އައު ސީޒަނަށް ސައުދީން އުމްރާ ވިސާ ދޫކުރަން ފަށައިފި

އާ އުމްރާ މޫސުމަށް ތައްޔާރުވުމުގެ ގޮތުން، ސައުދީ އަރަބިއްޔާއިން އުމްރާ ވިސާ ދޫކުރުމާއި އުމްރާވެރިން އެ ގައުމަށް އެތެރެވުމުގެ ހުއްދަ، ޛުލްޙިއްޖާ މަހުގެ 14 ވީ އާދީއްތަ ދުވަހުން (31 މޭ 2026) ފެށިގެން ދޫކުރަން ފަށައިފިއެވެ.

ސައުދީ އަރަބިއްޔާގެ މިނިސްޓްރީ އޮފް ހައްޖު އެންޑް އުމްރާއިން ދާދިފަހުން އާންމުކުރި 1448 ވަނަ އަހަރުގެ އުމްރާ ކަލަންޑަރުގައިވާ ގޮތުން، ޖޫން މަހުގެ 1 ވާ ހޯމަ ދުވަހުން ފެށިގެން އުމްރާވެރިންނަށް މައްކާއަށް އެތެރެވުމާއި "ނުސުކް" އެޕްލިކޭޝަން މެދުވެރިކޮށް އުމްރާވުމުގެ ހުއްދަ ހޯދޭނެއެވެ.

މި އާ މޫސުމުގައި އުމްރާ ވިސާ ދޫކުރާނެ އެންމެ ފަހު ތާރީޚަކީ 1448 ވަނަ އަހަރުގެ ޝައްވާލް މަހުގެ 1 ކަމުގައިވާ 9 މާރިޗު 2027 އެވެ. އަދި އުމްރާވެރިންނަށް ސައުދީ އަރަބިއްޔާއަށް އެތެރެވުމުގެ އެންމެ ފަހު ތާރީޚަކީ 15 ޝައްވާލް 1448 ކަމުގައިވާ 23 މާރިޗު 2027 ކަމަށް އެ މިނިސްޓްރީން ވަނީ ކަނޑައަޅާފައެވެ. މީގެ އިތުރުން، އުމްރާވެރިން އެ ގައުމުން ފުރަންޖެހޭ އެންމެ ފަހު ތާރީޚަކީ 30 ޝައްވާލް 1448 ކަމުގައިވާ 7 އެޕްރީލް 2027 ކަމަށްވެސް މިނިސްޓްރީން ވަނީ ކަނޑައަޅާފައެވެ.

އުމްރާ މޫސުމުގެ ތެރޭގައި އުމްރާވެރިންނަށް ފެންވަރު ރަނގަޅު ޚިދުމަތްތަކެއް ފޯރުކޮށްދިނުމަށްޓަކައި، ކަނޑައެޅިފައިވާ ތާވަލާ އެއްގޮތަށް އަމަލުކުރުމަށާއި، މިނިސްޓްރީން ނެރެފައިވާ ހުރިހާ ގަވާއިދުތަކާއި އިރުޝާދުތަކަށް ފުރިހަމައަށް ބޯލެނބުމަށް އުމްރާގެ ޚިދުމަތްދޭ ކުންފުނިތަކަށާއި ބޭރު ގައުމުތަކުގެ އެޖެންޓުންނަށް މިނިސްޓްރީން ވަނީ އިލްތިމާސްކޮށްފައެވެ.