ސްވިޑެން ކޮޅަށް ފަސް ލަނޑު ޖަހައިގެން ނެދަލެންޑްސް ހަމަޖެހިލައިފި

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު އެފްގައި ސްވިޑެންއާ ދެކޮޅަށް ކުޅުނު މެޗުން ބޮޑު މޮޅެއް ހޯދައި، ނެދަލެންޑްސް ހަމަޖެހިލައިފި އެވެ.

އެމެރިކާގެ ހައުސްޓަން ސްޓޭޑިއަމްގައި ހޮނިހިރު ދުވަހުގެ ރޭ ކުޅުނު މެޗު ނެދަލެންޑްސް އިން ކާމިޔާބު ކުރީ 5-1 އިންނެވެ. މެޗުގެ ފުރަތަމަ ހާފުގައި ނެދަލެންޑްސް އިން ދެ ލަނޑު ޖެހިއިރު، އަނެއް ތިން ލަނޑު ޖެހީ ދެ ވަނަ ހާފުގައި އެވެ.

މެޗު ފަށައިގެން ފަސް ވަނަ މިނެޓުގައި ބްރަޔަން ބްރޮބީ ވަނީ ލަނޑު ޖަހައި ނެދަލެންޑްސް އަށް ލީޑު ނަަގައިދީފައި އެވެ. އެއީ ކޯޑި ގަކްޕޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ 17 ވަނަ މިނެޓުގަައި ބްރޮބީ ވަނީ ނެދަލެންޑްސްގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ގަކްޕޯ ވަނީ ނެދަލެންޑްސްގެ ތިން ވަނަ ލަނޑު ޖަހައިފަ އެވެ. އޭގެ ހަތް މިނެޓު ފަހުން ގަކްޕޯ ވަނީ އިތުރު ލަަނޑެއް ޖަހައި، ނެދަލެންޑްސް އަށް ހަތަރު ލަނޑުގެ ލީޑެއް ހޯދައި ދީފައި އެވެ. 

މެޗުގެ 59 ވަނަ މިނެޓުގައި ސްވިޑެންގެ ހަމައެކަނި ލަނޑު ޖެހީ އެންތަނީ އެލަންގާ އެވެ. މެޗުގެ ފުރިހަމަ ހާފުގެ ވަގުތު ހަމަވާން މިނެޓަކަށް ވެފައި ވަނިކޮށް، ނެދަލެންޑްސްގެ ފަސް ވަނަ ލަނޑު ޖެހީ ކްރައިސެންސިއޯ ސަމާވިލް އެވެ. 

މުބާރާތުގައި ނެދަލެންޑްސް އިން ކުޅުނު ފުރަތަމަ މެޗުގައި ޖަޕާންއާ އެއްވަރުވެފައިވާއިރު، މިއީ ނެދަލެންޑްސް އިން ހޯދި ފުރަތަމަ މޮޅެވެ. ދެ މެޗުން ހަތަރު ޕޮއިންޓާ އެކު މިވަގުތު ނެދަލެންޑްސް އޮތީ އެއް ވަނައިގައި އެވެ.