ހަނިމާދޫ އެއާޕޯޓަކީ ކުރީގެ ސަރުކާރުން ކޮށްފައި އޮތް ބޭކާރު ހަރަދެއްގެ ގޮތުގައި ދެއްކުމަށް ކުރަން ޖެހޭ ހުރިހާ މަސައްކަތެއް ދަނީ ކުރަމުން: ކައުންސިލްގެ ރައީސް
ހަނިމާދޫ އެއާޕޯޓަކީ ކުރީގެ ސަރުކާރުން ބޭކާރު ހަރަދެއްގެ ގޮތުގައި ކުރި ކަމެއްކަން ދެއްކުމަށް މި ސަރުކާރުން މަސައްކަތް ކުރަމުންދާ ކަމަށް އެ ރަށު ކައުންސިލްގެ ރައީސް އަލީ އިބްރާހިމް ވަނީ ތުހުމަތު ކުރައްވާފައި. އެއާޕޯޓުގެ އޮޕަރޭޝަންތައް ހީނަރުވެ، ފިއުލް ފާމް ފަދަ ވަސީލަތްތައް ބޭނުންނުކުރެވި ހުރިއިރު، ރަށުގެ ބިންތައް ފޭރިގަންނަ އުސޫލުން ސަރުކާރުން އަމަލުކުރަމުންދާ ކަމަށް އޭނާ ވިދާޅުވި. މީގެ އިތުރުން، އެއާޕޯޓު ސަރަހައްދުގައި ރިސޯޓެއް ތަރައްގީކުރުމަށް އޮތް ޕްލޭން މި ސަރުކާރުން ބަދަލުކޮށްފައިވާތީ ކައުންސިލުން ވަނީ ކަންބޮޑުވުން ފާޅުކޮށްފައި.
ހަނިމާދޫ އެއާޕޯޓު ރަސްމީކޮށް ހުޅުވި ރަސްމިއްޔާތުގެ ތެރެއިން. | ސޯޝަލް މީޑިއާ
ހދ. ހަނިމާދޫ އެއާޕޯޓަކީ ކުރީގެ ސަރުކާރުން ކޮށްފައި އޮތް ބޭކާރު ހަރަދެއްގެ ގޮތުގައި ދެއްކުމަށް ކުރަން ޖެހޭ ހުރިހާ މަސައްކަތްތަކެއް މިހާރު ކުރަމުންދާ ކަމަށް އެރަށު ކައުންސިލްގެ ރައީސް އަލީ އިބްރާހިމް ވިދާޅުވެއްޖެ އެވެ.
ހުކުރު ދުވަހުގެ ފަށާއިރު ޕްރޮގްރާމްގައި ވާހަކަ ދައްކަވަމުން ކައުންސިލްގެ ރައީސް އަލީ ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ހަނިމާދޫ އެއާޕޯޓަކީ ވަރަށް ބޮޑު އިސްކަމެއް ދީގެން ރައްޔިތުން އެދުނު ގޮތަށް ވަކި ޕްލޭނެއްގެ ދަށުން ތަރައްގީ ކޮށްފައިވާ މުހިންމު ތަނެއް ކަމަށެވެ.
އަލީ ވިދާޅުވީ އެއާޕޯޓުގެ ހުރިހާ ދިމާލެއްގައި އޮތީ މައްސަލަ ކަމަށާއި، އެއާޕޯޓުގެ އެއްފަޅި އޮތީ ޕްރަލައިޒް ވެފައިވާ ކަމަށެވެ.
ދެން އަޅުގަނޑުމެންނަށް ވަރަށް ބުރަ މަސައްކަތުން ބޮޑުތިލަދުންމަތީ އެންމެ ބޮޑު ތަރައްގީގެ މައި ހަބުގެ ގޮތުގައި އެއާޕޯޓެއް އެއޮތީ ޓޫރިޒަމަށް އެކަން ކުރެވޭ ގޮތަށް ފައްކާ ކޮށްފައި. އެޑިޒައިނަށް. އެކަމަކު އަޅުގަނޑުމެންނަށް ފެނިގެން މިދަނީ އެއާޕޯޓުގެ މިހާރު އަޅުގަނޑަށް ހީވާ ގޮތުން ދޭ ނުނީ އެއް ފްލައިޓް ޖައްސަނީ. އެއީ މާލެއިން. ކުރީގައި 5 ނުވަތަ 8 ނޫނީ 6 ފްލައިޓް ޑޮމެސްޓިކް އެއާޕޯޓެއް އޮތްއިރު ވެސް ޖައްސާ. ދެން މިހާރު އެއާޕޯޓު އެއްކޮށް ހުއްޓެމުން މިދަނީ. އަނެހެން ބުނަންޏާ އެއާޕޯޓުގެ އެބަހުރި ހުރިހާ މައްސަލައެއް ދިމާވެފައި. މިސާލަކަށް ބަލަންޏާ ފިއުލް. ފިއުލް ފާމަށް އެއޮތީ ފިއުލް އަޅާފައި. އެކަމަކު އެ ތެލެއް ބޭނުމެއް ނުކުރެވޭ. އެތެލުގައި ކެމިކަލް ހުރީމަ އެ ވަރަށް ބައިވަރު ތެޔޮތަކެއް. އަނެހެން ބުނަންޏާ އެއާޕޯޓުގެ އެއްފަޅި އެއޮތީ ޕްރަލައިޒް ވެފައި. ދެން އެއްވެސް ކަހަލަ ޕްލޭނެއް ނެތް މީގައި.ހަނިމާދޫ ކައުންސިލްގެ ރައީސް އަލީ އިބްރާހިމް
މީގެ އިތުރުން އަލީ ވިދާޅުވީ އެއާޕޯޓު ތަރައްގީ ކުރީ މުޅި ސަރަހައްދުގައި ފަތުރުވެރިކަން ކުރިއެރުވޭނެ ގޮތަށް ކަމަށާއި، މިހާރު އެޕްލޭން ނެތް ކަމަށެވެ.
އެ ރަށުގެ ހިމަކޮޅުގައި ރިސޯޓެއް ތަރައްގީ ކުރުމަށް ޕްލޭން ކޮށްފައިވާކަން ފާހަގަކުރައްވައި އަލީ ވިދާޅުވީ، މިސަރުކާރުން ވެސް އެގޮތަށް މީގެ ކުރިން އެއްބަސްވެފައިވާ ކަމަށެވެ. ނަމަވެސް މިހާރު އެތަނުގައި ރިސޯޓު ތަރައްގީ ނުކުރެވޭނެ ކަމަށް އަންގާފައިވާ ކަަމަށާއި، އެސަރަހައްދު އެއްކޮށް އެއާޕޯޓަށް ދިނުމަށް އަންގާފައިވާ ކަމަށް އޭނާ ވިދާޅުވި އެވެ. އަދި ވިދާޅުވީ އެސަރަހައްދު އެއާޕޯޓަށް ދިން ނަމަވެސް އެތަނުގައި ރިސޯޓު ތަރައްގީ ކުރެވޭނެ ކަމަށެވެ.
މިހާރު އަޅުގަނޑުމެންނަށް މިދިމާވާ މައްސަލައަކީ އަޅުގަނޑުމެން އެންމެ ހިތްހަމަ ނުޖެހޭ ކަންކަމަކީ ހަމަ ރައްޔިތުން ވެސް ހަމަ މިސަރަހައްދުގެ ރައްޔިތުން ހިތްހަމަ ނުޖެހޭނެ ކަމެއް މިއީ އެތާގެ ޕްލޭން ދެއްކި އެތާގައި ރިސޯޓެއް ހަދާ ގޮތަށް. މިހާރު އެބޭފުޅުން އެބަ ބުނޭ އަޅުގަނޑުމެން އެކަން ކުރަން ބޭނުންވެގެން އުޅޭތީ ލޭންޑް ޔޫސް ޕްލޭން އެގޮތަށް ހިމަނާ ފާސް ކުރަން ރައްޔިތުން ހުށަހެޅީމަ އެތާގައި ރިސޯޓެއް ނުހެދޭނެއޭ. އެއަށް ބޮޑު ބިމުގައި. އެންމެ ރީތި އެތައް އެއީ. މިހާރު އެ ބުނަނީ އެސަރަހައްދު ދޭށޭ އެއާޕޯޓަށް. އެއާޕޯޓަށް އެސަރަހައްދު ނުދޭކަށް ނޫން. އެއާޕޯޓުގެ ބައެއްގެ ގޮތުގައި ހިމެނިކަމުގައި ވިޔަސް އެތާގައި ހަދަންވާނީ ރިސޯޓޭ. އެހެންނޫނީ އެ ސަރަހައްދު އަޅުގަނޑުމެން ދުލެއް ނުކުރާނަމޭ. އޭރުން ރަންވޭ ހަދާނީ އެންމެ ކޮޅުން ޖައްސާގެންނޭ. ޕްލޭންތަކެއް ހުރީމަ އެގޮތަށް އެމަސައްކަތް ކުރީ. މިހާރު މިފެންނަނީ މުޅިން އެހެން ސިސްޓަމަކަށް މިކަން ކުރިއަށް ގެންދާތަން. ރަށުގެ ބޮޑެތި ބިންތަކެއް ފޭރިގަންނަ އުސޫލުން ސަރުކާރުން ކަންތައް ކުރާތަންހަނިމާދޫ ކައުންސިލްގެ ރައީސް އަލީ އިބްރާހިމް
އަލީ ވިދާޅުވީ މިސަރުކާރާއެކު އެއާޕޯޓުގެ އާރޯކަމެއް ތަރައްގީއެއް ނުފެންނަ ކަމަށާއި، އެއީ ކުރީ ސަރުކާރުގައި ކޮށްފައިވާ ބޭކާރު ހަރަދެއްގެ ގޮތުގައި ރައްޔިތުންނަށް ދައްކަން ކުރަން ޖެހޭ ހުރިހާ މަސައްކަތެއް މިސަރުކާރުން ކުރަމުންދާ ކަމަށެވެ. އަދި މިސަރުކާރުގެ ބޭފުޅުން މީގެ ކުރިން ވެސް އެއާޕޯޓަކީ ބޭކާރުތަނެއްގެ ގޮތުގައި ސިފަކޮށް އެގޮތަށް އެވާހަކަ ދެއްކި ކަމަށް އޭނާ ވިދާޅުވި އެވެ.
