އިންޑޮނީޝިއާގެ ފިޝަރީޒް މިނިސްޓްރީގެ މުވައްޒަފުންނާ އެކު ގެއްލުނު މަތިންދާ ބޯޓުގެ ބައިތައް ފެނިއްޖެ

އިންޑޮނީޝިއާގެ ސައުތު ސުލަވެސީ ޕްރޮވިންސްގައި ބޯ ދުންފިނިން ނިވާވެފައިވާ ފަރުބަދަމަތީ ސަރަހައްދަކަށް، ގެއްލިގެން ހޯދަމުން ދިޔަ ފްލައިޓް ވެއްޓިފައި އޮއްވާ ފެނިފައިވާ ކަމަށް އެ ގައުމުގެ ކަމާބެހޭ ފަރާތްތަކުން އާދީއްތަ ދުވަހު ހާމަކޮށްފި އެވެ. މި ބޯޓުން ދަތުރުކުރި 11 މީހުން ހޯދުމުގެ މަސައްކަތް ކަމާބެހޭ ފަރާތްތަކުން އަދިވެސް ދަނީ ކުރަމުންނެވެ.

"އިންޑޮނީޝިއާ އެއާ ޓްރާންސްޕޯޓް" އޭވިއޭޝަން ގްރޫޕުގެ މި އޭޓީއާރު 42-500 މަރުކާގެ ބޯޓާއި އެއާ ޓްރެފިކް ކޮންޓްރޯލާ ދެމެދު އޮތް ގުޅުން ކެނޑުނީ ހޮނިހިރު ދުވަހުގެ މެންދުރުފަހު 1:30 ހާއިރު، ސައުތު ސުލަވެސީގެ މާރޯސް ސަރަހައްދުން ދަތުރުކުރަމުން ދަނިކޮށްނެވެ.

މި ބޯޓުގައި 8 ފަޅުވެރިންނާއި ތިން ފަސިންޖަރުން ތިއްބެވެ. އިންޑޮނީޝިއާގެ މިނިސްޓްރީ އޮފް މެރިން އެފެއާޒް އެންޑް ފިޝަރީޒްގެ ބޭނުމަށް، މަސްވެރިކަން ކުރާ ސަރަހައްދުތައް ވައިގެ މަގުން ބެލެހެއްޓުމަށް ބޭނުންކުރާ މި ބޯޓުގައި ތިބި ތިން ފަސިންޖަރުންނަކީ އެ މިނިސްޓްރީގެ މުވައްޒަފުންނެވެ.

ސައުތު ސުލަވެސީގެ ރެސްކިއު އެޖެންސީގެ އިސްވެރިޔާ މުޙައްމަދު އާރިފް އަންވަރު ލޯކަލް ޓީވީއަކަށް ދެއްވި ބަޔާނެއްގައި ވިދާޅުވީ، ބޯޓު ވެއްޓިފައިވާ ސަރަހައްދު ފެނުމާއެކު، ގެއްލުނު މީހުން ހޯދުމަށް 1,200 މުވައްޒަފުން އެ ސަރަހައްދަށް ފޮނުވާނެ ކަމަށެވެ. އަދި އެންމެ ބޮޑު އިސްކަމެއް ދެނީ މީހުން ހޯދުމަށް ކަމަށާއި، ބައެއް މީހުން ސަލާމަތުން ފެންނާނެ ކަމަށް އުންމީދުކުރާ ކަމަށްވެސް އޭނާ ވިދާޅުވިއެވެ.

މި ބޯޓަކީ ޔޮގްޔަކާޓާ ޕްރޮވިންސުން ފުރައިގެން ސައުތު ސުލަވެސީގެ ވެރިރަށް މަކާސާ އަށް ދަތުރުކުރި ބޯޓެކެވެ.

އާދީއްތަ ދުވަހުގެ ހެނދުނު، މާރޯސް ސަރަހައްދުގެ މައުންޓް ބުލުސަރައުންގްގެ އެކި ދިމާތަކުން ބޯޓުގެ ބައިތައް ފެނިފައިވާ ކަމަށް ރެސްކިއު އެޖެންސީގެ އޮފިޝަލެއް ކަމަށްވާ އަންދީ ސުލްޠާން ވިދާޅުވި އެވެ. މި ފަރުބަދަ އަކީ އިންޑޮނީޝިއާގެ ވެރިރަށް ޖަކާޓާއާ ގާތްގަނޑަކަށް 1,500 ކިލޯމީޓަރު ދުރުގައި އޮންނަ ތަނެކެވެ.

ސުލްޠާން ނޫސްވެރިންނަށް މައުލޫމާތު ދެއްވަމުން ވިދާޅުވީ، ހެނދުނު 7:46 ހާއިރު ހެލިކޮޕްޓަރުގެ ފަޅުވެރިންނަށް ބޯޓުގެ ކުޑަދޮރެއްގެ ބައިތައް ފެނުނު ކަމަށެވެ. އަދި އޭގެ ކުޑައިރުކޮޅެއް ފަހުން ބޯޓުގެ މައިގަނޑު ބައިތައް ފެނުނުއިރު، ފަރުބަދައިގެ ތިރިން ބޯޓުގެ ފަހަތު ބައި (ޓެއިލް) ވެސް ފެނިފައިވާ ކަމަށް އޭނާ ވިދާޅުވިއެވެ.

ބޯޓުގެ ބައިތައް ފެނުނު ސަރަހައްދަށް މިހާރު މީހުން ސަލާމަތްކުރާ ޓީމުތައް ގޮސްފައިވީ ނަމަވެސް، ބޯ ފުުންޏާއި ފަރުބަދަމަތީގެ އުނދަގޫ މަގުތަކުގެ ސަބަބުން މަސައްކަތަށް ބޮޑެތި ހުރަސްތަކެއް ކުރިމަތިވަމުންދާ ކަމަށް އޭނާ ފާހަގަކުރެއްވިއެވެ.

ބޯޓު ވެއްޓެން ދިމާވި ސަބަބު ދެނެގަތުމަށް އިންޑޮނީޝިއާގެ ނޭޝަނަލް ޓްރާންސްޕޯޓޭޝަން ސޭފްޓީ ކޮމިޓީން މިހާރު ވަނީ ތަހުގީގެއް ފަށާފަ އެވެ. މި ހާދިސާ ހިނގަން މެދުވެރިވި ސަބަބު އަދި ސާފެއް ނުވެއެވެ.

މި ހާދިސާގައި ހިމެނޭ އޭޓީއާރު 42-500 މަރުކާގެ ބޯޓަކީ ފްރާންސް-އިޓަލީގެ ކުންފުންޏަކުން އުފައްދާ، 42 އާއި 50 އާ ދެމެދުގެ އަދަދަކަށް ފަސިންޖަރުން އުފުލޭ ބޯޓެކެވެ.

ފްލައިޓް ޓްރެކް ކުރާ ވެބްސައިޓެއް ކަމަށްވާ "ފްލައިޓްރޭޑާ24" އިން ހާމަކޮށްފައިވާ ގޮތުގައި، މި ބޯޓު ކަނޑުގެ ސަރަހައްދުން ދަތުރުކުރަމުން ދިޔައީ ވަރަށް ތިރިންނެވެ. ބޯޓުގެ ސިގްނަލް އެންމެ ފަހުން ލިބިފައި ވަނީ މަކާސާ އެއާޕޯޓާ 20 ކިލޯމީޓަރު ދުރުންނެވެ.