ދަތުރުމަތީގައި ދަށުދަރަޖައިގެ އަމަލުތައް ހިންގާ ފަސިންޖަރުންނަށް އެއާލައިންތަކުން ދަތުރުނުކުރެވޭ ގޮތަށް ބްލެކްލިސްޓެއް އެކުލަވާލަނީ

ވައިގެ ދަތުރުފަތުރުގެ ތެރޭގައި ދަށުދަރަޖައިގެ އަމަލުތައް ހިންގާ ފަސިންޖަރުންގެ ގައުމީ ބްލެކްލިސްޓެއް އެކުލަވާލައި، އެއްވެސް އެއާލައިނަކުން އެފަދަ މީހުންނަށް ދަތުރު ނުކުރެވޭ ގޮތަށް ހެދުމަށް އިނގިރޭސި ސަރުކާރުން އާ ހުށަހެޅުމެއް ހުށަހަޅައިފިއެވެ.

މި އުސޫލުގެ ދަށުން، ދަތުރުތަކަށް ހުރަސްއަޅާ ފަސިންޖަރުންގެ މައުލޫމާތު އެއާލައިންތަކުގެ މެދުގައި ހިއްސާކުރުމުގެ ފުރުސަތު ލިބިގެންދާނެއެވެ. އަދި މީގެ ސަބަބުން އެފަދަ ފަރާތްތަކަށް ފްލައިޓްތަކުން ޖާގަ ލިބުން ހަނިވެގެންދާނެއެވެ.

ދަތުރުފަތުރު ގިނަވާ ހޫނު މޫސުމުގެ ދުވަސްވަރުގައި، ފްލައިޓްތަކުގެ ތެރޭގައި ހަޅޭއްލެވުމާއި، މަސްތުގެ ހާލަތުގައި ތިބެ މައްސަލަ ޖެއްސުން ފަދަ ކަންކަން އިތުރުވެގެންދެއެވެ. މިހާރު އޮންނަ އުސޫލުން އެއް އެއާލައިނަކުން މީހަކު ބޭން ކުރި ނަމަވެސް، އެ މީހަކަށް އެހެން އެއާލައިނަކުން ޓިކެޓް ބުކް ކުރުމުގެ ފުރުސަތު އޮވެއެވެ.

"ފްލައިޓްތަކުގެ ތެރޭގައި މުޖުތަމައު ގަބޫލުނުކުރާ ފަދަ ދަށުދަރަޖައިގެ އަމަލުތައް ހިންގުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން،" ސަރުކާރުގެ މަސްދަރަކުން ބީބީސީއަށް މައުލޫމާތު ދީފައިވެއެވެ. އެ މަސްދަރުން އިތުރަށް ބުނި ގޮތުގައި މިފަދަ އަމަލުތަކުގެ ސަބަބުން ފަސިންޖަރުންނާއި ކުރޫއިންގެ ސަލާމަތަށް ނުރައްކާވެ، މީހުން ބުރަ މަސައްކަތުން ހޯދާ ޗުއްޓީގެ ދުވަސްތަކަށް ބުރޫއަރައެވެ.

މި ހުށަހެޅުން އަމަލީ ގޮތުން ކުރިއަށް ގެންދާނެ ގޮތާ ގުޅޭގޮތުން މަޝްވަރާ ކުރުމަށްޓަކައި، ޑިޕާޓްމަންޓް ފޯ ޓްރާންސްޕޯޓްގެ އޮފިޝަލުން މި މަހުގެ ތެރޭގައި އެއާލައިންތަކާ ބައްދަލުކުރުމަށް ވަނީ ހަމަޖެހިފައެވެ.

މި ގައުމީ ޑޭޓާބޭސް ބަލަހައްޓާނީ އިނގިރޭސި ސަރުކާރާއި އެއާލައިން ސިނާއަތް ގުޅިގެން ކަމަށް ބެލެވެއެވެ.

އިނގިރޭސިވިިލާތުގައި މިހާރު އޮންނަ ގޮތުން ޖީޑީޕީއާރް ގަވާއިދުގެ ދަށުން ފަސިންޖަރުންގެ އަމިއްލަ މައުލޫމާތު ހިއްސާކުރުމަކީ މަނާކަމެކެވެ. އެހެންކަމުން، އެއް ފްލައިޓަކުން މައްސަލަ ޖައްސައިގެން ބޭން ކުރާ މީހަކަށް އެހެން ފްލައިޓަކުން ދަތުރުކުރުމުގެ ފުރުސަތު މިހާރު ލިބެއެވެ.

"ފްލައިޓްތަކުގެ ތެރޭގައި ހިންގާ ކުށްތަކަށް އަދަބު ދިނުމަށް މިހާރުވެސް ހަރުދަނާ ގާނޫނުތަކެއް އެބަހުރި. ނަމަވެސް، ތަކުރާރުކޮށް ހަމަނުޖެހުން ހިންގާ މީހުންނަށް ހަރުކަށި ފިޔަވަޅު އެޅުމަށްޓަކައި، މި މައްސަލައަށް މިހާރަށްވުރެ ރަނގަޅު ހައްލެއް ހޯދުމަށް ސިނާއަތުގެ މާހިރުންނާއެކު އަޅުގަނޑުމެން މިދަނީ މަސައްކަތް ކުރަމުން،" އިނގިރޭސި ސަރުކާރުގެ މަސްދަރުން އިތުރަށް ބުންޏެވެ.

މައްސަލަ ޖައްސާ ފަސިންޖަރުންގެ މައްސަލައަކީ އެއާލައިންތަކަށް ކުރިމަތިވެފައިވާ ބޮޑު ކަންބޮޑުވުމެކެވެ. އަދި ސީރިއަސް މައްސަލަތަކުގައި ޖިނާއީ ދައުވާވެސް އުފުލަމުންދެއެވެ.

މިދިޔަ އަހަރުގެ ނޮވެމްބަރު މަހު ކްރަކޯވްއިން ބްރިސްޓަލް އެއާޕޯޓަށް ދަތުރުކުރި ރަޔަންއެއާގެ ފްލައިޓެއްގައި، އުމުރުން 61 އަހަރުގެ ސްޓީވަން ބްލޯފީލްޑް ނަމަކަށް ކިޔާ މަސްތުގެ ހާލަތުގައި ހުރި ފަސިންޖަރަކު ހިންގި ހަޑިހުތުރު އަމަލުތަކުގެ ސަބަބުން، ޕައިލެޓަށް ފުރަތަމަ ފަހަރު ބޯޓު ޖައްސަން ކުރި މަސައްކަތް ހުއްޓާލަން ޖެހުނު މައްސަލައެއް އޭޕްރީލް މަހު ކޯޓުގައި ވަނީ ހިނގާފައެވެ. މި މައްސަލައިގައި ބްލޯފީލްޑް 10 މަސްދުވަހަށް ޖަލަށްލުމަށް ވަނީ ހުކުމްކޮށްފައެވެ.

މީގެ އިތުރުން، ފެބްރުއަރީ މަހު ތުރުކީން މެންޗެސްޓާއަށް ދަތުރުކުރި ޖެޓް2 ގެ ފްލައިޓެއްގެ ތެރޭގައި ހިންގި މާރާމާރީއަކާ ގުޅިގެން، އެ އެއާލައިނުން ވަނީ ދެ ފަސިންޖަރަކު އުމުރަށް ބޭން ކޮށްފައެވެ. އެ އެއާލައިނުން ބުނި ގޮތުގައި އެ މީހުންގެ އަމަލުތައް ހުރީ ވަރަށް ދަށު ދަރަޖައެއްގައެވެ. އަދި އެ ހަމަނުޖެހުމުގެ ސަބަބުން ބްރަސަލްސްއަށް ބޯޓު ކުއްލި ހާލަތުގައި ޖައްސަން ޖެހުނުއިރު، ގަސްދުގައި ހަމަލާދީ މާރާމާރީ ހިންގި ކަމުގެ ތުހުމަތުގައި އެ ދެ މީހުން ވަނީ ހައްޔަރުކޮށްފައެވެ.

އެއާލައިން ސިނާއަތް ތަމްސީލުކުރާ "އެއާލައިންސް ޔޫކޭ" އިން މި ހުށަހެޅުމަށް މަރުހަބާ ކިޔާފައިވާއިރު، މިކަން ހަގީގަތަކަށް ހެދުމުގައި ސަރުކާރާއެކު މަސައްކަތް ކުރާނެ ކަމަށް ވަނީ ބުނެފައެވެ.

"މައްސަލަ ބޮޑުވާ ހާލަތްތަކުގައި އިތުރު ފިޔަވަޅުތައް އެޅުމާއި، ގައުމީ ފެންވަރުގެ ބޭން ލިސްޓެއް އެކުލަވާލުމަކީ ވަރަށް މުހިންމު ފިޔަވަޅެއް. މީގެ ސަބަބުން މަދު ބައެއްގެ އަމަލުތަކުގެ ސަބަބުން ގިނަ އަދަދެއްގެ ފަސިންޖަރުންގެ ދަތުރުތަކަށް ބުރޫއެރުން ހުއްޓުވޭނެ،" އެ ޖަމިއްޔާގެ ތަރުޖަމާނު ވިދާޅުވިއެވެ.