މަހާރާޝްތުރާގެ ޑެޕިއުޓީ ޗީފް މިނިސްޓަރު އަޖިތު ޕަވާރު ދަތުރުކުރެއްވި ބޯޓު ވެއްޓިއްޖެ
ޑައިރެކްޓަރޭޓް ޖެނެރަލް އޮފް ސިވިލް އޭވިއޭޝަން (ޑީޖީސީއޭ) އިން ހާމަކޮށްފައިވާ ފުރަތަމަ މައުލޫމާތުތަކަށް ބަލާއިރު، މި ހާދިސާގައި ބޯޓުން ދަތުރުކުރި ފަސް މީހުންގެ ތެރެއިން އެކަކު ވެސް ސަލާމަތްވެފަ އެއް ނުވޭ.
ވެއްޓުނު ލިއަރޖެޓް 45 އަކީ ކެނެޑާގެ ބޮމްބާޑިއަރ އެއަރޯސްޕޭސް ކުންފުނިން އުފައްދާފައިވާ މެދު ސައިޒުގެ ބިޒްނަސް ޖެޓް މަތިންދާބޯޓެކެވެ. 1995 ވަނަ އަހަރާއި 2012 ވަނަ އަހަރާ ދެމެދު މި މޮޑެލްގެ ބޯޓުތައް އުފެއްދި މުއްދަތުގައި، އެ ކުންފުނިން ވަނީ މިފަދަ ގާތްގަނޑަކަށް 640 މަތިންދާބޯޓު އުފައްދާފައެވެ. | އިންޑިއަން އެކްސްޕްރެސް
މަހާރާޝްތުރާގެ ޑެޕިއުޓީ ޗީފް މިނިސްޓަރު އަޖިތު ޕަވާރު ދަތުރުކުރެއްވި ބޯޓު ވެއްޓިއްޖެ އެވެ.
އިންޑިއާގެ ލޯކަލް މީޑިއާ އިން ރިޕޯޓު ކޮށްފައިވާ ގޮތުގައި ބޯޓު ވެއްޓިފައިވަނީ، އުދުހެމުން ދިޔަތާ ގާތްގަނޑަކަށް 35 މިނެޓު ފަހުން ކަމަށް ފްލައިޓް ޓްރެކިންގ ތަފާސްހިސާބުތަކުން ދައްކާ ކަމަށެވެ.
ޑައިރެކްޓަރޭޓް ޖެނެރަލް އޮފް ސިވިލް އޭވިއޭޝަން (ޑީޖީސީއޭ) އިން ހާމަކޮށްފައިވާ ފުރަތަމަ މައުލޫމާތުތަކަށް ބަލާއިރު، މި ހާދިސާގައި ބޯޓުން ދަތުރުކުރި ފަސް މީހުންގެ ތެރެއިން އެކަކު ވެސް ސަލާމަތްވެފައެއް ނުވެ އެވެ.
މިއީ ނުރައްކާތެރި، ސީރިއަސް ހާދިސާއަކަށް ވުމާއެކު، އެއާކްރާފްޓް އެކްސިޑެންޓް އިންވެސްޓިގޭޝަން ބިއުރޯ (އޭއޭއައިބީ) އިން މި ހާދިސާ ތަހުގީގު ކުރާނެ ކަމަށް ބެލެވެ އެވެ.
އަމިއްލަ ކުންފުންޏެއް ކަމަށްވާ "ވީއެސްއާރު އޭވިއޭޝަން" އިން އޮޕަރޭޓްކުރާ، ރަޖިސްޓްރީ ނަންބަރު VT-SSK ގެ މި "ލިއަރޖެޓް 45" މަރުކާގެ ބޯޓު މުމްބާއީގެ ޗަޓްރަޕަތީ ޝިވާޖީ އިންޓަނޭޝަނަލް އެއާޕޯޓުން ނައްޓާލީ ބުދަ ދުވަހު ހެނދުނު 8:10 ހާއިރު އެވެ. ނަމަވެސް، ފްލައިޓްރާޑަރ24 ގެ މައުލޫމާތުތަކަށް ބަލާއިރު، 8:45 ހާއިރު މި ބޯޓު ވަނީ ރާޑަރުން ގެއްލިފަ އެވެ. ބޯޓު ދަތުރުކުރި މަގަށް ބަލާއިރު، ބާރާމަތީ އެއާޕޯޓަށް ޖައްސަން ތައްޔާރުވުމުގެ ގޮތުން ރަންވޭއާ އެޕްރޯޗް ކުރަން ބޯޓު ބުރެއް ޖަހާފައިވާކަން ފާހަގަކުރެވެއެވެ. ނަމަވެސް އޭގެ ކުޑައިރުކޮޅެއް ފަހުން، ޓްރެކަރުން ބޯޓުގެ މައުލޫމާތު ވަނީ ގެއްލިފަ އެވެ.
ބާރާމަތީ ގައި ހިނގި ނުރައްކާތެރި މި ވައިގެ ހާދިސާ ގައި މަހާރާޝްތުރާގެ ޑެޕިއުޓީ ޗީފް މިނިސްޓަރު އަޖިތު ޕަވާރު ކުއްލި ގޮތަކަށް އަވަހާރަވުމާ ގުޅިގެން، އިންޑިއާގެ ބޮޑުވަޒީރު ނަރެންދުރަ މޯދީ އެކަމުގެ ކުއްލި ސިހުމާއި ފުން ހިތާމަ ފާޅުކުރައްވައިފި އެވެ.
ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓެއްގައި ބޮޑުވަޒީރު މޯދީ ވަނީ، ޕަވާރަކީ އާންމު ރައްޔިތުންނާ ނުހަނު ގާތް ގުޅުމެއް ބޭއްވި، މަހާރާޝްތުރާގެ ރައްޔިތުންގެ ލާބަޔާއި މަންފާއަށްޓަކައި ބުރަ މަސައްކަތްތަކެއް ކުރެއްވި، ގިނަ ބައެއްގެ އިހުތިރާމް ލިބިވަޑައިގެންފައިވާ ލީޑަރެއްގެ ގޮތުގައި ސިފަކުރައްވާފަ އެވެ.
"ޝްރީ އަޖިތު ޕަވާރު ޖީ އަކީ އާންމު ރައްޔިތުންގެ މެދުގައި މަގުބޫލު، އަދި ރައްޔިތުންގެ އިހުސާސްތައް ދެނެގަނެގެން މަސައްކަތް ކުރެއްވި ލީޑަރެކެވެ. މަހާރާޝްތުރާގެ ރައްޔިތުންނަށް ޚިދުމަތް ކުރުމުގެ އެންމެ ކުރީ ސަފުގައި ހުންނަވައިގެން އޭނާ ދެއްކެވި ހީވާގީ މަސައްކަތްތެރިކަމަށްޓަކައި އޭނާ އަކީ ގިނަ ބައެއްގެ އިހުތިރާމް ލިބިވަޑައިގެންފައިވާ ބޭފުޅެކެވެ،" ބޮޑުވަޒީރު ވިދާޅުވި އެވެ.
