ބަޣާވާތްކުރަން އުޅުނުކަން ސާބިތުވެ، ދެކުނު ކޮރެއާގެ ކުރީގެ ރައީސް ޔޫން އުމުރަށް ޖަލަށް

ދެކުނު ކޮރެއާގައި މާޝަލް ލޯ އިއުލާނުކޮށް، ދައުލަތާ ދެކޮޅަށް ބަޣާވާތް ކުރަން އުޅުނުކަން ސާބިތުވެ، އެ ޤައުމުގެ ކުރީގެ ރައީސް ޔޫން ސުކް ޔޯލް އުމުރަށް ޖަލަށް ލުމަށް ސޯލްގެ ކޯޓަކުން ހުކުމްކޮށްފިއެވެ.

 ބުރާސްފަތި ދުވަހު ސޯލް ސެންޓްރަލް ޑިސްޓްރިކްޓް ކޯޓުން އިއްވި މި ހުކުމަކީ، ޑިސެމްބަރު 2024 ގައި ޔޫން ކުއްލި ނުރައްކަލުގެ ހާލަތު (މާޝަލް ލޯ) އިއުލާނުކުރައްވައި، ރައްޔިތުންގެ މަޖިލިސް  ހިފުމަށް ސިފައިން ފޮނުއްވި މައްސަލައިގައި އިއްވި ހުކުމެކެވެ.

މައްސަލަ ބެއްލެވި ފަނޑިޔާރު ޖީ ގްވީ-ޔޯން ވިދާޅުވީ، ޔޫންގެ މަޤުސަދަކީ ރައްޔިތުންގެ މަޖިލީހުގެ މަސައްކަތްތައް ހުއްޓުވައި، ސިޔާސީ އިދިކޮޅު ފަރާތްތައް ހައްޔަރުކުރުން ކަމަށެވެ. އަދި ހަތިޔާރު އެޅި ސިފައިންނާއި ހެލިކޮޕްޓަރުތައް ޕާލަމެންޓަށް ފޮނުވުމަކީ ބަޣާވާތް ކުރުމުގެ އަމަލެއް ކަމަށް ފަނޑިޔާރު ކަނޑައެޅުއްވިއެވެ.

މި މައްސަލައިގައި ދައުލަތުގެ ޕްރޮސެކިއުޓަރުން އެދުނީ ޔޫންގެ މައްޗަށް މަރުގެ ހުކުމް އިއްވުމަށެވެ. ނަމަވެސް ކޯޓުން އުމުރު ދުވަހުގެ ޖަލު ހުކުމެއް އިއްވީ، އެ ހާދިސާގައި އެއްވެސް މީހެއްގެ ފުރާނަ ގޮސްފައި ނުވާތީއާއި، އެ ހަރަކާތްތައް އެންމެ ފުރިހަމައަށް ރާވާފައި ނުވާތީ ކަމަށް ކޯޓުން ބުންޏެވެ. އަދި އޭނާގެ މައްޗަށް މީގެ ކުރިން އެހެން ކުށެއްގެ ރެކޯޑެއް ނެތުންވެސް ފަނޑިޔާރު ވަނީ ފާހަގަކުރައްވާފައެވެ.

މި މައްސަލައިގައި ޔޫންގެ އިތުރުން، އޭރުގެ ޑިފެންސް މިނިސްޓަރު ކިމް ޔޮންގް-ހިޔުންގެ މައްޗަށްވެސް ކުށް ސާބިތުވެ، 30 އަހަރަށް ޖަލަށް ލުމަށް ވަނީ ހުކުމްކޮށްފައެވެ. އަދި ފުލުހުންނާއި ސިފައިންގެ އިސް ބައެއް އޮފިޝަލުންނަށްވެސް އެކި މުއްދަތުގެ ޖަލު ހުކުމްތައް ވަނީ އިއްވާފައެވެ.

ޔޫންގެ މައްޗަށް އިއްވި މި ހުކުމަކީ ދެކުނު ކޮރެއާގެ ތާރީޚުގައި ވޭތުވެދިޔަ 30 އަހަރު ދުވަހުގެ ތެރޭގައި ޤައުމުގެ ލީޑަރެއްގެ މައްޗަށް ބަޣާވާތްކުރުމުގެ ކުށުގައި ހުކުމްކުރި ފުރަތަމަ ފަހަރެވެ.

ޝަރީއަތުގައި ޔޫން ވަނީ އޭނާގެ މައްޗަށް ކުރެވޭ ތުހުމަތުތަކަށް އިންކާރުކުރައްވާފައެވެ. އަދި ޔޫންގެ ވަކީލުން ވަނީ މިއީ "ކުރިން ލިޔެފައިވާ ސްކްރިޕްޓެއް" ފަދަ ސިޔާސީ ގޮތުން ނިންމާފައިވާ ނިންމުމެއް ކަމަށް ސިފަކޮށް، މި މައްސަލަ އިސްތިއުނާފު ކުރާނެ ކަމަށް ބުނެފައެވެ.

ޑިސެމްބަރު މަހު ޔޫން އިއުލާނުކުރެއްވި މާޝަލް ލޯ އެންމެ 6 ގަޑިއިރު ތެރޭގައި އުވާލަން ޖެހުނުއިރު، އެ ހާދިސާއާ ގުޅިގެން ޤައުމުގައި ބޮޑެތި މުޒާހަރާތަކެއް ކުރެވުނެވެ. އޭގެ ފަހުން ޕާލަމެންޓުން ވަނީ އޭނާ މަޤާމުން ދުރުކޮށްފައެވެ.