1998 ވަނަ އަހަރުގެ ފަހުން ސްކޮޓްލެންޑުން ވޯލްޑް ކަޕްގައި ކުޅޭތީ، ކައިވެންޏާއި ހަނީމޫން ވެސް ޚާއްސަ ކުރީ އެކަމަށް!

އެމެރިކާގައި މިހާރު ކުރިއަށްދާ ފީފާ ވޯލްޑް ކަޕްގެ ފޯރިއާ އެކު، ސްކޮޓްލެންޑަށް ނިސްބަތްވާ ބަޔަކު އެމެރިކާގެ މެސެޗުސެޓްސްގައި އެކަމަށް ޚާއްސަކޮށްގެން ކައިވެނި ކޮށްފި އެވެ.

މިއީ 1998 ވަނަ އަހަރުގެ ފަހުން ސްކޮޓްލެންޑުން ވޯލްޑް ކަޕަށް ކޮލިފައިވި ފުރަތަމަ ފަހަރު ކަމަށްވާއިރު، ސްކޮޓްލެންޑަށް ނިސްބަތްވާ މި މީހުން ނިންމީ އެ ޤައުމުގެ މެޗުތައް ބެލުމަށް އެމެރިކާ އަށް އައިސް، އެ ދަތުރުގެ ތެރެއިން ކައިވެނި ކުރުމަށެވެ. 

މިގޮތުން ފުރަތަމަ ކައިވެނި ކޮށްފައި ވަނީ އެލެގްޒެންޑާ ބޯން އާއި އޭނާގެ ލޯބިވެރިޔާ ލޫއީސް އެވެ. ބޮސްޓަންގެ ސިޓީ ހޯލުގައި ބޭއްވި މި ކައިވެނީގެ ރަސްމިއްޔާތުގައި އެލެގްޒެންޑާ ހުރީ ސްކޮޓްލެންޑުގެ ސަގާފީ ހެދުމެއް ކަމަށްވާ ކިލްޓްގައި އެވެ. ބޮސްޓަންގައި ކައިވެނި ކުރަން ނިންމި ސަބަބާ ގުޅޭ ގޮތުން ސުވާލު ކުރުމުން އޭނާ ބުނީ، އެއީ ވޯލްޑް ކަޕާ ގުޅިގެން ނިންމި ނިންމުމެއް ކަމަށެވެ.

މި ކައިވެނީގެ ވަޢުދުތައް ކަނޑައަޅާފައި ވަނީ ވެސް މި ދަތުރާ ގުޅުވައިގެންނެވެ. ކައިވެނީގެ އުފަލުގައި ބައިވެރިވި އާއިލާ އާއި ރަހުމަތްތެރިން ވަނީ ސްކޮޓްލެންޑުގެ ސަގާފީ ރާގު ތަކާ އެކު، ލަވަ ކިޔައި އުފާ ފާޅު ކޮށްފައި އެވެ.

މީގެ އިތުރުން، އޯވެން އާއި ޕައުލާ ކުއިގްލީ ނަމަކަށް ކިޔާ ދެމަފިރިއަކު ވެސް ވަނީ މިދިޔަ ބުދަ ދުވަހު މެސެޗުސެޓްސްގެ ވޭމައުތުގައި ކައިވެނި ކޮށްފައި އެވެ. މި ދެމީހުން އެންގޭޖްވީ މީގެ ނުވަ އަހަރު ކުރިން 2017 ވަނަ އަހަރުގެ ޖޫން މަހުގެ 17 ވަނަ ދުވަހު އެވެ.

ޕައުލާ ބުނި ގޮތުގައި އެމީހުން ކުރިން ރާވާފައި އޮތީ އެންގޭޖް ވިތާ 10 އަހަރު ފުރޭ ދުވަހު ކައިވެނި ކުރުމަށެވެ. ނަމަވެސް، ސްކޮޓްލެންޑު ވޯލްޑް ކަޕަށް ކޮލިފައި ވުމުން އެ ނިންމުން ބަދަލުކޮށް. ކައިވެނި އެއް އަހަރަށް އަވަސް ކުރީ ވޯލްޑް ކަޕްގެ ތެރެއިން ކައިވެނި ކުރުމުގެ ބޭނުމުގައި ކަމަށް އޭނާ ބުންޏެވެ.

އެހެން ގައުމެއްގައި ހުރެގެން ކައިވެނީގެ ކަންކަން އިންތިޒާމު ކުރުމުގައި މި ދެމަފިރިންނަށް ގިނަ ގޮންޖެހުން ތަކެއް ކުރިމަތިވި އެވެ. އެހެންކަމުން، އެމީހުން އެހީތެރި ކަމަށް އެދި ފޭސްބުކްގައި ކުރި ޕޯސްޓަކާ ގުޅިގެން، މެސެޗުސެޓްސްގައި ދިރިއުޅޭ ސްކޮޓްލެންޑުގެ ރައްޔިތެއް ކަމަށްވާ ޖިމް ލެވާ ވަނީ އެހީތެރިކަން ފޯރު ކޮށްދީފައި އެވެ. ޖިމް ވަނީ މި ކައިވެނީގެ ރަސްމިއްޔާތު ކުރިއަށް ގެންދިޔުމުގައި އިސްކޮށް ހަރަކާތްތެރިވެފައި އެވެ.

މި ކައިވެނީގެ ރަސްމިއްޔާތު ބާއްވާފައި ވަނީ މޫދު ކައިރީގައި ހުރި އެއާ ބީއެންބީ އެކަމަޑޭޝަނެއްގައި އެވެ. މި ރަސްމިއްޔާތުގައި އެމީހުންގެ ދަރިފުޅާއި، ވޯލްޑް ކަޕް ބަލަން ގޮސް ތިބި އާއިލާގެ މެންބަރުން އަދި ރަހުމަތްތެރިން ބައިވެރިވި އެވެ. ކައިވެނީގެ ހަފްލާ ބާއްވާފައި ވަނީ ކުއިންސީގައި ހުންނަ "ދަ ވިއު" ރެސްޓޯރަންޓުގައި އެވެ.