަރުގެ ޖަލު ހުކުމަކާއި 2 ބިލިއަން ވޮންގެ ޖޫރިމަނާއެއް ކަނޑައަޅައިދިނުމަށް އެދިފަ އެވެ. ނަމަވެސް ގާޒީ ފާހަގަކުރެއްވި ގޮތުގައި، ކިމް އަކީ އަމިއްލަ އަށް ރިޝްވަތަށް އެދުނު ފަރާތެއް ނޫނެވެ. އަދި އޭނާގެ ކުށުގެ ރެކޯޑެއް މީގެ ކުރިން ނެތުމަކީ ލުއި ހުކުމެއް ދިން ސަބަބެކެވެ. އެހެންނަމަވެސް، 12.85 މިލިއަން ވޮން (ގާތްގަނޑަކަށް 9,000 ޑޮލަރު) އަނބުރާ ދެއްކުމަށާއި، އަލިމަސް ހާރު ދައުލަތަށް ނެގުމަށް ކޯޓުން ވަނީ އަމުރުކޮށްފަ އެވެ.

ކިމްގެ މައްޗަށް އަދިވެސް އިތުރު ތުހުމަތުތަކެއް ކުރެވެއެވެ. އޭގެ ތެރޭގައި ޔުނިފިކޭޝަން ޗާޗްގެ މެންބަރުން އޭނާގެ ފިރިކަލުން ނިސްބަތްވި 'ޕީޕަލް ޕަވަރ ޕާޓީ' އަށް ވެއްދުމަށް މަސައްކަތް ކުރުމާއި، ސަރުކާރުގެ ވަޒީފާތައް ހޯދައިދިނުމުގެ ބަދަލުގައި ހަދިޔާ ހޯދުން ހިމެނެ އެވެ. މި މައްސަލަތަކުގެ އަޑުއެހުންތައް އަދި ނުފެށެއެވެ.

ކުރީގެ ފަސްޓް ލޭޑީ ވަނީ އޭނާގެ މައްޗަށް ކުރެވުނު ހުރިހާ ދައުވާތަކަކަށް އިންކާރު ކުރައްވާފަ އެވެ. އޭނާ ވިދާޅުވީ އެއީ ވަރަށް ބޮޑު ބޭއިންސާފެއް ކަމަށެވެ. ނަމަވެސް ޝްނެލް ދަބަސްތަކެއް ލިބުނު ކަމަށް އޭނާ އެއްބަސްވެވަޑައިގެންނެވިއެވެ. އަދި އެ ތަކެތި ބޭނުން ނުކޮށް އަނބުރާ ދީފައިވާނެ ކަމަށްވެސް ވިދާޅުވި އެވެ.

މިދިޔަ އޯގަސްޓް މަހު ސުވާލު ކުރުމަށް ހާޒިރުވިއިރު އޭނާ ވަނީ އާންމުންގެ ކިބައިން މައާފަށް އެދިފައެވެ. "އަޅުގަނޑު ކަހަލަ އާދައިގެ މީހެއްގެ ސަބަބުން ރައްޔިތުންނަށް ކަންބޮޑުވުންތަކެއް ކުރިމަތިވީތީ ވަރަށް ބޮޑަށް ހިތާމަކުރަން،" އޭނާ ވިދާޅުވިއެވެ.

ކިމް އާއި ޔުނިފިކޭޝަން ޗާޗާ ދެމެދު އޮތް ގުޅުންތައް ތަހުގީގު ކުރުމުގެ ތެރެއިން އެ ޗާޗްގެ ލީޑަރު ހަން ހަކް-ޖާ ވެސް ވަނީ ހައްޔަރުކޮށްފަ އެވެ.

ޖިނާއީ ތުހުމަތުތަކުގެ އިތުރުން، ކިމް އަށް ވަނީ އެހެން ބައެއް މައްސަލަތައް ވެސް ކުރިމަތިވެފަ އެވެ. އެގޮތުން، 1999 ވަނަ އަހަރު ސޫކްމިއުންގް ވިމެންސް ޔުނިވާސިޓީން އޭނާ ހާސިލްކުރި އާޓް އެޑިއުކޭޝަން ޑިގްރީ ވަނީ ބާތިލު ކޮށްފަ އެވެ. އެއީ އޭނާގެ މާސްޓާސް ތީސީސް ކޮޕީކޮށްފައިވާކަން ސާބިތުވުމުމާ ގުޅިގެންނެވެ.