ޓިއުނީޝިއާ ބަލިކޮށް، ޖަޕާން އިން ފޯމުގައި

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު އެފްގައި ޓިއުނީޝިއާއާ ދެކޮޅަށް ކުޅުނު މެޗުން މޮޅުވެ، ޖަޕާން އިން އަނެއް ބުރުގެ އުންމީދު ބޮޑު ކޮށްފި އެވެ.

އާދީއްތަ ދުވަހުގެ ހެނދުނު މެކްސިކޯގެ މޮންޓެރޭ ސްޓޭޑިއަމްގައި ކުޅުނު މެޗު ޖަޕާން އިން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ޖަޕާން އިން ދެ ލަނޑު ޖެހިއިރު، އަނެއް ދެ ލަނޑު ޖެހީ ދެ ވަނަ ހާފުގައި އެވެ. 

މެޗު ފަށައިގެން ހަތަރު ވަނަ މިނެޓުގައި ޖަޕާން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޑައިޗީ ކަމަޑާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ކެއިޓޯ ނަކަމޫރާ އެވެ. 

އޭގެ ފަހުން ފުރަތަމަ ހާފުގެ 31 ވަނަ މިނެޓުގައި އަޔާސޭ ޔުއެޑާ ވަނީ ޖަޕާންގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. އެއީ ކޯ އިޓަކުރާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގައި ޖަޕާން އިން ރަނގަޅަށް ކުޅެފައިވާއިރު، ދެ ވަނަ ހާފުގެ 69 ވަނަ މިނެޓުގައި އެ ޓީމުން ވަނީ ތިން ވަނަ ލަނޑެއް ވެސް ޖަހައިފަ އެވެ. އެ ލަނޑު ޖަޕާން އަށް ޖަހައިދިނީ ޖުންޔާ ތޯ އެވެ. އެއީ ޔުއެޑާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން މެޗުގެ 83 ވަނަ މިނެޓުގައު ޔުއެޑާ ވަނީ ޖަޕާންގެ ހަތަރު ވަނަ ލަނޑު ޖަހައި، އިތުރަށް ލީޑު ފުޅާ ކޮށްދީފައި އެވެ. އެއީ ކައިސޫ ސަނޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މުބާރާތުގައި ޖަޕާން އިން ކުޅުނު ފުރަތަމަ މެޗުގައި ވަނީ ނެދަލެންޑްސްއާ އެއްވަރު ކޮށްފައި އެވެ. އަދި ޓިއުނީޝިއާގެ ފުރަތަމަ މެޗުގައި ވަނީ ސްވިޑެން އަތުން ބަލިވެފައި އެވެ. މި ގުރޫޕުގެ އެއް ވަަނައިގައި އޮތް ނެދަލެންޑްސް އާއި ދެ ވަނައިގައި އޮތް ޖަޕާން އަށް ވެސް ލިބެނީ ހަތަރު ޕޮއިންޓެވެ. ދެ މެޗުން ވެސް ބަލިވެ ޓިއުނީޝިއާ ވަނީ ވޯލްޑް ކަޕް އިން ކަޓައިފަ އެވެ.

ގުރޫޕު ސްޓޭޖުގައި ޖަޕާންގެ ފަހު މެޗުގައި ނިކުންނާނީ ސްވިޑެންއާ ދެކޮޅަށެވެ. އަދި ނެދަލެންޑްސް ނިކުންނާނީ ޓިއުނީޝިއާއާ ދެކޮޅަށެވެ.