އިންޑޮނޭޝިޔާގެ ފަރުބަދަމަތީ ސަރަޙައްދަކަށް 11 މީހުންނާއެކު ދަތުރުކުރި ބޯޓެއް ގެއްލިގެން ހޯދަން ފަށައިފި

އިންޑޮނޭޝިޔާގެ މައި ރަށް ކަމަށްވާ ޖާވާ އާއި ސުލަވެސީ އައިލެންޑާ ދެމެދު އޮންނަ ފަރުބަދަމަތީ ސަރަޙައްދަކަށް ތިރިކުރަން އުޅުމުގެ ތެރޭގައި، 11 މީހުންނާއެކު ދަތުރުކުރި ފަސިންޖަރުން އުފުލާ ބޯޓެއްގެ ޚަބަރެއް ނުވެ ގެއްލިފައިވާ ކަމަށް އޮފިޝަލުން ހާމަކޮށްފި އެވެ.

ހޮނިހިރު ދުވަހު ހިނގި މި ހާދިސާއާ ގުޅިގެން އެ ބޯޓު ހޯދުމުގެ ވަރުގަދަ ސާރޗް އެންޑް ރެސްކިއު އޮޕަރޭޝަނެއް މިހާރު ވަނީ ފަށާފަ އެވެ.

އިންޑޮނޭޝިޔާ އެއަރ ޓްރާންސްޕޯޓުން އޮޕަރޭޓްކުރާ "އޭ.ޓީ.އާރް 42-500" މަރުކާގެ މި ބޯޓު ރާޑަރުން ގެއްލުނީ ޔޮގްޔަކާޓާ އިން ސައުތު ސުލަވެސީގެ ވެރިރަށަށް ދަތުރުކުރަނިކޮށް ކަމަށް ޓްރާންސްޕޯޓް މިނިސްޓްރީގެ ތަރުޖަމާނު އެންޑާ ޕުރުނާމާ ސާރީ ވިދާޅުވި އެވެ. މި ބޯޓު އެންމެ ފަހުން ރާޑަރަށް ފެނިފައި ވަނީ އެތަނުގެ ގަޑިން މެންދުރުފަހު 01:17 ގައެވެ. އެއީ ސައުތު ސުލަވެސީ ޕްރޮވިންސްގެ ފަރުބަދަމަތީ ސަރަޙައްދެއް ކަމަށްވާ މާރޮސްގެ ލިއަންގް-ލިއަންގް ސަރަޙައްދުންނެވެ.

ސާރީ ނެރުއްވި ބަޔާނެއްގައި ވިދާޅުވި ގޮތުގައި، ބޯޓު ހޯދުމުގެ މަސައްކަތުގައި ސާރޗް އެންޑް ރެސްކިއު ޓީމުތަކުގެ އިތުރުން އެއަރފޯސްގެ ހެލިކޮޕްޓަރުތަކާއި، ޑްރޯން އަދި އެއްގަމު މަގުން ހަރަކާތްތެރިވާ ޔުނިޓްތައް ދަނީ ބޭނުންކުރަމުންނެވެ.

ބޯޓު ވެއްޓިފައިވާ ތަން ހޯދުމުގެ އުންމީދު ބޮޑުވެފައި ވަނީ، ބުލުސަރައުން ފަރުބަދަ އަށް އެރި ބަޔަކަށް ބޯޓުގެ ބައިތަކެއް ފެނިގެން ރިޕޯޓްކުރުމާ ގުޅިގެންނެވެ. އެމީހުންނަށް ފެނުނު ބައިތަކުގައި އިންޑޮނޭޝިޔާ އެއަރ ޓްރާންސްޕޯޓުގެ ލޯގޯ އާއި، ބައެއް ތަންތަނުގައި އަދިވެސް އަނދަމުންދާ ކުދި އަލިފާންގަނޑުތައް ފެނިފައިވާ ކަމަށް މަޢުލޫމާތު ލިބެއެވެ. ސައުތު ސުލަވެސީގެ އަސްކަރީ ކޮމާންޑަރު މޭޖަރ ޖެނެރަލް ބަންގުން ނަވޯކޯ ވިދާޅުވި ގޮތުގައި، މި މަޢުލޫމާތު ކަމާބެހޭ ފަރާތްތަކަށް ލިބުމާއެކު، ރެސްކިއު ޓީމުތަކުން މިހާރު ދަނީ އެ ސަރަޙައްދަށް ދިއުމަށް މަސައްކަތް ކުރަމުންނެވެ.

އެއަރ ޓްރެފިކް ކޮންޓްރޯލުން ބޯޓު ދަތުރުކުރަންވީ މިސްރާބު ރަނގަޅުކުރުމަށް އިރުޝާދު ދިންތާ ކުޑަވަގުތުކޮޅެއްގެ ތެރޭގައި ބޯޓުގެ ޚަބަރެއް ނުވެ ގެއްލުނު ކަމަށް ސާރީ ވިދާޅުވި އެވެ. އެންމެ ފަހުގެ އިރުޝާދަށްފަހު ރޭޑިއޯ މުއާސަލާތު މެދުކެނޑުމުން، އެއީ ކުއްލި ނުރައްކަލުގެ ހާލަތެއްގެ ގޮތުގައި ވަނީ ކަނޑައަޅާފަ އެވެ. މި ބޯޓުގައި 8 ފަޅުވެރިންނާއި، މިނިސްޓްރީ އޮފް މެރިން އެފެއާޒް އެންޑް ފިޝަރީޒްގެ ތިން މުވައްޒަފުން ތިބިއިރު، ބޯޓު ގެއްލުނީ ސުލްޠާން ޙަސަނުއްދީން އިންޓަރނޭޝަނަލް އެއަރޕޯޓަށް ޖައްސަން ދިޔަ މަގުމަތީގައި އޮންނަ ފަރުބަދަމަތީ ސަރަޙައްދަކުންނެވެ.

ހާދިސާ ހިނގި ވަގުތު މޫސުން ހުރި ގޮތަށް ބަލާއިރު، އުޑުމަތި ބަނަވެފައިވީ ނަމަވެސް 8 ކިލޯމީޓަރުގެ ދުރަށް ފެންނަން ހުރި ކަމަށް ސާރީ ފާހަގަކުރެއްވި އެވެ. ނަމަވެސް، ބުލުސަރައުން ނޭޝަނަލް ޕާކުގެ ފަރުބަދަމަތީގެ އުނދަގޫ ސަރަޙައްދެއްގައި ބޯޓު ހޯދުމުގެ މަސައްކަތް ކުރަންޖެހުމުން އެކަމަށް ގޮންޖެހުންތަކެއް ކުރިމަތިވެފައިވާ ކަމަށް ނަވޯކޯ ވިދާޅުވި އެވެ.

ފިޝަރީޒް މިނިސްޓަރު ސަކްތީ ވަހްޔޫ ތްރެންގޯނޯ ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، އެ މިނިސްޓްރީގެ ތިން މުވައްޒަފުން އެ ބޯޓުގައި ދަތުރުކުރީ އިންޑޮނޭޝިޔާގެ ކަނޑުގެ ސަރަޙައްދު ބެލެހެއްޓުމާއި މަސްވެރިކަމާ ގުޅޭ ޚާއްޞަ މިޝަނެއްގައި ކަމަށެވެ.

ދުނިޔޭގެ އެންމެ ބޮޑު ޖަޒީރާ ޤައުމު ކަމަށްވާ އިންޑޮނޭޝިޔާގައި 280 މިލިއަނަށްވުރެ ގިނަ މީހުން ދިރިއުޅޭއިރު، 17،000 އަށްވުރެ ގިނަ ރަށްތަކުގެ މެދުގައި ދަތުރުފަތުރު ކުރުމަށް އެންމެ ބޮޑަށް ބަރޯސާވަނީ ވައިގެ މަގަށާއި ކަނޑުގެ މަގަށެވެ. ނަމަވެސް، ސަލާމަތީ މިންގަނޑުތައް ތަންފީޒު ކުރުމުގައި ހުރި ދޯހަޅިކަމުގެ ސަބަބުން ފަހަކަށް އައިސް އެ ޤައުމުގައި އެއްގަމާއި، ކަނޑާއި، ވައިގެ މަގުގައި ހިނގާ އެކްސިޑެންޓްތައް ވަނީ އިތުރުވެފަ އެވެ.