ހުރިހާ ކުޅުންތެރިން ވެސް މުހިންމު، ޞަލާޙުއާ އެއްވެސް މައްސަލައެއް ނެތް: މިޞްރުގެ ކޯޗު

މިޞްރުގެ ކެޕްޓަން މުޙައްމަދު ޞަލާޙު އާއި އެ ޓީމުގެ ކޯޗު ޙުސާމް ޙަސަންއާ ދެމެދު މައްސަލަތަކެއް ޖެހިފައިވާ ކަމަށް ދެކެވޭ ވާހަކަތައް، މިޞްރުގެ ކޯޗު ޙުސާމް ދޮގު ކޮށްފި އެވެ. 

މިޞްރުގެ ކޯޗު ޙުސާމް ޙުސާމް އެހެން ބުނެފައި ވަނީ މުބާރާތުގެ ގުރޫޕު ސްޓޭޖުގެ ދެ ވަނަ މެޗުގައި ނިއުޒިލެންޑާ ދެކޮޅަށް މިޞްރުން ނިކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. 

އެގޮތުން ޙުސާމް ބުނީ، ޞަލާޙު އަކީ މިޞްރުގެ ޓީމަށް ވަރަށް މުހިންމު ކުޅުންތެރިޔެއް ކަމަށާއި، އޭނާގެ އިރުޝާދުގެ ދަށުން މިވަގުތު ތިބި 26 ކުޅުންތެރިންނަކީ ވެސް އެހާމެ މުހިންމު ކުޅުންތެރިން ކަމަށެވެ. އެއާ އެކު ޙުސާމް ބުނީ، އޭނާ އަކީ ވަރަށް ޕްރޮފެޝަނަލްކޮށް ކަންތައްތައް ކުރާ މީހެއްކަން ކޮންމެ ކުޅުންތެރިޔަކަށް ވެސް އިނގޭނެ ކަމަށާއި، ވަކި ކުޅުންތެރިޔަކަށް އިސްކަން ދިނުމުގެ އުސޫލެއް އޭނާ ނުގެން ގުޅޭނެ ކަމަށެވެ. 

މުބާރާތުގައި މިޞްރުން ބެލްޖިއަމްއާ ދެކޮޅަށް ކުޅުނު މެޗު އެއްވަރުވިއިރު، މެޗުގެ ވަކި ހިސާބަކުން ވަނީ ޞަލާޙު ބަދަލު ކޮށްފަ އެވެ. ޞަލާޙުގެ ބަދަލުގައި ޙަމްޒާ ޢަބްދުލް ކަރީމް ކުޅެން އެރުވިއިރު، އެކަމުގެ ސަބަބުން ޞަލާޙު އާއި ހުޝާމްއާ ދެމެދު މައްސަލަ ޖެހުނު ކަމުގެ އަޑުތައް އޮތީ ފެތުރިފައި އެވެ. 

އެކަމަށް ރައްދު ދެމުން ޙުސާމް ބުނީ، ޞަލާޙު އަކީ އޭނާގެ ކުޅުންތެރިންނަށް އެހީވާ އަދި އަޚުލާޤު ރަނގަޅު ނަމޫނާ ކުޅުންތެރިޔެއް ކަމަށެވެ. އެގޮތުން މެޗުގެ ފުރަތަމަ 11 ގައި ހިމެނިޔަސް، ނުވަތަ ބަދަލު ކުރިޔަސް އެއީ މައްސަލައެއް ނޫން ކަމަށާއި، ކުޅުންތެރިޔެއްގެ ދައުރަކީ އެއީ ކަމަށް ޙުސާމް ވަނީ ފާހަގަ ކޮށްފައި އެވެ. އެކަން ފާހަގަކޮށް ޙުސާމް ބުނީ، އޭނާ ނިންމާ ކޮންމެ ނިންމުމެއް ނިންމަނީ ޓީމާއި ޤައުމުގެ ފައިދާ އަށް ކަމަށާއި، ޞަލާޙު އަކީ ކޯޗުގެ ނިންމުމަށް ފުރިހަމަ އަށް އިޙުތިރާމް ކުރާ ކުޅުންތެރިޔެއް ކަމަަށެވެ. 

މިޞްރު އަދި ނިއުޒިލެންޑުން ގުރޫޕު ސްޓޭޖުގައި ކުޅުނު ފުރަތަމަ މެޗުން ދެ ޓީމު ވެސް އެއްވަރުވެފައި އޮތުމުން، މުބާރާތުގެ ކުރިއަށް އޮތް ބުރަށް ދިޔުމަށްޓަަކައި މި މެޗުން މޮޅުވުމަކީ ދެ ޓީމަށް ވެސް މުހިންމު ކަމަކަށް ވަނީ ވެފައި އެވެ. މިއީ މިޞްރުން ވޯލްޑް ކަޕްގައި ވާދަ ކުރާ ހަތަރު ވަނަ ފަހަރު ކަމަށްވާއިރު، އެ ޓީމަށް މިހާާތަނަށް ވޯލްޑް ކަޕްގެ އެއްވެސް މެޗަކުން މޮޅުވެވިފައި ނުވެ އެވެ. އެހެންކަމުން މިޞްރު އޮތީ ނިއުޒިލެންޑު އަތުން މޮޅުވެ، ތާރީޚީ މޮޅަކާ އެކު އަނެއް ބުރުގެ ފުރުސަތު ބޮޑު ކުރުމުގެ އުންމީދުގައި އެވެ.