ހާޖީއަކު ހޮސްޕިޓަލުގައި، އެހެން ހުރިހާ ހާޖީން މިހާރު ތިބީ އަރަފާތު ބިމުގައި
މިނާގެ ހޮސްޕިޓަލުގައި ފަރުވާދެމުންދާ ހައްޖުވެރިޔާ ވެސް ހައްޖު ކޯޕަރޭޝަންގެ އެހީތެރިކަމާއެކު އަރަފާތަށް ގެންދިއުމުގެ މަސައްކަތް ކުރަމުންދާއިރު، ހުރިހާ ހައްޖާޖީންގެ ހާލުވެސް ރަނގަޅު. ދިވެހި ހައްޖުވެރިންނަށް އަރަފާތުގައި ހަމަޖައްސާފައިވާ އިންތިޒާމުތައް މިދިޔަ އަހަރަށްވުރެ ފުރިހަމަކޮށްފައިވާކަމަށް ހައްޖު ކޯޕަރޭޝަނުން ބުނޭ. މީގެ އިތުރުން، ސައުދީގެ މުޠައްވިފް ޖަމާއަތުން ވެސް ވަނީ ދިވެހިންނަށް ބޭނުންވާ އެންމެހާ ޚިދުމަތްތައް އެންމެ ފުރިހަމައަށް ފޯރުކޮށްދޭނެކަމުގެ ޔަގީންކަން ދީފަ.
ދިވެހި ޙައްޖުވެރިން ޢަރަފާތައް ދިޔުން | ހައްޖު ކޯޕަރޭޝަން
އެންމެ ހާޖީއަކު ފިޔަވައި އެހެން ހުރިހާ ދިވެހި ހާޖީން ވަނީ ޢަރަފާތު ބިމުގައި ކަމަށް އިސްލާމިކް މިނިސްޓަރު ޑރ. ޝަހީމް އަލީ ސައީދު ވިދާޅުވެއްޖެ އެވެ.
މީޑިއާތަކަށް މައުލޫމާތު ދެއްވަމުން މިނިސްޓަރު ވިދާޅުވީ އެއްމެ ހާޖީއަކު މިނާގެ ހޮސްޕިޓަލްގައި އެޑްމިޓްކުރެވި ފަރުވާ ދެވެމުންދާ ކަމަށެވެ. އެ ހައްޖުވެރިޔާ ވެސް އަރަފާތަށް ގެންދެވޭނެ ކަމަށާއި ހައްޖު ކޯޕަރޭޝަންގެ އެހީތެރިން ދަނީ އޭނާ އާއެކު ހަރަކާތްތެރިވެ އެހީތެރިވަމުން ކަމަށް މިނިސްޓަރު ވިދާޅުވި އެވެ. އަދި ހުރިހާކަމެއް ވެސް ރަނގަޅު ކަމަށާއި ހައްޖުވެރިންގެ ހާލުވެސް ރަނގަޅު ކަމަށް މިނިސްޓަރު ވިދާޅުވި އެވެ.
ހައްޖު ކޯޕަރޭޝަނުން ބުނީ ޢަރަފާތުގައި ވެސް ދިވެހީން ތިބޭ ސަރަހައްދުގައި ދިވެހިންނަށް އިންތިޒާމުތައް މިދިޔަ އަހަރަށްވުރެ ފުރިހަމަކުރުމަށް އެ ކޯޕަރޭޝަނުން ގިނަ މަސައްކަތްތަކެއް ކޮށްފައިވާ ކަމަށެވެ.
ދިވެހި ހައްޖު ވެރިންނަށް ފުރިހަމަ އިންތިޒާމުތަކެއް ހަމަޖެހޭނެ ކަމަށް ދިވެހި ހައްޖުވެރިންނަށް ޚިދުމަތް ފޯރުކޮށްދިނުމުގައި އެހީތެރިކަން ފޯރުކޮށްދޭ ސައުދީގެ މުޠައްވިފް، ރަވާފް މިނާއިން ވެސް ވަނީ ވިދާޅުވެފަ އެވެ.
ރާއްޖޭގެ ހައްޖާޖީން ހައްޖަށް މިމަހުގެ 15، 17، 18 އަދި 19 ވަނަ ދުވަހު ފުރާފައިވާއިރު، ހުރިހާ އިންތިޒާމެއް ވަރަށް ފުރިހަމަ އަށް ވަނީ ހަމަޖައްސާފަ އެވެ. އަދި ހުރިހާ ހައްޖާޖީންނަށް ވެސް މައްކާއިން ހޫނު މަރުހަބާއެއް ކިޔާފައިވެ އެވެ.
