ރާއްޖޭގައިވެސް ވަރުގަދަ ޓެލެކޮމް ކުންފުނިތަކެއް...އެއްވެސް ބަޔަކަށް މިފަދަ ޚިދުމަތަކާ މެދު ވިސްނާލެވުނުބާ؟

ނައިޖީރިއަށް އުފަން ކެހިންދެ އޮލޫތުބޮސުންއަކީ ޖިއޮގްރަފީއާއި ޖަނަވާރުތަކުގެ ދިރިއުޅުމުގެ ކަންކަމަށް ޚާއްޞަ ޝަޢުޤެއް ހުންނަ، ލޯފާން ޒުވާނެކެވެ. އޭނާ އެންމެ ގަޔާވާ ކަންކަމާ ބެހޭ އިތުރު މަޢުލޫމާތު ހޯދުމަށް އޮލޫތުބޮސުންއަށް އޮތް ހަމަ އެކަނި ހުރަހަކީ އޭނާއަކީ ލޯފާން މީހަކަށް ވުން އެކަންޏެއް ނޫނެވެ. އޭނާ އަތުގައި ސްމަރޓްފޯނެއްވެސް ނޯވެއެއެވެ. އެހެން ކަމުން، އިންޓަރނެޓްގެ ޒަރިއްޔާއިން އެއްޗެއް ހޯދާލުމަކީ އޮލޫތުބޮސުންއަށް މާ ފަސޭހަ ކަމަކަށް އޮންނަނީ ނުވެފައެވެ.

ޓެކްނޮލިޖީގެ ރޭހުގައި ދުނިޔެ ހޯދަމުންދާ ކުރިއެރުންތަކުގެ ތެރެއިންވެސް މަސްނޫޢީ ތޫނުފިލިކަން ނުވަތަ އަރޓިފިޝަލް އިންޓެލިޖެންސް (އޭއައި)ގެ ސަބަބަބުން، އޮލޫތުބޮސުންގެ ޙާލަތު މިހާރު ވަނީ ބަދަލުވާން ފަށާފައެވެ. އޮލޫތުބޮސުންގެ ތަކުލީފުތަކަށް ލުޔެއް ލިބެން ފެށީ، އޯފްލައިންކޮށް މަސައްކަތް ކުރެވޭ ފޯނެއް ލިބުނު ހިސާބުންނެވެ. އެ ފޯނަކީ އޭއައި ޓެކްނޮލޮޖީގެ އެހީގައި އޮޕަރޭޓް ކުރާ ފޯނެކެވެ.

މި ޚިދުމަތަކީ ކެނެޑާގައި މަރުކަޒުކޮށްގެން ހިންގާ ވިއާމޯ ކުންފުނިން މިދިޔަ މަހު ނައިޖީރިއާގައި ތަޢާރަފު ކުރި ޚިދުމަތެކެވެ. މި ޚިދުމަކީ އިންޓަރނެޓްގެ ޚިދުމަތް ނުލިބޭ، އެކަހެރި މަންޒިލްތަކުގައި ދިރިއުޅޭ މީހުންނަށް، އޭއައި ޓެކްނޮލޮޖީގެ މަންފާ ހާސިލު ކުރުމަށް ފުރުޞަތު ފަހި ކުރާ ޚިދުމަތެކެވެ.

ވިއާމޯގެ މި ޚާއްޞަ ޚިދުމަތް ފަރުމާކޮށްފައި ވަނީ އެންމެ އިހުގެ މޯބައިލް ފޯނުތައް ބޭނުން ކުރެވޭ ގޮތަށެވެ. އިހުގެ މޯބައިލް ފޯނެއް މެދުވެރިކޮށް އެ ސަރަޙައްދެއްގެ މޯބައިލް ފޯން ނެޓްވޯރކަށް ވަދެ، ހޯދަން ބޭނުންވާ މަޢުލޫމާތެއްގެ އިރުޝާދުތައް، އެސްއެމްއެސް ނުވަތަ އާދައިގެ ކޯލެއް މެދުވެރިކޮށް ނެޓްވޯރކަށް ދިނުމުން ކަސްޓަމަރުގެ ޒިންމާ ނިމުނީއެވެ.

އެހެނިހެން އޭއައި ޗެޓްބޮޓްތައް ފަދައިން މި ޚިދުމަތަކީވެސް ލިޔަންކިޔަން ނުދަންނަ މީހުންނަށް ބޭނުން ކުރެވޭ ޚިދުމަތެކެވެ. ވޮއިސް ކޮމާންޑްތަކުގެ އެހީގައެވެ. ހަމަ އެހެންމެ، ޚަރަދުގެ ގޮތުން ބަލާނަމަވެސް، ވިއާމޯއިން ނައިޖީރިއާގައި ދެމުން އަންނަ ޚިދުމަތް ހޯދަން ކުރަން ޖެހޭ ޚަރަދުވެސް ކުޑައެވެ. އިންޓަރނެޓް ބޭނުން ކުރުމަށް ޑޭޓާ ހޯދަން ޚަރަދު ކުރަން ޖެހޭ ފައިސާއިން ބޮޑު ބައެއް ސަލާމަތް ކުރެވެއެވެ.

މާލީ ބާޒާރުގެ އަގުތަކުން ދިވެހި ރުފިޔާއާ ވަޒަން ކުރާނަމަ، 10 ނައިރާ އަކީ އެންމެ 0.096 ލާރިއެވެ. ނައިޖީރިއާ އަކީ ލިޔަންކިޔަން ނުދަތުމާއި އިންތިހާ ފަޤީރުކަން އޭގެ އެންމެ އިންތިހާއަށް ފެތުރިފައި އޮތް ޤައުމެކެވެ.

ގްލޯރީ އަޚަބޫއީއަކީ ވިއާމޯއިން ނައިޖީރިއާގައި ހިންގާ ގޮފީގެ ރީޖަނަލް ޕްލެޓްފޯރމް މެނޭޖަރއެވެ.

ޢުމުރުން 25 އަހަރުގެ ޑޭވިޑް ދީވާ އަކީ ވަޑާން ކުރުމުގެ މަސައްކަތުގައި އުޅޭ ޒުވާނެކެވެ. ދާދި ފަހަކާ ޖެހެންދަށްވެސް އޭނާ މަޢުލޫމާތު ހޯދާ އުޅުނު ހަމަ އެކަނި ގޮތަކީ، ރޭޑިއޯ ޕްރޮގްރާމްތަކަށް ގުޅައިގެންނެވެ. އޭއައި ފޯނު ބޭނުން ކުރަން ފެށި ހިސާބުން އެކަން ބަދަލުވެއްޖެއެވެ.

ވަޑާން ކުރުމުގެ މަސައްކަތުގައި ހަށި ރައްކަލަށް ބޭނުން ކުރަން ޖެހޭ ޢާލާތްތައް އެކަށީގެން ވާ ގޮތެއްގައި ބޭނުން ކުރުމަކާ ނުލާ، އެ މަސައްކަތުގައި އުޅުމުގެ ސަބަބުން، 2020 ވަނަ އަހަރުގެ ތެރޭގައި އޭނާގެ ލޮލުގެ ފެނުމަށް އުނިކަން އަންނަން ފެށިކަން ޑޭވިޑް ފާހަގަ ކުރިއެވެ. މި ޒުވާނާ ޢަމާޒު ހިފާފައި ވަނީ، ދިރިއުޅުމަށް ޢާމްދަނީ ހޯދުމަށް އޭނާ މަސައްކަތް ކުރަމުން ދާ ވަޑާމުގެ ދާއިރާ ދޫކޮށް، އެހެން ދިމާއަކަށް މިޞްރާބު ބަދަލުކޮށްލުމަށެވެ.  އެ ކަމަށް ޚިޔާލު ހޯދަނީ އޭއައި ޓެކްނޮލޮޖީ މެދުވެރިކޮށެވެ.

އޮލޫތުބޮސުންގެ ދިރިއުޅުމަށްވެސް އައީ ހެޔޮ ބަދަލެކެވެ. އިންޓަރނެޓުން އޭނާ ބޭނުންވާ މަޢުލޫމާތެއް ހޯދުމަށްޓަކައި، އެހެން މީހުން ގާތު، އެމީހުންގެ ސްމަރޓް ފޯނުތައް ބޭނުން ކުރަން އެދި އާދޭސް ކުރުން ނިމުމަކަށް އަތުވެއްޖެއެވެ. އޭނާ ބޭނުންވާ މަޢުލޫމާތެއް، ބޭނުން ވަގުތަކުގެ ލިބިގަތުމުގެ ފުރުޞަތު، މިއަދު އޮލޫތުބޮސުންއަށް އެބަ އޮތެވެ.

ވިއާމޯއިން ބުނާ ގޮތުގައި މި ޚިދުމަތަކީ ދުނިޔޭގެ ނިސްބަތުން އެންމެ ފަޤީރު އަދި އެންމެ އެކަހެރި ޢާބާދުތަކަށް ޢަމާޒުކޮށްގެން އެ ކުންފުނިން ދޭން ފެށީ ޚިދުމަތެއް ކަމަށެވެ. ސްމަރޓްފޯނާއި އިންޓަރނެޓާވެސް ނުލާ، މަޢުލޫމާތު ހޯދާ ލިބިގަތުމުގެ ފުރުޞަތު، ނިކަމެތި ފަޤީރުންނަށް ހޯދައިދިނުމަށް ވިއާމޯއިން ކުރިއަށް ގެންދާ މަޝްރޫޢު އެންމެ ފުރަތަމަ ހިންގަން ފެށީ ޒެމްބީއާގައެވެ. އޭގެ ފަހުން ޕާކިސްތާން، ޓެންޒޭނިއާ އަދި އިންޑިއާގައިވެސް އެ ޚިދުމަތް ވަނީ ދޭން ފަށާފައެވެ.

ވިއާމޯއަކީ އެމެރިކާއާއި އިނގިރޭސިވިލާތުގެ އިތުރުން ތަރައްޤީއަށް މަސައްކަތް ކުރާ އިތުރު އެހެން އިދާރާތަކެއްގެ އެހީތެރިކަމާ އެކު ހިންގާ ކުންފުންޏެކެވެ. ކުޑަކުދިންގެ ޙައްޤުތަކާ ބެހޭ އދގެ ޖަމިއްޔާ (ޔުނިސެފް)އިންވެސް ވަނީ އެޗްއައިވީ، ނިއުޓްރިޝަން، ފެނާއި ނަރުދަމާ އަދި ސާފުތާހިރު ކަމާ ބެހޭ މަޢުލޫމާތު ފޯރުކޮށްދިނުމަށް، ވިއާމޯއާ ގުޅިގެން މަސައްކަތްތަކެއް ކޮށްފައެވެ.