އެއްބަސްވުމުގެ ދަށުން ޤަތަރުގައި ހުރި އީރާންގެ ހަ ބިލިއަން ޑޮލަރު އަނބުރާ ލިބޭނެ: އީރާންގެ ރައީސް ޕެޒެޝްކިއާން

އެމެރިކާ އާއެކު ވެފައިވާ ވަގުތީ އެއްބަސްވުމުގެ ދަށުން، ޤަތަރުގައި ހުރި އީރާންގެ ހަ ބިލިއަން އެމެރިކާ ޑޮލަރުގެ ފައިސާ އަނބުރާ ލިބޭނެ ކަމަށް އެ ގައުމުގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.

އީރާންގެ ރައީސް ޕެޒެޝްކިއާން މިކަން ހާމަ ކުރެއްވީ ހަނގުރާމަ ނިމުމަކަށް ގެނައުމަށް އެމެރިކާ އާއެކު ކުރިއަށްދާ މަޝްވަރާ ތަކުގެ ތަފްސީލު ދެއްވަމުންނެވެ.

އީރާންގެ ތަސްނީމް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، ޕެޒެޝްކިއާން ވިދާޅުވީ ދެ ގައުމުގެ ދެމެދުގައި ވެފައިވާ ފަހުމުނާމާގެ ހުރިހާ މާއްދާ ތަކެއް ހުރީ އީރާން އަށް ފައިދާވާ ގޮތަށް ކަމަށެވެ. އަދި މި މަޝްވަރާ ތަކުން ލިބޭނެ ކުރިއެރުންތައް ކުރިއަށް އޮތް ތަނުގައި ފެނިގެން ދާނެ ކަމަށް ވެސް ޕެޒެޝްކިއާން ވަނީ ފާހަގަ ކުރައްވައިފަ އެވެ. 

މީގެ ކުރިން އީރާން އަށް ގިނަ ކަންތައް ތަކެއް މަނާ ކުރި އެމެރިކާގެ ރައީސް ޑޮނަލްޑް ޓްރަމްޕް، އެންމެ ފަހުން ދެއްވި ތަގުރީރުގައި އެ ހުރިހާ ކަމަކީ އީރާންގެ ރައްޔިތުންނާއި، ގައުމަށް ލިބިގެންވާ ހައްގު ތަކެއް ކަމަށް ގަބޫލު ކުރައްވާފައިވާ ކަމަށް ޕެޒެޝްކިއާން ވިދާޅުވި އެވެ. އަދި ޤަތަރުގައި ހުރި އީރާންގެ ހަ ބިލިއަން އެމެރިކާ ޑޮލަރުގެ ފައިސާ އަނބުރާ ލިބޭނެ ކަމުގެ ޔަގީންކަން ޕެޒެޝްކިއާން ދެއްވި އެވެ.

މި މަޝްވަރާތަކާ ގުޅޭ ގޮތުން ވާހަކަ ދައްކަވަމުން ޕެޒެޝްކިއާން ވަނީ އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ އަށް ފާޑު ވިދާޅުވެފައެވެ. އެގޮތުން ޕެޒެޝްކިއާން ވިދާޅުވީ ސްވިޒަލެންޑުގައި ކުރިއަށްދާ މި މަޝްވަރާތަކާ މެދު އެންމެ ބޮޑަށް ހިތްހަމަ ނުޖެހޭނެ ފަރާތަކީ ނަތަންޔާހޫ ކަމަށެވެ.

އެމެރިކާގެ ހަމައެކަނި ޝަރުތަކީ އީރާން އިން ނިއުކްލިއާ ބޮމެއް އުފެއްދުން ހުއްޓާލުން ކަމަށް ޕެޒެޝްކިއާން ވިދާޅުވި އެވެ. މިއީ އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ ވެސް ތަކުރާރުކޮށް ވިދާޅުވަމުން ގެންދެވި ވާހަކައެއްކަން ފާހަގަ ކުރައްވައި، އީރާން އިން ނިއުކްލިއާ ބޮމެއް ބޭނުން ނުވާ ކަމަށް ޕެޒެޝްކިއާން ވިދާޅުވި އެވެ. 

މީގެ އިތުރުން، އެމެރިކާ އިން އެދިފައި ވަނީ އެކަން ލިޔުމުން ސޮއިކޮށް ދިނުމަށް ކަމަށާއި، އީރާން އިން މިހާރު އެ އެއްބަސްވުމުގައި ސޮއި ކޮށްފައިވާ ކަމަށް ވެސް ޕެޒެޝްކިއާން ވަނީ ހާމަ ކުރައްވައިފަ އެވެ.

މި އެއްބަސްވުމުގެ ސަބަބުން ދެ ގައުމުގެ ދެމެދުގައި އޮތް ނުތަނަވަސް ކަމަށް ހައްލެއް ލިބިގެން ދާނެ ކަމަށް ބެލެވެ އެވެ.