133 ފަހަރު ޖަންގްކޫކްގެ ގޭގެ ރަނގަބީލު ޖަހާ، އޭނާއަށް ފާރަލީ އަންހެނަކު ޖަލަށްލުމަށް ހުކުމްކޮށްފި

ދެކުނު ކޮރެއާގެ މަޝްހޫރު ކޭ-ޕޮޕް ބޭންޑް، ބީޓީއެސްގެ މެންބަރު ޖަންގްކޫކްގެ ގެއަށް ތަކުރާރުކޮށް ގޮސް އޭނާއަށް ފާރަލީ ބްރެޒިލްގެ އަންހެނަކު، ޖަލަށްލުމަށް ހުކުމްކޮށްފިއެވެ. މި އަންހެންމީހާ ވަނީ ޖަންގްކޫކްގެ ގެއަށް ނުދިއުމަށް އަންގާފައިވަނިކޮށް، އެއް ދުވަހެއްގެ ތެރޭގައި އެގޭގެ ރަނގަބީލު 133 ފަހަރު ޖަހާފައެވެ.

މި އަންހެންމީހާ ޖަންގްކޫކަށް ފާރަލާން ފަށާފައިވަނީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ. އޭނާ ބުނި ގޮތުގައި ޖަންގްކޫކްގެ ގޭގެ ދޮރުމައްޗަށް ސިޓީއާއި ފޮޓޯތައް ދޫކޮށްފައިވަނީ އޭނާދެކެވާ "ލޯތްބެއްގެ ބޮޑުކަމުން" ނެވެ.

ސޯލްގެ ޑިސްޓްރިކްޓް ކޯޓުން މި އަންހެންމީހާގެ މައްޗަށް ވަނީ އެއް އަހަރު ދުވަހުގެ ޖަލު ހުކުމެއް އިއްވާފައެވެ. ނަމަވެސް، ދެ އަހަރު ދުވަހުގެ މުއްދަތަށް އެ ހުކުމް ތަންފީޒުކުރުން ވަނީ ފަސްކޮށްފައެވެ.

މި ހުކުމް އިސްތިއުނާފުކޮށް ކާމިޔާބު ނުވެއްޖެނަމަ، އޭނާ ދެކުނު ކޮރެއާއިން ޑީޕޯޓްކޮށްލާނެ ކަމަށް ބެލެވެއެވެ.

ކޯޓުގެ ލިޔެކިޔުންތަކުގައި ނަން ހާމަކޮށްފައިނުވާ މި އަންހެންމީހާ، ސޯލްގައި ހުންނަ ޖަންގްކޫކްގެ ގެއަށް އެންމެ ފުރަތަމަ ގޮސްފައިވަނީ މިދިޔަ އަހަރުގެ ޑިސެމްބަރު މަހުގެ 7 ވަނަ ދުވަހުއެވެ. އެ ދުވަހު އޭނާ ވަނީ އެގޭގެ ވަށައިގެން އުޅެ، ފާރުމަތިން އެކި އެއްޗެހި އުކައި، ދޮރުގެ ހުޅުވިފައި ހުރި ތަންތަނުން ސިޓީތައް އެތެރެއަށް ލާފައެވެ.

އޭގެ މަދު ދުވަސްކޮޅެއް ފަހުން އޭނާ އަލުން އެ ގެއަށް ގޮސް 133 ފަހަރު ރަނގަބީލު ޖަހާފައިވެއެވެ. 

މި އަންހެންމީހާ ހައްޔަރުކޮށްފައިވަނީ ޑިސެމްބަރު މަހުގެ 13 ވަނަ ދުވަހުއެވެ. އެ ދުވަހު އޭނާ އެ ގެއަށް ވަދެފައިވަނީ ކާބޯތަކެތި ޑެލިވަރީ ކުރަން އައި މީހެއްގެ ފަހަތުން ގޮސް، ގޭގެ އަރިމަތީ ގޭޓަކުންނެވެ. އޭގެ އަނެއް ދުވަހު އޭނާ ދޫކޮށްލީ އެ ގެއާ ކައިރިނުވުމަށް އިންޒާރު ދިނުމަށްފަހުގައެވެ. 

ޖެހިގެން އައި ހަފުތާތަކުގައިވެސް އޭނާ އެ ގެއަށް ދިއުން ހުއްޓާނުލުމުން، ފުލުހުން ވަނީ އެ ގެއާ 100 މީޓަރު ކައިރިއަށް އޭނާ ދިއުން މަނާކޮށް ކުއްލި އަމުރެއް ނެރެފައެވެ.

އެ އަމުރަށްފަހުވެސް އޭނާގެ އަމަލުތައް ހުއްޓާނުލައި، ތަކުރާރުކޮށް ޖަންގްކޫކްގެ ގެއަށް ދިއުމުން، ފެބްރުއަރީ މަހުގެ ތެރޭގައި ފުލުހުން ވަނީ އޭނާގެ މައްސަލަ ޕްރޮސިކިއުޓަރުންނަށް ފޮނުވާފައެވެ.

ކޯޓަށް ހުށަހެޅި މައުލޫމާތުތަކުން އެނގޭ ގޮތުގައި، އޭނާ ވަނީ ޖުމްލަ 22 ފަހަރު އެ ގެއަށް ގޮސްފައެވެ.

މި މައްސަލައިގައި ހުކުމް އިއްވަވަމުން ޑިސްޓްރިކްޓް ފަނޑިޔާރު ވިދާޅުވީ، އޭނާގެ ފަރާތުން މިފަދަ ކަމެއް ތަކުރާރުވުމުގެ ފުރުސަތު ކުޑަކަމަށް ފެންނާތީ، ހުކުމް އިއްވުމުގައި އެކަމަށް ރިއާޔަތްކޮށްފައިވާނެ ކަމަށެވެ.

މިދިޔަ އަހަރުގެ ޖޫން މަހުގެ ތެރޭގައިވެސް، އުމުރުން 30 އަހަރުގެ ޗައިނާ އަންހެނަކު ވަނީ ޖަންގްކޫކް އަސްކަރީ ހިދުމަތް ނިންމިތާ މަދު ގަޑިއިރުތަކެއްގެ ތެރޭގައި އޭނާގެ ގެއަށް ވަންނަން އުޅެނިކޮށް ހައްޔަރުކޮށްފައެވެ.