އެމެރިކާ ސިފައިން ސީރިއާ ގައި ހަރަކާތްތެރިވާ އިސްލާމިކް ސްޓޭޓް ޖަމާއަތުގެ އަމާޒުތަކަށް ވަރުގަދަ ހަމަލާތަކެއް ދީފި

އެމެރިކާ ސިފައިން ސީރިއާ ގައި ހަރަކާތްތެރިވާ އިސްލާމިކް ސްޓޭޓް (އައި.އެސް) ޖަމާއަތުގެ އަމާޒުތަކަށް ވަރުގަދަ ހަމަލާތަކެއް ދީފި ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަކޮށްފިއެވެ.

ސެންޓްކޮމް އިން އެކްސްގައި ހިއްސާކުރި މަޢުލޫމާތުގައިވާ ގޮތުން، "އޮޕަރޭޝަން ހޯކްއައި ސްޓްރައިކް" ގެ ނަމުގައި ހޮނިހިރު ދުވަހު ދިން މި ހަމަލާތަކަކީ، މިދިޔަ ޑިސެމްބަރު މަހުގެ 13 ވަނަ ދުވަހު އައި.އެސް އިން އެމެރިކާ ސިފައިންނަށް ދިން ނުރައްކާތެރި ހަމަލާގެ ބަދަލުހިފުމުގެ ގޮތުން ރައީސް ޑޮނަލްޑް ޓްރަމްޕްގެ އަމުރުފުޅަށް ދިން ހަމަލާތަކެއް ކަމަށް ބުނެފައިވެ އެވެ. މި ހަމަލާތަކުގެ މަގްސަދަކީ ޓެރަރިޒަމާ ދެކޮޅަށް މަސައްކަތްކުރުމާއި، އެ ސަރަހައްދުގައި ތިބި އެމެރިކާ އަދި އެކުވެރި ބާރުތަކުގެ ސިފައިންގެ ރައްކާތެރިކަން ކަށަވަރުކުރުން ކަމަށް ސެންޓްކޮމްއިން ބުނެފައިވެ އެވެ.

"އަހަރެމެންގެ މެސެޖަކީ ވަރުގަދަ މެސެޖެއް: އަހަރެމެންގެ ސިފައިންނަށް ގެއްލުމެއް ދީފިނަމަ، ދުނިޔޭގެ ކޮންމެ ތަނެއްގައި ތިބި ކަމުގައިވިޔަސް، އަދި އިންސާފުން ރެކެން ކިތަންމެ މަސައްކަތެއް ކުރި ނަމަވެސް، އެބަޔަކު ހޯދައި ނައްތާލާނަން،" ސެންޓްކޮމްއިން ބުނެފައިވެ އެވެ.

ސީ.ބީ.އެސް ނިއުސް އަށް މަޢުލޫމާތު ދިން އޮފިޝަލަކު ބުނި ގޮތުގައި، 20 އަށްވުރެ ގިނަ މަތިންދާބޯޓު ބޭނުންކޮށްގެން ހިންގި މި އޮޕަރޭޝަނުގައި 35 އަށްވުރެ ގިނަ އަމާޒަށް 90 އަށްވުރެ ގިނަ ޕްރެސިޝަން މިއުނިޝަން  ބޭނުންކޮށްފައިވެ އެވެ. މި ހަމަލާތަކުގައި އެފް-15 އީ، އޭ-10، އޭސީ-130 ޖޭ، އެމްކިއު-9 އަދި އުރުދުންގެ އެފް-16 މަތިންދާބޯޓުތައް ބޭނުންކޮށްފައިވެ އެވެ. ނަމަވެސް، ހަމަލާ ދިން ސީދާ ތަންތަނާއި ލިބުނު ގެއްލުންތަކުގެ ތަފްސީލެއް އަދި ސާފެއް ނުވެއެވެ.

އެމެރިކާގެ ޑިފެންސް ސެކްރެޓަރީ ޕީޓް ހެގްސެތު އެކްސްގައި ކުރެއްވި ޕޯސްޓެއްގައި ވިދާޅުވީ، "އަހަރެމެން ދުވަހަކުވެސް ހަނދާން ނައްތައެއް ނުލާނަން، އަދި ފަހަތަކަށްވެސް ނުޖެހޭނަން،" ކަމަށެވެ. ޓްރަމްޕްގެ ސަރުކާރުން "އޮޕަރޭޝަން ހޯކްއައި ސްޓްރައިކް" ފުރަތަމަ އިޢުލާން ކުރީ މިދިޔަ ޑިސެމްބަރު މަހު ސީރިއާ ގެ މެދުތެރޭގައި އޮންނަ ޕަލްމީރާ ގައި އައި.އެސް އިން ދިން ހަމަލާއެއްގައި އެމެރިކާގެ ދެ ސިފައިންނާއި ތަރުޖަމާނަކު މަރުވުމާ ގުޅިގެންނެވެ.

"މިއީ ހަނގުރާމައެއްގެ ފެށުމެއް ނޫން - މިއީ ބަދަލުހިފުމުގެ އިޢުލާނެއް،" މި އޮޕަރޭޝަން އިޢުލާން ކުރައްވަމުން ހެގްސެތު ވިދާޅުވި އެވެ.

ސެންޓްކޮމްއިން ބުނި ގޮތުގައި، ހޮނިހިރު ދުވަހުގެ ހަމަލާތަކުގެ ކުރިން، ޑިސެމްބަރު 20 އާއި 29 އާ ދެމެދު ހިންގި 11 މިޝަނެއްގައި އައި.އެސްގެ 25 އެއްހާ މެންބަރުން ވަނީ މަރާލާފައި ނުވަތަ ހައްޔަރުކޮށްފަ އެވެ. އަދި ޑިސެމްބަރު 19 ވަނަ ދުވަހު ހިންގި ފުރަތަމަ މިޝަނުގައި އެމެރިކާ އާއި އުރުދުންގެ ސިފައިން ގުޅިގެން ސީރިއާގެ މެދުތެރޭގެ އެކި ސަރަހައްދުތަކުގައިވާ އައި.އެސްގެ 70 އަށްވުރެ ގިނަ އަމާޒަށް ވަރުގަދަ ހަމަލާތަކެއް ދީފައިވެ އެވެ.

ސީރިއާ ގެ މަސްރަހު މިހާރު އޮތީ ނާޒުކު ފައްތަރެއްގަ އެވެ. 2024 ގެ ޑިސެމްބަރު މަހު ބައްޝާރުލް އަސަދުގެ ސަރުކާރު ވެއްޓުމާ ގުޅިގެން، 13 އަހަރަށް ދެމިގެންދިޔަ ދާހިލީ ހަނގުރާމަ ވަނީ ނިމުމަކަށް އައިސްފަ އެވެ. އަސަދުގެ ވެރިކަން ވައްޓާލި ހަނގުރާމަވެރި ޖަމާއަތުގެ ވެރިޔާ އަހުމަދު އަލް-ޝަރާ (އަބޫ މުހައްމަދު އަލް-ޖޫލާނީ) މިހާރު ގެންދަވަނީ ގައުމުގެ ރައީސްކަން ކުރައްވަމުންނެވެ. އައި.އެސްގެ ބާރު ސީރިއާ ގައި ހީނަރުވެފައިވީ ނަމަވެސް، އެ ޖަމާއަތުން އަދިވެސް ދަނީ ހަރަކާތްތެރިވަމުންނެވެ. ވަކިން ހާއްސަކޮށް 2025 ވަނަ އަހަރުގެ ތެރޭގައި އެ ގައުމުގެ އިރުއުތުރުގައިވާ ކުރުދީންގެ ބާރުތަކަށް އަމާޒުކޮށް ހަމަލާތައް ދެމުންދާކަން ފާހަގަކުރެވެ އެވެ.