އަނގަ މަތީގައި އަތް އަޅައިގެން ވާހަކަ ދެއްކުމުން، ރަތް ކާޑު ދެއްކި ފުރަތަމަ ކުޅުންތެރިޔަކަށް ޕެރަގުއޭގެ އަލްމިރޮން

އިދިކޮޅު ކުޅުންތެރިޔާއާ ވާހަކަ ދެއްކިއިރު އަނގަ މަތީގައި އަތް އަޅައިގެން ހުރުމުގެ ސަބަބުން، މިފަހަރުގެ ފީފާ ވޯލްޑް ކަޕްގައި ރަތް ކާޑު ދެއްކި ފުރަތަމަ ކުޅުންތެރިޔަކަށް ޕެރަގުއޭގެ މިގޭލް އަލްމިރޮން ވެއްޖެ އެވެ.

ހޮނިހިރު ދުވަހު ޕެރަގުއޭ އިން ތުރުކީއާ ދެކޮޅަށް ކުޅުނު މެޗުގައި ހިނގި ހަމަ ނުޖެހުމެއްގެ ތެރެއިން، އަލްމޮރިން ވަނީ އަނގަ މަތީގައި އަތް އަޅައިގެން ހުރެ ތުރުކީގެ ކުޅުންތެރިޔަކާ ވާހަކަ ދައްކައިފަ އެވެ. އެއާ އެކު ރެފްރީ ވަނީ އޭނާ އަށް ރަތް ކާޑު ދައްކައި ދަނޑުން ފޮނުވާލައިފަ އެވެ. މިއީ ފުޓުބޯޅައިގައި އަލަށް ތައާރަފު ކުރި މި ޤަވާއިދުގެ ދަށުން ކުޅުންތެރިޔަކަށް ރަތް ކާޑު ދެއްކި ފުރަތަމަ ފަހަރެވެ. 

އުމުރުން 32 އަހަރުގެ އަލްމިރޮން ވަނީ، ތުރުކީގެ މާޓް މުލްދޫރްއާ ވާހަކަ ދެއްކިއިރު އަނގަ މަތީގައި އަތް އަޅައިގެން އަނގަ ނިވާ ކޮށްފައި އެވެ. އެއާ އެކު މުލްދޫރް ވަނީ އެ ތަނުގައި ހުރި އޮފިޝަލްގެ ސަމާލު ކަމަށް އެކަން ގެނެސްފައި އެވެ. ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު، މެޗުގެ ރެފްރީ އިވާން ބާޓަން ވަނީ އަލްމިރޮން އަށް ސީދާ ރަތް ކާޑު ދައްކައިފަ އެވެ. 

މިކަމާ ގުޅޭ ގޮތުން ބީބީސީ ރޭޑިއޯ ފަހެއްގެ ލައިވްގައި ވާހަކަ ދައްކަމުން އަޔަލެންޑުގެ ކުރީގެ ފޯވާޑު ކްލިންޓަން މޮރިސަން ބުނީ، ޤަވާއިދުތައް އިނގޭ ނަމަ އެފަދަ ކަމެއް ކޮށްގެން ނުވާނެ ކަމަށާއި، މެޗުގެ ރެފްރީ އާއި ވީއޭއާރު އިން ނިންމި ނިންމުމަށް ސާބަސް ދޭން ޖެހޭ ކަމަށެވެ. އަދި ހުރިހާ އެންމެން މި ނިންމުމަށް އެއްބަސް ނުވި ނަަމަވެސް، ޤަވާއިދެއް އޮތް ނަމަ އެއަށް ތަބާވާން ޖެހޭނެ ކަމަށް ވެސް އޭނާ ބުންޏެވެ. 

އަނގަ ނިވާ ކޮށްގެން ވާހަކަ ދެއްކުން މަނާ ކުރާ މި އައު ގަވާއިދަކީ މި ފަހަރުގެ ވޯލްޑް ކަޕްގައި އަލަށް އަމަލު ކުރަން ފެށި ގަވާއިދެކެވެ. މި ގަވާއިދު ތައާރަފު ކުރަން ނިންމީ މިދިޔަ އޭޕްރީލް މަހު ކެނެޑާގެ ވެންކޫވަރުގައި ބޭއްވި އިންޓަނޭޝަނަލް ފުޓުބޯލް އެސޯސިއޭޝަން ބޯޑް (އިފާބް) ގެ ހާއްސަ ބައްދަލުވުމެއްގައި އެވެ.

ފީފާގެ ރައީސް ޖިއާނީ އިންފަންޓީނޯ މީގެ ކުރިން ވިދާޅުވެފައި ވަނީ، ކުޅުންތެރިން އަނގަމަތި ނިވާ ކުރަނީ ބުނަން ނުޖެހޭ އެއްޗެއް ބުނުމުގެ ނިޔަތުގައި ކަމަށް ރެފްރީން ބަލަން ޖެހޭ ކަމަށާއި، އެފަދަ އަދަބެއް ދިނުމަށް އޭނާ ތާއީދު ކުރައްވާ ކަމަށެވެ. ނަމަވެސް ރަތް ކާޑު ދެއްކުމުގެ ފުރިހަމަ އިޚްތިޔާރު އޮންނާނީ ހާލަތަށް ބަލައި ރެފްރީއަށް ކަަމަށް ވެސް ވިދާޅުވެފައިވެ އެވެ. 

ކުޅުންތެރިން އަނގަ ނިވާ ކޮށްގެން ވާހަކަ ދެއްކުމުގެ މައްސަލަ ބޮޑުވީ މިދިޔަ ފެބްރުވަރީ މަހު ޔުއެފާ ޗެމްޕިއަންސް ލީގުގައި ބެންފީކާގެ ޖިއަންލޫކާ ޕްރެސްޓިއާނީ، ރެއާލް މެޑްރިޑްގެ ވިނީޝިއަސް ޖޫނިއާއާ ވާހަކަ ދެއްކިއިރު ޖާޒީން އަނގަ ނިވާ ކުރި ހާދިސާއާ ގުޅިގެންނެވެ. އެ ފަހަރު އޭނާގެ މައްޗަށް ނަސްލީ ތަފާތު ކުރުމުގެ ތުހުމަތު ކުރެވުނު ނަމަވެސް، ޔޫއެފާގެ ތަހުގީގަށް ފަހު، އޭނާ ހަ މެޗަށް ސަސްޕެންޑު ކުރި އެވެ.